Msinyana ngemva kokulapha isisebenzi somphathi wamabutho, uJesu uyakhamba eKapernawumi uya eNayini. Ukuya edorobheni leNayini elisesewula-tjingalanga, libanga elingaphezu kwamakhilomitha ama-32. UJesu akakhambi yedwa. Ukhamba nabafundi bakhe nesiqubuthu sabantu. Kungenzeka sekusentambama nabatjhidela ngaphandle komuzi weNayini. Bahlangana namaJuda amanengi asemngcwabeni. Athwele isidumbu sesokana ayosingcwaba ngaphandle kwedorobho.

Akusimatlhuwo ngonina lesokaneli, manikelela. Unina lesokaneli mhlolokazi, begodu lo bekukuphela komntwanakhe. Nakuhlongakala indodakwakhe, waduduzwa kukuthi usasele nendodanakhe. Bekasame ngayo, bayirhara nomncamo begodu athemba ukuthi izomtlhogomela nasele aluphele. Kodwana nje nayo ihlongakele. Alo-ke ngubani ozokuhlala naye bekamtlhogomele?

UJesu nakabona umma lo begodu ezwa ngobujamo bakhe, ihliziywakhe iba buhlungu. Ngesineke uJesu umqinisa idolo, uthi: “Lisa ukulila.” Kodwana uJesu akapheleli lapho. Uyabandamela bese uthinta ihlaka abathwele ngalo isidumbu. (Lukasi 7:13, 14) Isenzo sakhesi senza umngcwabo ujame tsi. Kufanele bona abantu abanengi bayazibuza ukuthi, ‘kubayini atjho amezwi la begodu ufuna ukwenzani?’

Kuthiwani ngalabo abakhamba noJesu abambone enza imikarisomraro, alapha amalwelwe ahlukahlukeneko? Abakab’ ukubona uJesu avusa umuntu ohlongakeleko. Bakhona abavuswako ekadeni, kodwana uJesu angakghona na ukuvusa umuntu? (1 AmaKhosi 17:17-23; 2 AmaKhosi 4:32-37) UJesu uthi: “Sokana, ngithi kuwe, vuka!” (Lukasi 7:14) Ngilokho okwenzekako, isokaneli liyavuka lithoma nokukhuluma! UJesu umnikela unina ohlangahlanganiswe kuthukwa nethabo. Uvukile umntwanakhe.

 Abantu nababona ukuthi isokaneli liyaphila, badumisa uJehova onguMuphi wokuPhila, bathi: “Kuvele umphorofidi omkhulu phakathi kwethu.” Abanye bazwisisa ukuqakatheka kwesenzo esihle sakaJesu bathi: “UZimu ubakhumbulile abantu bakhe.” (Lukasi 7:16) Indaba le irhatjheka msinyana beyiyokufika neendaweni ezibhodileko, ifika neNazaretha ekhabo lakaJesu okulibanga elingaba makhilomitha alitjhumi. Umbiko lo ufika nesewula eJudiya.

UJwanisi uMbhabhadisi usesesejele, begodu ufisa ukwazi ngemisebenzi kaJesu. Abafundi bakhe bamtjela ngemikarisomraro kaJesu. Uzizwa njani?