KAPITE 37
Neʼe Fakatuʼuake e Sesu Te Tama ʼa Te Fafine Vitua
-
HE FAKATUʼUAKE ʼI NAINI
Hili pe te fakamalolo e Sesu ia te tagata faifekau ʼa te pule solia, neʼe mavae ʼi Kapenaume ʼo alu ki Naini, ko te kolo neʼe tuʼu ʼi te potu saute uesite ia kilometa ʼe 32. Neʼe mole ko ia tokotahi pe. Neʼe kaugā fagona mo ia ʼana tisipulo pea mo te hahaʼi tokolahi. Neʼe lagi natou fakaovi atu ki te huʼaga ʼo te kolo ʼi te kua afiafi. Neʼe natou felaveʼi ai mo te hahaʼi tokolahi ʼo Sutea, neʼe natou faiʼavaifo tanatou mate. Neʼe natou fata te sino ʼo he tama, ʼo natou ʼave ki te tuʼa kolo ki te faitoka.
ʼI te hahaʼi ʼaia, neʼe ko te faʼe ʼa te tama ʼae neʼe lahi age tona lotomamahi. Neʼe ko he fafine vitua, pea neʼe ko tana tama ʼulu tokotahi ʼaeni kua mate. ʼI te mate ʼo tona ʼohoana, neʼe kei nofo pe tana tama ʼofaina mo ia. Fakakaukauʼi age muʼa te kua malohi age ʼo tanā felogoʼi. Pea neʼe toe liliu foki tana tama ko hona falalaʼaga ki te ka haʼu. Kaʼe kua toe mate foki mo ia. Ko ai leva ʼae ka nofo mo ia ʼo tokoni ki ai?
ʼI te sio ʼa Sesu ki te fafine, neʼe malave ki tona loto ia te lahi ʼo tona lotomamahi pea mo te aluʼaga fakaʼofaʼofa ʼae neʼe tau mo ia. Neʼe ina ui fenei age ki ai: “Tuku tau tagi.” ʼE mahino ia, neʼe logoʼi e te fafine ʼi te leʼo ʼo Sesu tona manavaʼofa pea neʼe ina maʼu ai hona fimalie. Kaʼe neʼe mole gata ai. Neʼe fakaovi ia Sesu ʼo fa ki te fata. (Luka 7:13, 14) Neʼe tokagaʼi e te hahaʼi tana aga pea mo te meʼa ʼae neʼe ina fai, ʼo natou tutuʼu ai. Neʼe lagi feʼekeʼaki fenei e te tokolahi: ‘Kotea koa te fakaʼuhiga ʼo ʼana palalau, pea kotea ʼae ka ina fai anai?’
Pea ʼe feafeaʼi kia natou ʼae neʼe kaugā fagona mo Sesu, ʼae neʼe natou sisio ki tana fakahoko he ʼu gaue fakaofoofo, ʼo ina fakamalolo te hahaʼi tokolahi neʼe mahahaki? Neʼe lagi heʼeki natou sisio ki te fakatuʼuake e Sesu he tahi neʼe kua mate. Logo la neʼe hoko he ʼu fakatuʼuake ʼi te temi muʼa, kaʼe neʼe feala koa ke fai e Sesu he meʼa feia? (1 Hau 17:17-23; 2 Hau 4:32-37) Neʼe fakatotonu fenei e Sesu: “Tupulaga, ʼe au ui atu, tuʼu ake!” (Luka 7:14) Pea neʼe hoko te faʼahi ʼaia. Neʼe mafuta ake te tama ʼo kamata palalau. Neʼe tuku age e Sesu te tama ki tana faʼe ʼae neʼe punamaʼuli ʼi te meʼa ʼae neʼe hoko. Neʼe ko te toe fiafia ʼaupito ʼaia. Neʼe mole kei nofo tokotahi leva.
Luka 7:16) Neʼe mafola fakavilivili te logo ʼi te ʼu tafaʼaki fuli ʼo ʼuhiga mo te meʼa fakapunamaʼuli ʼaia neʼe hoko, ʼo lagi kaku ki Nasaleti, te kolo ʼae neʼe lahilahi ake ai Sesu, ʼae ʼe tuʼu ia kilometa ʼe 10. Pea neʼe kaku te logo ʼaia ki te koga fenua ʼo Sutea, ʼi te potu saute.
ʼI te sisio ʼa te hahaʼi ki te kua maʼuli ʼa te tama, neʼe natou fakavikiviki kia Sehova, ʼae ʼe Ina foaki ia te maʼuli, ʼo natou ui fenei: “Kua tupu ia tatou he polofeta lahi.” Neʼe mahino ʼihi ki te fakaʼuhiga ʼo te gaue fakaofoofo ʼae neʼe fai e Sesu, ʼo natou ui fenei: “Kua tokagaʼi e te ʼAtua tana hahaʼi.” (Neʼe kei pilisoni pe ia Soane Patita, pea neʼe ina fia iloʼi te ʼu gaue ʼae neʼe fakahoko e Sesu. Neʼe fakamatala age kia Soane e ʼana tisipulo te ʼu milakulo ʼaia. Neʼe feafeaʼi tona loto?