Akxni mapaksanita kskujni xapuxku soldado, Jesús taxtu kCapernaúm chu an kNaín, nema wi 30 kilómetros xlimakgat. Pero ni xʼakstu ama, akxtum kataʼan xtamakgalhtawakgen chu amakgapitsi latamanin. Akxni talakatsuwimakgolha kNaín, max akxni tsukumaja tsiswan, katatanokglhkgo lhuwa judíos tiku linkgo chatum nin. Limakgo kgawasa xlakata namaknukgo kxtankilhtin kachikin.

Xtse kgawasa lu lipuwama. Nialhti xchixku chu nilh xachastum xkgawasa nema xkgalhi. Maski xchixku nilh, xwijku xkgawasa tiku lu xpaxki chu max lu tlan xtalalin. Pero xlakata la uku ninit, nialh kgalhi akgtum takgalhkgalhin chu lakpuwan pi ni anan tiku nakuentajtlawa alistalh. ¿Tiku nakuentajtlawa chu namakgtaya?

Akxni Jesús akxilha xtakatsanajwat chu xtalipuwan uma puskat, lu nitlan limakgkatsi. Tsatata tachuwinan, tlan mamakgkatsini chu wani: «Nialh katasa». Pero ni kaj chuna wani. Talakatsuwi niku wi nin chu xama, o tokglha (Lucas 7:13, 14). Chuna la tachuwinan puskat chu tuku tlawa kaks kamalakawani tiku tasamakgo xlakata ninit kgawasa chu tachokgokgo. Lhuwa tiku katsiputunkgo tuku xlakata chuna wan Jesús chu tuku natlawa.

¿Chu tuku lakpuwankgo tiku taʼamakgo Jesús? Xlakan akxilhkgonit la kamapaksanit lhuwa tiku tatatlakgo. Pero nikxni akxilhkgonit pi wi tiku malakastakwaninit. Katsikgo pi makgasa makgapitsi lakastakwanankgolh, pero ¿tlan malakastakwani Jesús tiku ninit? (1 Reyes 17:17-23; 2 Reyes 4:32-37). Jesús wan: «¡Kgawasa, akit kwaniyan, kataki!» (Lucas 7:14). Akxni chuna wan, kgawasa tawila chu tsuku chuwinan. Alistalh, Jesús makamaxki xtse, tiku chuntiya kaks lilakawan. Puskat makgkatsi lanka tapaxuwan. Nialh xʼakstu katitamakgxtakgli.

Akxni latamanin akxilhkgo pi kgawasa staknan, malankikgo Jehová, xMakilhtsukina latamat.  Makgapitsi wankgo: «Chatum lanka palakachuwina tasiyanit kkilakgstipankan». Amakgapitsin akxilhkgo pi tuku lanit lu xlakaskinka chu wankgo: «Dios lakgalhamanit xkachikin» (Lucas 7:16). Tamakatsin xlakata tuku lanit katsikgokan kputuminika uma kachikin chu asta kNazaret, niku stakli Jesús, nema wi 10 kilómetros xlimakgat. Asta kJudea katsikan tuku lanit.

Juan Mununa, tiku wijku kpulachin, lu katsiputun tuku tlawama Jesús. ¿Tuku tlawa akxni xtamakgalhtawakgen litachuwinankgo umakgolh milagros?