Yesu ngɛ bu nɛ mi kuɔ kɛ ha Yohane Nɔ Baptisilɔ ɔ, se kɛ nihi fuu buu Yohane kɛɛ? Yesu de ke: ‘Yi nɔ nɛ ɔ ngɛ kaa jokuɛwi nɛ a hii si ngɛ jua nɔ, nɛ a ngɛ a juami bi dee ke: “Wa kpa bɛ ha nyɛ, se nyɛ dui; wa nya awe, se nyɛ yi kɔmɔ.”’​—Mateo 11:16, 17.

Mɛni nɛ Yesu ngɛ tsɔɔe? E tsɔɔ nya ke: “Benɛ Yohane ba a, e yi ní, nɛ e nui nɔ́ ko hulɔ. Se nɔ́ nɛ nihi tsuo de ngɛ e he ji, ‘Mumi yayami ngɛ e mi!’ Benɛ Nɔmlɔ Bi ɔ ba a, lɛɛ e yeɔ ní, nɛ e nuɔ wai. Nɛ nɔ́ nɛ nihi deɔ ji, ‘Hyɛ, jiklɔɔtsɛ, kɛ da nulɔ; tó tsuli kɛ yayami peeli a huɛ ɔ ji nɛ ɔ nɛ!’” (Mateo 11:18, 19) Enɛ ɔ tsɔɔ kaa Yohane pee e si himi kpokploo kaa bɔ nɛ nihi nɛ a kã Nazir kita a peeɔ ɔ, nɛ e nui dã, se nihi ke mumi yayami ngɛ e mi. (4 Mose 6:2, 3; Luka 1:15) Se Yesu lɛɛ e pee we kaa Yohane. E ye ní, nɛ e nu ní bɔ nɛ sa, se a ke jiklɔɔtsɛ kɛ da tɔlɔ ji lɛ. Ngɛ anɔkuale mi ɔ, nɔ́ ko be nɛ saa ni ɔmɛ a hɛ mi.

Yesu ngɔ yi nɔ nɛ ɔ kɛ to jokuɛwi nɛ a hii si ngɛ jua nɔ nɛ a juami bi ngɛ bɛ kpaa ha mɛ, se a dui, nɛ a ngɛ awe nyae se a yi kɔmɔ ɔ a he. E de hu ke: “Mawu nile ɔ lɛɛ níhi nɛ e tsuɔ ɔ, lɔ ɔmɛ a kɛ woɔ lɛ nguɔ.” (Mateo 11:16, 19) Ngɛ anɔkuale mi ɔ, ‘ní tsumi ɔmɛ,’ nɛ ji níhi nɛ Yohane kɛ Yesu a tsu ɔ yeɔ odase kaa munyuhi nɛ ni ɔmɛ ngɛ tue ngɛ a he ɔ ji lakpa.

Benɛ Yesu kale jamɛ a yi nɔ bi ɔmɛ kaa a tsui kplii se ɔ, e kã Korazin, Betsaida, kɛ Kapernaum nɛ a ji mahi nɛ e pee nyakpɛ níhi fuu ngɛ a mi ɔ hɛ mi. Yesu tsɔɔ kaa ke e pee nyakpɛ ní nɛ ɔmɛ ngɛ Tiro kɛ Sidon ɔ, jinɛ nihi nɛ a ngɛ jamɛ a ma amɛ a mi ɔ ko tsake. E tu Kapernaum ma nɛ e hi mi bɔɔ ɔ hu he munyu. Lejɛ ɔ hu nihi tsakee we a tsui. Yesu de ngɛ Kapernaum ma a he ke: “I ngɛ mo dee ke kojomi ligbi ɔ, Mawu maa na Sodom mɔbɔ kulaa pe mo.”​—Mateo 11:24.

Lɔ ɔ se ɔ, Yesu je e Tsɛ ɔ yi kaa e ngɔ kikɛmɛ a anɔkuale nɛ ɔ kɛ laa “ní leli kɛ ga leli” nɛ e je kpo kɛ tsɔɔ nihi nɛ a he jɔ kaa jokuɛwi. (Mateo 11:25) E de jamɛatsɛmɛ ke: “Nyɛ nihi tsuo nɛ nyɛ tloo tlomi nɛ pɔ tɔ nyɛ, nyɛɛ ba ye ngɔ, nɛ ma ha nɛ nyɛɛ jɔɔ nyɛ he. Nyɛɛ ngɔ ye kuɛpã tso ɔ ngɔ tloo, nɛ nyɛɛ kase mi; ejakaa ye he jɔ, nɛ i baa ye he si kɛ jee ye tsui mi. Ke nyɛ pee jã a, nyɛ ma ná he jɔmi; ejakaa ye kuɛpã tso ɔ tloomi wɛ, nɛ ye tlomi ɔ hu jiɔ we.”​—Mateo 11:28-30.

Mɛni blɔ nɔ Yesu maa gu kɛ ha nɛ nihi a he mi nɛ jɔ mɛ? Jami hɛ mi nyɛɛli ɔmɛ a ngɔ a blema kusumi ɔmɛ kɛ wo mlaahi fuu nɛ ekomɛ kɔɔ Hejɔɔmi ligbi ɔ he, nɛ a kɛ fĩ ni ɔmɛ. Se Yesu tsɔɔ we mɛ blema kusumihi, mohu ɔ, e tsɔɔ mɛ Mawu he anɔkualehi nɛ ma ha nɛ a he mi maa jɔ mɛ. E tsɔɔ nihi nɛ ma kudɔmi sanehi ha nɛ a tsui kuɔ ɔ níhi nɛ maa wo a bua, nɛ e wo nihi nɛ yayami ha nɛ a kɔni mi jɔ̃ ɔ hu a bua. Yesu tsɔɔ mɛ nɔ́ nɛ e sa kaa a pee konɛ a ngɔ a he yayamihi kɛ pa mɛ, kɛ nɔ́ nɛ e sa kaa a pee nɛ a kɛ dla a kɛ Mawu a kpɛti.

Nɔ tsuaa nɔ nɛ maa kplɛɛ Yesu nine fɔmi ɔ nɔ ɔ ma nyɛ maa jɔɔ e he nɔ kɛ ha Mawu konɛ e sɔmɔ wa hiɔwe Tsɛ nɛ e naa nɔ mɔbɔ nɛ e mi mi jɔ ɔ. Jã nɛ wa maa pee ɔ pi tloomi, ejakaa Mawu mlaa amɛ a nɔ yemi wɛ kulaa.​—1 Yohane 5:3.