Kufuma hakuka ngamba yakapitau kamaswalale, Yesu ayile kunganda yaNane, jikilomita 32 kumututuko waKapelenau. Ayile natumbaji twenyi namayongomena avatu. Vahetele kwakamwihi naNane hakulauka chalikumbi. Vawanyine vaYuleya vavavulu vali nakulovoka munganda nakuya nakufunda kanyike walunga.

Naye yauze mwana ikiye apwile naushona chikuma mwomwo apwile tuliwe, kaha nawa mwanenyi umwe kaha lyamunwe ikiye nafu. Omu afwile lunga lyenyi, ajikile muchima hali ou mwanenyi walunga. Kuyoya chenyi chosena chapendaminyine hali ou mwanenyi. Jino nayou mwana afwelelele nawa nafu. Iya jino mwamukafwa nakumuzakama?

Omu Yesu amwene ou pwevo, amwivwililile keke chikuma. Ngocho ambile kuli ou pwevo mujila yalikoji nakumufwelelesa ngwenyi: “Hola, kanda naulilako.” Kaha ayile nakukwata kumusela vakulikile uze mufu. (Luka 7:13, 14) Vatu vosena vemanyine nakumona vyuma asakile kulinga. Ngocho vaputukile kulihulisa ngwavo, ‘Vyuma muka ali nakusaka kulinga?’

Nyi vaze vapwile nakutambuka naYesu nakumona vyuma vyakukomwesa alingilenga nakuka misongo yayivulu vashinganyekele muka? Kanda vamonengaho lyehi Yesu mwasangula mufu. Numba tuhu kusanguka chapwileko kushikulu, kutala Yesu nahase kusangula mufu tahi? (Vamyangana 1, 17:17-23; Vamyangana 2, 4:32-37) Yesu ambile ngwenyi: “Ove mukweze walunga, nangwamba kuli ove ngwami, hinduka!” (Luka 7:14) Ou mukweze ahindukile nakuputuka kuhanjika, kaha Yesu amuhanyine kuli naye. Ou tuliwe aputukile kutwama cheka namwanenyi.

Omu vatu vamwene ou mwana nasanguka, vaputukile kwalisa Yehova Muka-kuhana Kuyoya, ngwavo: “Muli etu munakatuka kapolofweto wamunene.” Veka hakumona chuma chakukomwesa alingile Yesu, vambile ngwavo:  “Kalunga nalakana vatu jenyi.” (Luka 7:16) Nakushimbula chiku, puho kaneyi yatandakanyine mumafuchi aze ahachileko, nakuNazaleta kwimbo lyaYesu, kafwe jikilomita 10. Puho kana yahetele nakusulo yaYuleya.

Halwola kana, Yowano Muka-kumbapachisa apwile lika mukamenga, ngocho evwile kuwaha hakwivwa milimo apwile nakukilikita Yesu. Tumbaji twaYowano vamulwezelenga vyuma kanevi vyakukomwesa. Kaha alingile vyuma muka?