Yesu wanemekele bingi Yoano Mubatizhi. Nga bantu bavula bamumonanga byepi Yoano? Yesu waambile’mba kino kisemi “kiji nobe baana ba bacheche baji pa kisankanyi na kubijika bakwabo, amba: ‘Twaji kwimwimbila mumpempe, pakuba anweba kechi mwaji kuzha ne; twaji kujila mabingo, bino anweba kechi mwaji kumvwa bulanda ne.’”—Mateo 11:16, 17.

Yesu watazhizhe mu ka pa kwamba bino? Walumbululwile’mba: “Yoano naye byo aishile kechi wajanga nangwa kutoma ne, bino bantu bamwambijilenga’mba, ‘Uji na ndemona.’ Mwana muntu waishile na kuja ne kutoma, bino bantu bamwambila’mba, ‘Talai! Uno muntu kiji kabiji kitomi, mulunda wa basonkeshi ne bandengamambo.’” (Mateo 11:18, 19) Yoano waikele bwikalo bwapeela mambo wajinga Munazili, kechi watomanga binyu ne, bino kino kisemi kyaambilenga’mba uji na ndemona. (Kubala 6:2, 3; Luka 1:15) Yesu aye waikelengatu byonka bikala bantu bonse. Wajanga ne kutoma byaesakana, bino bantu bamunenenga’mba kiji kabiji kitomi. Kine, kyakatazha bingi kutokesha bantu ku muchima.

Yesu waesakenye kino kisemi ku “baana ba bacheche baji pa kisankanyi” bakana kuzha umvwe bakwabo bebembila mumpempe, nangwa kumvwa bulanda umvwe bakwabo babena kujila mabingo. Yesu waambile’mba: “Pano bino, maana amwekela mu bintu byaoloka byuba muntu.” (Mateo 11:16, 19) Kya kine, “bintu byaoloka” byaubile Yoano ne Yesu bimwesha kuba’mba mambo o bebapelengamo ajinga a bubela.

Panyuma ya kwamba’mba bantu ba mu kyokya kisemi kechi balapilanga ne, Yesu watongwelepo mizhi isatu yo afingile, ko kuba’mba muzhi wa Kolazeni, Beteseda ne Kapenama mo aubijile mingilo ya kukumya. Yesu waambile’mba umvwe waubile ino mingilo mu mizhi ya Tila ne Shidona ya mu Fenesya, bantu mu ino mizhi umvwe balapijile. Waambile ne pa muzhi wa Kapenama mo aingijilenga mwingilo wanji. Ne mu yewa muzhi, bantu kechi balapijile ne. Yesu waambile’mba: “Lukabisho lwa muzhi wa Sodoma lukakepa bingi kukila lwenu mu Juba ja Kije.”—Mateo 11:24.

Kabiji Yesu watumbijikile Shanji wa mwiulu mambo aye ufya bukine bwanema “ku ba maana ne ba milangwe” ne kwibusolola ku bantu bepelula nobe baana ba bacheche. (Mateo 11:25) Yesu waichile bantu na byambo byawama bya kuba’mba: “Iyai ko nji, anweba bonse bakooka ne kunemenwa, ne amiwa nkemukokolosha. Sendai kikonkoji kyami ne kufunda kwi amiwa, mambo nekimote kabiji nakooka muchima, ne anweba mukakokoloka. Mambo kikonkoji kyami kyapeela, ne kipe kyami kyapeela.”—Mateo 11:28-30.

Yesu wakokolweshe byepi bantu? Bantangi ba bupopweshi bamanyikanga bantu na bisho ne mizhilo yalengelanga bantu kwikala nobe bazha, nabiji kukosesha bingi mizhilo ya Sabado. Bino Yesu wakokolweshe bantu kupichila mu kwibafunjisha bukine bwa Lesa, mwabula bisho bya bupopweshi. Wamwesheshe ne jishinda ja kukokolokelamo ku boba bamanaminenga na mambo a bakalama ba mu kafulumende ne ku boba bezhachishanga abo bene na mambo a bundengamambo. Yesu wasolwejile bano bantu byo bakonsheshe kulekelwa mambo abo ne kwikala mu mutende na Lesa.

Aba basenda kikonkoji kyapeela kya kwa Yesu bakonsha kwipana kwi Lesa ne kumwingijila aye Shetu wa mwiulu wa lusa kabiji wa kifyele. Kwipana kwi Lesa kechi kuji nobe kwitwika kisendwa kyanema ne, mambo mizhilo ya Lesa kechi yakatazha ne.—1 Yoano 5:3.