Akusa bo Jean Baptiste a keya mimbôk den a nto bebé ngumba mbu, a wô’ô beta be mame Yésus a bo. Tame simesan avale Jean a ne mevak éyoñe beyé’é bé ba kate nye na, Yésus a nga wômôlô mone nkuse minga e Naïn. Éyoñe ji, Jean a yi na Yésus émien a kate nye atinane ya mame mete mese. Nde ñhe, Jean a loene beyé’é bé bebaé. Na be zu bo jé? Na be ke sili Yésus na: “Ye wo ô ne nyô a yiane zu, ye bi yange mfe?”​—Luc 7:19, Mfefé Nkôñelan.

Ye nsili ôte wo yené aval étam? Jean a ne môt a bili ngule mbunan, nyô a nga yene nsisime Zambe ô sisi’i be Yésus éyoñ a nga du nye den a nto bebé mimbu mibaé, a wô’ô fe tyiñe Zambe. Bi nji bi amu éziñe ya simesane na mbunane Jean ô nga tek. Nge sa nalé, Yésus a nji ke ye kobô mvo’é a lat a Jean, aval a bo éyoñ éte ébien. Ve nge Jean a nji bi bisô nlem, amu jé a sili Yésus avale nsili ete?

Éko éziñe Jean a yi fo’o ve na Yésus émien a kate nye na nnye a ne Messie. Jam ete d’aye ve Jean ngule nyul amu a tele minju’ été nda mimbôk. Nsili Jean ô bili fe nsôñan ôfe. A yeme na minkulane mejô ya Bible mia liti na Ñwo’one Zambe wo yiane bo njôô a nkôté bôt. Ve da, mvus abui bengon, éyoñe Yésus a nyoñeya mbaptizô, Jean a ne mimbôk. Amu nalé, Jean a kômbô yeme nge môte mfe a zu, nyi a ye ke ésaé Yésus ôsu, nnye ate a ye sondô tôé mame mese be nga jô na Messie a ye bo.

A lôte na a yalane beyé’é be Jean tyi’ibi na, ‘Ôwé ma me ne Nyi a yiane zu,’ Yésus a ve be ndeme ya na nsisime Zambe ô ne be nye éyoñ a saé abui bôt e bili akone mevale meval. Éyoñ éte a jô beyé’é na: “Kelan mi ake, mi ke kate Jean mam mi awôk a yen: mindindim mi ayen, miñyeyem mi awulu, minzezam mi abo mvo’é, mindôndo’o mi awôk, mimbim mi awômô, minzôzoé mi awô’ô mbamba foé.”​—Matthieu 11:4, 5.

Nsili Jean a sili ô ne tinane na, a yange na Yésus a bo mam a lôt abim a bo le, éko éziñ na a vaa fe nye mimbôk. Yésus a viane kate Jean na a bo teke yange mame ma dañe mesimba a bo éyoñ éte.

Éyoñe beyé’é be Jean ba bulan, Yésus a kate bôte bese be ne valé na Jean a nji bo ve zezé nkulu mejô. A ne “nlômane” Yéhôva ya nkulan ajô bia koone wô Malachie 3:1. Nye fe a ne nkulu mejô Élie, aval ane é ne njô’ane Malachie 4:5, 6. Yésus a timine na: “Me ajô fo’o mia na, Bôt binga be nga biaé, môt a dañe Jean Baptiste a nji bialé: ve [Éjôé] ya yôp, nyô a ne mongô a dañe nye.”​—Matthieu 11:11.

Éyoñ a jô na nyô a dañe tyôtyoé Éjôé ya yôp a dañe Jean, Yésus a liti na Jean a ye ke tabe Éjôé ya yôp. Jean a nga kôme Yésus zen, ve a nga wu ôsusua na Krist a yoé zene ya ke nyiñe yôp. (Behébreu 10:19, 20) Akusa bo nalé, Jean a ne nkulu mejô a nga wulu ba’aba’a a Zambe, a ne fe wua ya bôte ba ye tabe Éjôé Zambe si.