To whenue Jesu hẹnazọ̀ngbọna devisunnu mẹkanwekowhàngán lọ tọn godo, e tọ́n sọn Kapẹlnaumi bo dedo Naini, tòdaho de he dẹn na kilomẹtlu 32 linlán to hùwaji-whèyihọ. E ma yin ewọ kẹdẹ wẹ zọ̀n. Devi etọn lẹ po gbẹtọgun daho de po hodo e. Diblayin to whèjai wẹ yé sẹpọ Naini. To finẹ, yé pé Ju susu he jei ṣiọ dì gbé. Oṣiọ dẹpẹ de tọn wẹ yé ze jei gbonu tòdaho lọ tọn nado yì dì i.

Onọ̀ dẹpẹ lọ tọn wẹ to awubla mẹ hugan to yé mẹ. Ewọ yin asuṣiọsi de bọ todin, ovi dopo gee he e tindo sọ kú. To whenue asu etọn kú, e whè gbau e gbẹ́ tindo visunnu yiwanna etọn. Yí nukun homẹ tọn do pọ́n lehe ewọ na ko vẹ́ po visunnu etọn po do, na visunnu lọ ji wẹ todido etọn lẹ po hihọ́ etọn to sọgodo po sinai do wutu. Todin, ovi lọ lọsu kú. Mẹnu wẹ pò he na nọ e dè bo nọgodona ẹn todin?

To whenue Jesu mọ nawe lọ, awubla sinsinyẹn he mẹ nawe lọ te yinuwado e ji yì ahun mẹ. Ewọ yí awuvẹmẹ po jidevọnamẹ po do dọna nawe lọ dọmọ: “A viavi ba blo.” Ṣigba, e sọ yí nude wà ga. E dọnsẹpọ bo doalọ apotinjan he ji oṣiọ lọ tin te go. (Luku 7:13, 14) Nuyiwa etọn zọ́n bọ omẹ tòdaho lọ tọn he to aluẹmẹ lọ lẹ nọte to ajiji mẹ. Mẹsusu na ko kanse dọ, ‘Etẹ dọ wẹ e te, podọ etẹ wà gbé e ja?’

Podọ etẹwẹ dogbọn mẹhe to gbejizọnlinzin hẹ Jesu bo ko mọ ẹn bọ e wà azọ́njiawu huhlọnnọ lẹ nado hẹn azọ̀n susu gbọ lẹ dali? Vlavo yé ma ko mọ pọ́n bọ Jesu fọ́n mẹde sọnku. Dile etlẹ yindọ fọnsọnku lẹ wá aimẹ to hohowhenu, be Jesu sọgan wà onú mọnkọtọn de ya? (1 Ahọlu lẹ 17:17-23; 2 Ahọlu lẹ 4:32-37) Jesu degbe dọmọ: “Dẹpẹ, yẹn dọna we: Fọ́n!” (Luku 7:14) Podọ nuhe jọ niyẹn. Dẹpẹ lọ fọ́n sinai bo jẹ hodọ ji! Jesu ze e jo na onọ̀ etọn he vó bọ ayajẹ etọn sọ gọfla. Nawe lọ masọ tin ewọ ṣo ba.

To whenue omẹ lọ lẹ mọdọ dẹpẹ lọ ko gọwá ogbẹ̀ nugbonugbo, yé pà Jehovah, yèdọ Jiwheyẹwhe  Gbẹ̀namẹtọ lọ dọmọ: “Yẹwhegán daho de ko yin zizedaga to ṣẹnṣẹn mítọn.” Mẹdevo lẹ mọnukunnujẹ zẹẹmẹ azọ́njiawu he Jesu wà lọ tọn mẹ bo dọmọ: “Jiwheyẹwhe ko lẹ́ ayidonugo etọn hlan omẹ etọn lẹ.” (Luku 7:16) Linlin he gando nujiawu ehe go yawu gbayipe gbọn otò he lẹdo pé mẹ, podọ vlavo jẹ Nazalẹti he yin tòdaho he mẹ Jesu whẹ́n te, he to nudi kilomẹtlu 10 do finẹ. Linlin lọ tlẹ sọ gbayipe yì hùwaji kakajẹ Jude.

Johanu Baptizitọ gbẹ́ pò to gànpamẹ, podọ e tindo ojlo to azọ́njiawu he Jesu penugo nado wà lẹ mẹ taun. Devi Johanu tọn lẹ dọ azọ́njiawu enẹlẹ na ẹn. Nawẹ e yinuwa gbọn?