Kete na peko ti so Jésus asava ngbâa ti turugu ti kota kamba so, lo londo na gbata ti Capernaüm lo gue na Naïn, mbeni gbata so ayo kilomètre 32 na mbage ti sud-ouest. Lo gue lo oko ape. Lo na adisciple ti lo nga na gbâ ti azo la ague legeoko. Âmanke ayeke nduru na lakui la si ala si na agbata so ayeke nduru na kodro ti Naïn ni. Na place ni so, ala wara gbâ ti Juif so ayeke gue ti lu kuâ. A yeke kuâ ti mbeni molenge-koli la ala yeke gue ti lu ni na gigi ti gbata ni.

Zo so ayeke na mawa mingi ahon atanga ni kue ayeke mama ti molenge-koli ni. Lo yeke mbeni wali-mua, na oko molenge ti lo la alondo ti kui so. Na ngoi so koli ti lo akui lani, gi lo na molenge ti lo ti koli so lo ye lo mingi la angbâ ala use. Tara ti bâ tongana nyen la lo ye molenge ni so mingi, gigi ti lo ti kekereke kue ayeke gi na ndo ti molenge so. Fadeso, molenge ni kue akui. Zo wa la ayeke aidé ande lo na ayeke duti ande na tere ti lo zo wa?

Na ngoi so Jésus abâ wali so, mawa ti wali ni asara lo mingi ndali ti mara ti vundu so lo yeke na yâ ni so. Yeke, nga na mbeni lege so adë bê, Jésus atene na wali ni, lo tene: “Kaï toto ni.” Me Jésus angbâ gi ge ape. Lo ngbâ lo pusu nduru na lo ndu gbogbo ti kuâ ni (Luc 7:13, 14). Ye so lo sara so nga na fason so lo sara na ye ni asara si azo kue aluti. Peut-être azo ni ayeke hunda lani tere ti ala atene: ‘Koli so aye ti tene nyen la? Nyen la lo ye ti sara so?’

Me ka ti azo so ayeke sara lani voyage legeoko na Jésus, so abâ Jésus awe na savango akobela ti azo, ala pensé ti ala nyen? Âmanke ala de ti bâ lo lâ oko tongaso na zingongo mbeni zo na kuâ ape. Atâa so ândö, a zingo ambeni zo na kuâ awe so, eskê Jésus apeut ti sara mara ni? (1 aGbia 17:17-23; 2 aGbia 4:32-37). Jésus angbâ atene: “Maseka-koli, mbi tene na mo: Londo!” (Luc 7:14). Na a yeke ye so asi la. Koli ni alondo lo duti na lo komanse ti sara tënë! Jésus amû lo na mama ti lo. Mama ni ayeke na ngia atâa so li ti lo akpe kue ti bâ ye ni so. Fadeso, mama ni ayeke gi lo oko encore ape.

Na ngoi so azo abâ so molenge-koli ni azingo na kuâ awe, ala mû gonda na Jéhovah, Zo so amû fini na azo. Ala tene: “Mbeni kota prophète abâ gigi na popo ti e.” Ti ambeni, ala gbu nda ti miracle so Jésus asara, ni la ala tene: “Nzapa abi lê ti lo na mbage ti azo ti lo.” (Luc 7:16). Hio, sango ti ye ni so asi so amû yâ ti akodro kue so angoro gbata ti Naïn, a si même juska na Nazareth, kodro so Jésus akono dä, so ayo kilomètre 10 na kodro ni so. Sango ni so asi nga na mbage ti sud kâ na Judée.

Na oko ngoi ni, Jean Baptiste angbâ na da ti kanga, na lo yeke na nzara ti hinga ye mingi na ndo ti aye so Jésus asara. Adisciple ti Jean ni asara tënë ti amiracle ni so kue na lo. Me Jean atene ti lo nyen na ndo ni?