Nọ Jesu ọ nwani siwi odibo oletu ogbaẹmo na no, o te no Kapaniọm kpobọ ẹwho Nein, onọ o rọ emaele 20 thabọ no Kapaniọm nọ o rrọ ofẹ ẹkpẹlobọ ukiediwo-ọre riẹ. Ọye ọvo ọ jọ usu hu. Ilele riẹ gbe ogbotu ahwo a jọ kugbei. Ẹsejọhọ ubrobọ owọwọ a ro te ughe ẹwho Nein. A tẹ jọ etẹe nyaku ahwo Ju buobu nọ a be wọ ori jọ nyai ki. Ọmọzae jọ nọ o whu a be wọ nyai ki na.

Ohwo nọ ọ be mai weri evaọ usu ahwo nana họ oni ọmọzae na. Aye nana yọ aye-uku yọ ọmọ nana ọvo o wo. Oke nọ ọzae riẹ o whu no, ọmọ nana o je ro si eya lọ. Dai roro epanọ oni na o ti you ọmọ na te, keme ọye ọvo họ ohwo nọ o wo nọ ọ te rẹrotei nọ ọ tẹ kpako no. Whaọ, ọye o whu no na. Kọ ono ọfa o gbe wo nọ o ti fiobọhọ kẹe?

Nọ Jesu ọ ruẹ aye nana nọ uweri o da oma fia na, ohrọ riẹ o tẹ riẹe gaga. Ọ tẹ tuduhọ iẹe awọ nọ: “Whọ gbẹ viẹ hẹ.” Orọnikọ oware nọ o ru kẹe oye ọvo ho. Jesu ọ nya kẹle ehwa nọ a wọ ọmọzae na fihọ na, ọ tẹ rọ obọ te ehwa na. (Luk 7:13, 14) Oware nọ o ru na gbe oghẹrẹ nọ o ro ru ei u te ru ahwo nọ a be nyai ki ori na dikihẹ ẹsiẹvo. Ẹsejọhọ ahwo buobu a je roro evaọ udu rai nọ: ‘Fikieme ọ rọ d’omai ji, kọ eme ọ gwọlọ ru?’

Kọ ẹvẹ kpahe ahwo nọ a bi lele Jesu kperẹ na, enọ e ruẹ eware igbunu nọ o ru no, te eyao nọ o siwi? U muẹro nọ a re ruẹ Jesu nọ ọ kpare ohwo no uwhu ze ẹdẹvo ho. Dede nọ idibo Ọghẹnẹ a kpare ahwo no uwhu ze evaọ oke nọ u kpemu, kọ Jesu ọ te sai ru oware utioye? (1 Ivie 17:17-23; 2 Ivie 4:32-37) Jesu ọ tẹ ta nọ: “Ẹghele, mẹ be ta kẹ owhẹ nọ, kpama!” (Luk 7:14) Ere o nwane via. Ọmọzae na ọ tẹ kpama keria je mu ẹme họ ẹta. Akpọ o te gbe oni riẹ unu. Jesu ọ tẹ rehọ ọmọzae na kẹ oni riẹ nọ oghọghọ o da oma fia na. Obọnana, ọ gbẹ te jọ goli hi.

 Nọ ahwo na a ruẹ nọ ọmọzae na ọ kparoma no uwhu ze no, a te bi jiri Jihova, Ọnọ ọ rẹ kẹ uzuazọ na, inọ: “Ọruẹaro ologbo ọ romavia no evaọ udevie mai.” Amọfa nọ a wo otoriẹ oware nọ Jesu o ru na a tẹ ta nọ: “Ọghẹnẹ ọ kareghẹhọ ahwo riẹ no.” (Luk 7:16) Usi oware nọ o via na u te do te oria kpobi ababọ oke oraha, te obọ Nazarẹt dede, ẹwho Jesu nọ ọ rọ emaele ezeza thabọ no oria na. Usi na u tube do te obọ Judia nọ o rrọ obọze ovatha-ọre dede.

Jọn Ọhọahwo-Ame na ọ gbẹ rrọ uwou-odi, yọ ọ gwọlọ riẹ kpahe eware igbunu nọ Jesu o bi ru. Ilele Jọn a vuẹ riẹ kpahe eware igbunu nọ Jesu o bi ru. Kọ eme Jọn o ru?