Jesu anoreremeja maningi Johani Mubhabhatiji. Asi vandhu vanomuvona kudini? Jesu wakati: ‘Bvumbo [kana mubarihwana uwu] . . . unoezana no vana vanogara pakati po makwanja, vecimimira vadoni vavo kuti: “Tamurijira munyere, asi amuzivi kutamba. Tamuimbira ndumbo yo rufu amuzivi kucema.”’—Mateu 11:16, 17.

Jesu anoda kunangenyi ngo masoko aya? Iyena anodurujira kuti: “Waza Johani acikahi no kumwa, ivona vanoti: ‘Ano cirombo.’ Waza Mwana wo mundhu anoha no kumwa, ivona vanonanga kuti: ‘Nga uu muhisi no mumwisi, xamwari yo vaxabisi no vaxatisi.’” (Mateu 11:18, 19) Johani ano upenyu hwakareruka inga mu Naziri zve aamwi vhinyu. Asi bvumbo kana kuti mubarihwana uwu unonanga kuti iyena i cirombo. (Bziverengo 6:2, 3; Luka 1:15) Ngo divi rimweni Jesu anorarama inga zvinoita vandhu vese. Wakaezanana pa kuha no kumwa, asi ari kupumbhwa kuti anonyanyisa. Zvinoita inga zvinonesa kudakajisa vandhu.

Jesu anoezanisa mubarihwana uwu inga vana vakagara mu bazari, vanoramba kutamba vamweni vavo pavanonga vecirija munyere, kana kuti inga vana vacikanyangajwi vamweni vavo pavanonga vecicema. Iyena wakati: “Kaveta uzivi hunozivika ngo maitiro ahwo.” (Mateu 11:16, 19) Ngo kudaro, “maitiro,” kana kuti zvinoithwa ndi Johani na Jesu, zvinovonesa kuti zvavari kupumbhwaro ngo zvo kunyepa.

Pasure po kunanga kuti mubarihwana uwu aupurutani, Jesu wakatuka dhorobha ro Korazini, Bhetsaidha no ro Kafarnaume kwakaitiraya mabasa anoshamisa. Iyena anonanga kuti, kudari naakaita hake mabasa aya ku madhorobha o Finisia yo Tiro no ro Sidhoni, iwona aizokhauya. Asi ku Kafarnaume kwaicira muji wo basa rake mukati mo mukuvo wakati kuti, vandhu vazinji avatendi kupurutana. Jesu wonanga kudari ngo pamusoro po dhorobha iri: “Mu njiku yo kutongwa, Sodoma inozova no utambujwi hwakareruka kupinda hwako.”—Mateu 11:24.

Jesu wokuja Baba vake ngo kufisa cokwadi inosisira yo kumujimu “ku vazivi no ku vangwari,” asi woizivisa vanojidodokesa, votojana no vadoko. (Mateu 11:25) Iyena anovakoka no mwoyo wese eciti: “Izanyi kondiri mwese makaremba, munoremehwa kukuru. Inini ndinozomuzoroja. Thwaranyi kanga yangu. Jijanyi ndini. Ngokuti ndini wakapfava no wokuthiva mwoyo, ngokudaro munozowana kuzorora mu mwiha menyu. Ngokuti kanga yangu yakapfava, muthwaro wangu wakareruka.”—Mateu 11:28-30.

Jesu anozorojesa kudini vandhu? Vatungamiriri vo zviara vanoremesa vandhu ngo mutango-mutango jo zvirovejeso zvavo, zvakadari inga kurambisa zviro zvakawanda maningi pa njiku yo Sabudu. Asi Jesu wovazoroja ngo kuvajijisa cokwadi ya Mwari, icikabatani no zvirovejeso zvakashata. Iyena anovonesavo kuti vayani vakavora mwoyo ngo vatongi vo nyika no vanoremehwa ngo zvishaishi, vangaitisa kudini kuti varerukihwe. Jesu wovajijisa kuti vangaitisa kudini kuti zvishaishi zvavo zviregerehwe zve vangaitisa kudini kuti vave no runyararo na Mwari.

Vese vanotendera mutoro wakareruka wa Jesu vangajipira kuna Mwari voshandira Baba wedu vo kudenga vanonyasha no usizi. Kuita izvi azvibataniji kuthwara mutoro unorema, ngo kuti zvinoda Mwari azvimboremi.—1 Johani 5:3.