Tangua diazonda gungima dia gusaga muenya mudimo wa fumu wa masuta, Yesu wakatugile gu Kaphelenauma, wayile gu Nayina gu khanda ya mbongo. Gula muthu wakatuga gu Kaphelenauma ha guya gu Nayina, udi naye guwenda ba kilometre 32. Yesu gayilego hakhenji. Wayile nu alandudi enji nu athu avula akhalele gumulandula. Yajiya gukhala egi ahetele hehi nu Nayina mu tangua dia ngueze. Atagenele nu enya Yuda avula akhalele muza nu mvumbi. Akhalele muya mufunda mona yala mumoshi wafile.

Muthu wakhalele diago nu gikenene giavula gubalega udi gina mona muene. Wakhalele mukhetu wa gafunda. Luko, mun’enji mumoshi ha mumoshi wafile. Tangua mulumi’enji wafile, wasalele phamba nu mun’enji mumoshi wa yala gakhalele muzumba muavula. Tangiza gale guzumba guakhalele nago mukhetu owu gudi mun’enji handaga wakhalele nu felela egi muene mbawumukuatesa. Henyaha mona muene nji wafua. Nanyi mbawumukuatesa luko?

Tangua Yesu wamonele mukhetu muene, wavuile gikenene giavula mu mutshima wenji mukunda nu ndaga jia mubuidile. Nu khenda jiagasue, Yesu watuluile mukhetu muene mutshima, wa mudijigile egi: ‘Bemba gudila.’ Gungima, wakalegele ndaga jiko. Wasuenene hehi nu giphona giambiwe mona muene. (Luka 7:13, 14) Tangua athu akhalele muya mufunda mvumbi amonele ngenyi, amagenele giphungu gimoshi. Yadiago, avula mukatshi diawo adihudile egi: ‘Ya kotelesa itshi, luko itshi adi mutshigina gukalagala?’

Itshi yazuelele athu akhalele muwenda nu Yesu, anyi amonele ndaga jiakoma jia gushimana gakalegele muene nu misongo yavula gasagele? Yajiya gukhala egi akhalele khenji amona gale Yesu mufuzumuna muthu wa gufua. Ikhale Nzambi wafuzumuine athu mu tangua dikulu, Yesu wajiya diago gufuzumuna athu ba? (1 Mafumu 17:17-23; 2 Mafumu 4:32-37) Yesu wazuelele egi: ‘Vuala dia yala, ngudi muguwambela egi, zuga mu molu!’ (Luka 7:14) Mona yala wafuzumugile. Wazugile molu, wasendesele guzuela! Yesu wamuhanele gudi gin’enji, yonu wakhalele nu lamba gu mutshima uvi wasuangulugile muavula. Gakhalelego luko hakhenji.

 Hamonele athu egi mona yala wakhalele diago nu monyo, atumbuishile Yehowa, Muhanyi wa Lujingu. Azuelele egi: ‘Profete wakoma wamuenega mukatshi dietu.’ Ako akotelesele diago muabonga ndaga jia Yesu jia gushimana, azuelele egi: ‘Nzambi wahaga meso gudi athu enji.’ (Luka 7:16) Lukuma lua ndaga eyi ya gushimana luamuangegene mu phushi mu membo akhalele hehi, yajiya gukhala nji gu Nazaleta, dimbo dia kudile Yesu, mu ba kilometre 10. Lukuma luene luahetele nji gu sudi ya Yudea.

Mu tangua dinyinyi, Yone Mubatiji wakhalele mu bologo. Uvi wakhalele musuanguluga nu midimo ya khalele mutshita Yesu. Alandudi enji a muwambelele lumene lua ndaga jiagasue jia gushimana jia khalele mutshita Yesu. Itshi gakalegele?