Yesu wamulemesheli nankashi Yowanu Mpapatishi, komana antu amulemesha Yowanu? Yesu nahoshi nindi: “Idi ikiñu . . . didi neyi anyana anyanya anashakami hayisankanu anakubidika akwawu mwahemenañawu, nawu: ‘Twayimbila mapeleli, ilaña enu mwahañana wanyi; twadila makumbu, ilaña enu mwadishona wanyi.’”—Matewu 11:16, 17.

Yesu natalishi mudihi? Nalumbululi munatalishiyi nindi: “Yowanu wenjili iku nakuda wanyi hela kunwa ilaña antu ahoshaña nawu, ‘Wudi nandemoni.’ Mwana kamuntu wenjili iku nakuda nikunwa, ilaña antu ahoshaña nawu, ‘Talenu! Muntu wafwa hakuda nawa wanwaña vinyu, ibwambu dawakakutambula nyisonku niakanshidi.’” (Matewu 11:18, 19) Yowanu niyena washakamineña chihandilu chapela neyi kaNaziri, wanwineña wanyi walwa, ilaña idi ikiñu dinakumutena nawu wudi nandemoni. (Kuchinda 6:2, 3; Luka 1:15) Yesu niyena washakamaña neyi antu ejima. Wadaña nikunwa nakwesekeja, ilaña anakumwila nawu wanwaña nankashi. Chakala nankashi kutiyisha antu kuwaha.

Yesu nesekeji idi ikiñu nawanyana anyanya adi hachisankanu anakukaana kuhañana iku akwawu atwansi anakuyimbila ipeleli hela kudila iku akwawu anakukaluka nyitetu. Nahoshi nindi: “Chochimu, maana amwekenaña kuloña munyidimu yawu.” (Matewu 11:16, 19) Eña, ‘nyidimu’ yazatileña Yowanu niYesu yamwekesheleña nawu ayitwambilileña.

Hanyima yakwila Yesu nateni dehi idi ikiñu nindi hidabalumukañaku, nateni yihuñu yikamwekena nyisumba yaKorazini, Betisayida niKaperinamu kwazatililiyi nyidimu yañovu. Yesu nahoshi nindi neyi wazatili iyi nyidimu yamuchidiwu munyisumba yaFwenisiya, Tira niSidoni, iyi nyisumba yadi kubalumuka. Nateni cheñi Kaperinamu, wadiña mukala windi. Nimwena antu amavulu abalumukili wanyi. Yesu nahoshi hadi iwu musumba nindi: “Hefuku daKusompesha, chakayikalila nankashi enu kubadika ituña daSodoma.”—Matewu 11:24.

Yesu namuhameki Tata yindi, wunajindi chalala kudi “akamaana niantu adiza,” ilaña nachisololi kudi antu adizoza adi neyi anyana anyanya. (Matewu 11:25) Dichi nakutambika antu adi neyi awa, nindi: “Inzenu kudi ami, enu ejima munakukabakana nawa munasendi yiteli yalema, nawa ami nukuyinookesha. Sendenu mpaanda yami nawa dizilenu kudi ami, muloña ami hinazuwaña swayiku, nadizoza mumuchima nawa mukunooka. Muloña mpaanda yami yapela kusenda nawa chiteli chami chapepela.”—Matewu 11:28-30.

Yesu wayinookeshaña ñahi antu? Akulumpi jakwitiya ayinka antu muwuduñu natushidikilu twawu, chidi neyi kukolesha nankashi nshimbi yaSabata. Ilaña Yesu nakuyinookesha kuhitila mukuyitañisha chalala chaNzambi, kwikala asubuka kunitu tushidikilu. Cheñi nakuyamwina antu abaluka nyichima muloña wakuyikabisha kudi akamatuña akweti wuswa, nawa anakuneña muloña wanshidi. Yesu nakuyileja chinateli kuyanakenawu nshidi jawu nichinateli kwikalawu mukuwunda naNzambi.

Ejima akwiteja mpanda yaYesu atela kudihana kudi Nzambi nikumukalakela Tata yetu wukweti wushona niluwi. Kwila mwenimu kwakala wanyi, muloña nshimbi jaNzambi jakala wanyi.—1 Yowanu 5:3.