Gintatahod gud ni Jesus hi Juan nga Parabaptis, pero ano an panhunahuna han kadam-an kan Juan? Hi Jesus nagsiring: ‘Ini nga henerasyon pariho hin kabataan nga nangangalingkod ha mga merkado ngan nagsisinggit ha ira mga kauyag, nga nasiring: “Nagplawta kami para ha iyo pero waray kamo sumayaw, nagnguyngoy kami pero waray kamo magpukpok han iyo dughan tungod ha kasubo.”’—Mateo 11:16, 17.

Ano an karuyag sidngon ni Jesus? Iya iginpatin-aw: “Kinanhi hi Juan nga diri nakaon o nainom, pero an mga tawo nasiring, ‘May demonyo hiya.’ An Anak han tawo kinanhi nga nakaon ngan nainom, pero an mga tawo nasiring la gihapon, ‘Kitaa! An tawo nga malamon ngan parainom hin bino, sangkay han mga parasukot hin buhis ngan magpakasasala.’” (Mateo 11:18, 19) Hi Juan nagkinabuhi hin simple sugad nga Nazareno, diri ngani hiya nainom hin bino, pero ini nga henerasyon nasiring nga may demonyo hiya. (Numeros 6:2, 3; Lucas 1:15) Ha luyo nga bahin, hi Jesus nagkinabuhi pariho han iba nga tawo. Diri hiya sobra kumaon ngan uminom, pero gin-akusaran hiya nga nagpapatakas. Baga hin imposible nga mapalipay an mga tawo.

Iginpariho ni Jesus ini nga henerasyon ha kabataan ha mga merkado nga nadiri pagsayaw kon an iba nga bata nagpaplawta o diri nasusubo kon nagngunguyngoy an iba. Hiya nagsiring: “Kondi an kinaadman napapamatud-an nga matadong pinaagi han mga buhat hito.” (Mateo 11:16, 19) Oo, an “mga buhat”—nga amo an ebidensya nga ginhimo nira Juan ngan Jesus—nagpapamatuod nga buwa an mga akusasyon ha ira.

Kahuman ihulagway ni Jesus ini nga henerasyon sugad nga matig-a an kasingkasing, iya ginsaway an katawohan ha mga syudad han Corasin, Betsaida, ngan Capernaum diin naghimo hiya hin mga milagro. Hi Jesus nagsiring nga kon ginhimo niya an sugad nga mga milagro ha Tiro ngan Sidon nga mga syudad han Fenicia, an katawohan hito nga mga syudad nagbasol na unta. Gin-unabi liwat niya an Capernaum, diin nag-ukoy hiya hin pipira ka panahon. Bisan didto, kadam-an an waray magbasol. May kalabotan hito nga syudad, hi Jesus nagsiring: “Ha Adlaw han Paghukom, mas makuri an sirot ha iyo kay ha Sodoma.”—Mateo 11:24.

Katapos, gindayaw ni Jesus an iya Amay, nga nagtago han presyoso nga mga kamatuoran “tikang ha mga maaramon ngan edukado” pero nagpahayag hito ha mga mapainubsanon, nga sugad hin kabataan. (Mateo 11:25) Gintagan niya hin makaruruyag nga imbitasyon an mga mapainubsanon: “Kadi kamo ha akon, kamo ngatanan nga kinakapoy ngan binubug-atan, kay papapahuwayon ko kamo. Pas-ana an akon yugo ngan mahibaro kamo tikang ha akon, kay ako malumo ngan mapainubsanon an kasingkasing, ngan makakapahuway an iyo mga kalag. Kay an akon yugo masayon pas-anon ngan an akon iginpapapas-an ha iyo magaan.”—Mateo 11:28-30.

Paonan-o hi Jesus nagtanyag hin kapahuwayan? Ginpapabug-atan han mga lider han relihiyon an mga tawo pinaagi han mga tradisyon nga nag-uuripon ha mga tawo, sugad han sobra kaistrikto nga mga surundon ha Sabbath. Pero ginpapahuway hira ni Jesus pinaagi ha pagtutdo han kamatuoran mahitungod ha Dios, nga waray maimpluwensyahi hito nga mga tradisyon. Iginpakita liwat niya an paagi basi maliaw adton nasasakit tungod han pagdominar han mga may awtoridad ha politika ngan adton nabubug-atan han sala. Oo, iginpahayag ni Jesus ha ira kon paonan-o mapapasaylo an ira mga sala ngan magkakaada mamurayawon nga relasyon ha Dios.

An ngatanan nga nakarawat han masayon pas-anon nga yugo ni Jesus mahimo magdidekar han ira kalugaringon ha Dios ngan mag-alagad ha mapinairon ngan maloloy-on nga Amay ha langit. Diri makuri an pagbuhat hini, tungod kay diri gud mabug-at an mga ginkikinahanglan han Dios.—1 Juan 5:3.