Hesus a sali for di Kapernaum, kaminda el a kaba di kura e sirbidó di e ofisial di ehérsito, i tabata bayendo Nain, un stat ku tabata keda algu mas ku 32 kilometer zùitwèst di Kapernaum. Su disipelnan i un multitut grandi di hende tabata huntu kuné. Ora nan a yega frontera di Nain, probablemente kasi anochi, nan a topa un grupo grandi di hudiu kanando pa bai dera un hóben. E hudiunan akí tabata kargando e morto pa bai der’é pafó di e stat.

E hendenan tabata tristu, pero esun mas afligí tabata mama di e hóben. El a pèrdè su kasá i awor su úniko yu. Despues ku su esposo a fayesé, sikiera e tabatin su yu hòmber stimá huntu kuné. Bo por imaginá bo kon será e ku su yu lo tabata? Ademas, su siguridat i futuro tabata dependé di e yu akí. Pero awor, su úniko yu tambe a muri. Ken lo a kompañ’é i perkurá p’e?

Ora Hesus a mira kon kibrá i afligí e señora akí tabata, el a haña duele di dje. Ku ternura i na un manera ku ta duna konfiansa, Hesus a bis’é: “No yora mas.” Pero Hesus a hasi mas ku esei. El a bai na e kama di morto ku e hendenan tabata kargando i a mishi ku esaki. (Lukas 7:13, 14) Loke el a hasi a hala atenshon di tur e hendenan i e kargadónan. Mesora, nan a para. Nan lo a puntra nan mes: ‘Kiko e ta bai hasi?’

Awor, kiko di e personanan ku tabata biaha huntu kuné kendenan a mira tur e obranan grandi ku el a efektuá, kurando tur sorto di malesa? Aparentemente, nunka nan a mira Hesus lanta hende for di morto. Aunke algun sirbidó di Dios a yega di resusitá hende hopi tempu promé, e hendenan ku tabata huntu ku Hesus lo a puntra nan mes si Hesus lo por a hasi algu asina. (1 Reinan 17:17-23; 2 Reinan 4:32-37) Hesus a bisa e hóben ku tabata morto riba e kama: “Yònkuman, mi ta bisa bo: Lanta ariba!” (Lukas 7:14) Mesora e hóben a lanta sinta i kuminsá papia. I Hesus a entreg’é na e mama. E mama a keda di shòk pero masha kontentu; e no tabata su so mas.

Ora e hendenan a mira ku di bèrdat e hóben a lanta for di morto, nan a kuminsá glorifiká Dios,  e Fuente di Bida. Algun di nan a bisa: “Un gran profeta a lanta meimei di nos.” Otronan, ku a komprondé loke e obra poderoso akí di Hesus a nifiká, a bisa: “Dios a dirigí su atenshon na su pueblo.” (Lukas 7:16) E notisia tokante e suseso asombroso akí a plama masha lihé den tur e áreanan ei banda i kisas a yega te kaminda Hesus a lanta, esta, na Názarèt, ku tabata keda mas o ménos dies kilometer leu. E notisia a yega asta te na Hudea.

Huan Boutista tabata ketu bai den prizòn. E tabata ansioso pa sa tokante Hesus su obranan. Kon el a reakshoná ora su disipelnan a kont’é tokante e milagernan ku Hesus tabata hasi?