I muri iho i to Iesu faaoraraa i te maˈi o te tavini a te raatira faehau, faarue ihora oia i Kaperenaumi no te haere e 32 kilometera i te pae apatoa tooa o te râ i te oire o Naina. E ere o ˈna anaˈe, ua apee atoa mai ta ˈna mau pǐpǐ e te hoê nahoa. E au ra e i te ahiahi to ratou tapiriraa ˈtu i Naina. Farerei aˈera ratou e rave rahi ati Iuda o te haere ra i te hoê hunaraa. Te amohia ra te tino pohe o te hoê taurearea i rapae i te oire no te hunaraa.

E oto rahi to te metua vahine o te taurearea. E vahine ivi oia, e no pohe noa iho nei ta ˈna anaˈe tamaiti. I te poheraa ta ˈna tane, te vai ra â ta ˈna tamaiti here ia ˈna ra. Mea piri roa ïa raua, ua tiaturi hoi oia i ta ˈna tamaiti no te haapao ia ˈna. Ua pohe atoa râ oia. O vai atura ïa te faaea i pihai iho ia ˈna e te aupuru atu?

I te iteraa Iesu i te oto rahi o taua vahine ra e to ˈna peapea, putapû roa ihora to ˈna aau. Ma te mahanahana e te tiaturi papu, na ô atura oia ia ˈna: “Eiaha e taˈi faahou.” Tapiri atura oia e tapea ˈtura i te roˈi to nia iho te tino pohe. (Luka 7:13, 14) No to ˈna huru e ta ˈna raveraa, tia noa ihora to te oire e oto ra. ‘Eaha oia i na reira ˈi i te parau, e eaha ta ˈna e rave?’ ta e rave rahi paha i manaˈo.

E te feia ïa e ratere ra e o Iesu tei ite ia ˈna ia faatupu i te mau ohipa mana a faaora ˈi e rave rahi maˈi? E au ra e aita ratou i ite aˈenei ia Iesu ia faatia mai i te hoê taata pohe. Noa ˈtu ua tupu te tahi mau tia-faahou-raa i tahito ra, e nehenehe anei Iesu e na reira? (Te mau arii 1, 17:17-23; Te mau arii 2, 4:32-37) Faaue atura Iesu: “Taurearea, te parau atu nei au ia oe: A tia mai!” (Luka 7:14) Tia maira iho â te taurearea e haamata ˈtura i te paraparau! Tuu atura Iesu ia ˈna i to ˈna metua vahine ra tei maere roa e tei oaoa roa râ. E ere faahou ïa o ˈna anaˈe.

I te iteraa te taata e te ora mau ra te taurearea, faahanahana ˈtura ratou ia Iehova te Tumu  o te ora, e na ô aˈera vetahi: “Ua tia mai te hoê peropheta rahi i rotopu ia tatou.” Ua taa i te tahi atu te auraa o ta Iesu ohipa faahiahia i rave a na ô ai: “Ua haamanaˈo mai te Atua i to ˈna nunaa.” (Luka 7:16) Atutu atura teie parau faahiahia ati aˈe taua fenua ra. E au ra e ua tae roa teie parau i Nazareta te oire o Iesu 10 kilometera i te atea, e tae roa i te pae apatoa i Iudea.

Tei roto noa â Ioane Bapetizo i te fare tapearaa, e mea anaanatae roa na ˈna ta Iesu e nehenehe e faatupu. Faatia ˈtura ta ˈna mau pǐpǐ ia ˈna i teie mau semeio. Ua aha ˈtura oia?