Sia mme owo ẹkerede n̄kpọ nsio nsio, mmọ ẹda se Jesus etịn̄de ye se enye anamde ke nsio nsio usụn̄. Se itịbede ke ufọk owo kiet ke Galilee anam ifiọk emi. Pharisee kiet emi ekerede Simon okot Jesus ufọk. Ekeme ndidi enye anam emi man enen̄ede ọdiọn̄ọ owo emi esinamde ikpọ utịben̄kpọ emi. Etie nte Jesus enyịme ndika ufọk esie sia ọfiọkde ke imekeme ndida ifet oro n̄kwọrọ ikọ, kpa nte enye esinamde ke ini mme ọbọ a-tax ye mme anamidiọk ẹkotde enye ufọk.

Edi owo idarake Jesus nte ẹsidarade esenowo. Usụn̄ Palestine etie obu obu, ndien emi esinam ntọn̄ ọyọhọ owo ukot, ikpaukot onyụn̄ anam ukot ofiop owo. Ntre ke ini esenowo edide ufọk owo, mme enyeneufọk ẹsida mmọn̄ ẹyet enye ukot. Edi idụhe eke eyetde Jesus ukot. Owo inyụn̄ itịmke enye inua ndiwụt ke ẹdara enye kpa nte ẹsinamde ye isenowo. Usụn̄ en̄wen emi ẹsidarade esenowo edi ndiyet enye aran ke ibuot. Owo inyụn̄ inamke emi inọ Jesus. Ndi emekere ke mme enyeneufọk oro ẹnen̄ede ẹnem esịt Jesus ndidi ufọk mmọ?

Kpukpru isenowo ẹda itie mmọ ẹnyụn̄ ẹtọn̄ọ ndidia udia. Nte mmọ ẹsụk ẹdiade n̄kpọ, n̄wan kiet emi owo mîkokotke asan̄a sụn̄sụn̄ odụk edi. ‘Ẹdiọn̄ọ enye ke obio nte anamidiọk.’ (Luke 7:37) Kpukpru nnyịn idi mme anamidiọk, edi etie nte n̄wan emi esidu ata oburobụt uwem, ekeme ndidi enye edi akpara. Anaedi enye ama okop ukpepn̄kpọ Jesus, onyụn̄ okop Jesus okotde ‘kpukpru mbon oro ẹbiomde ndodobi mbiomo ete ẹdibọ nduọkodudu.’ (Matthew 11:28, 29) Anaedi se Jesus eketịn̄de onyụn̄ anamde ama enen̄ede otụk enye, ntre enye enen̄ede oyom ndikụt Jesus.

N̄wan emi asan̄a editọn̄ọ edọn̄ ke ebiet emi Jesus enịmde ukot, atua eyet, ndien mmọn̄eyet esie ọduọhọ Jesus ke ukot, enye onyụn̄ ada idet esie ọkwọhọde. Enye ada inua etịm Jesus ukot onyụn̄ ada edifuọn̄ aran emi enye akakamade edi ọfiọn̄ọ Jesus ke ukot. Simon imaha se enye okụtde emi, ntre enye etịn̄ ke esịt esie ete: “Edieke owo emi ekpedide prọfet, enye ọkpọfiọk orụk owo oro n̄wan emi otụkde enye edide, ete enye edi anamidiọk.”—Luke 7:39.

Jesus ọfiọk se Simon ekerede, ntre enye ọdọhọ ete: “Simon, mmenyene se nyomde nditịn̄ nnọ fi.” Enye ọdọhọ ete: “Andikpep, tịn̄!” Jesus ọdọhọ enye ete: “Ọnọ ebuọt kiet ekenyene owo isọn iba; owo kiet akama enye denarius ikie ition, edi enye eken akama aba ye duop. Ke ini mmọ mînyeneke se ẹdade ẹsio isọn, enye efen mmọ mbiba ke ofụri esịt. Ke ntre, anie ke otu mmọ edima enye akan?” Simon ọbọrọ nte n̄kpọ eke ẹdọhọde ke ikọ oro ibeheke imọ, enye ọdọhọ ete: “N̄kere ke edi owo emi enye ekefende se ikponde ikan ke ofụri esịt.”—Luke 7:40-43.

Jesus enyịme ye enye. Ekem ọwọn̄ọde ese n̄wan oro onyụn̄ ọdọhọ Simon ete: “Omokụt n̄wan emi? N̄kodụk ufọk fo; afo unọhọ mi mmọn̄ ndida nyet ukot. Edi n̄wan emi ada mmọn̄eyet esie ebịt mi ukot onyụn̄ ada idet esie ọkwọhọde mi ukot. Afo utịmke mi inua; edi n̄wan emi, tọn̄ọ ke ini emi ndụkde ndi, itreke ndida inua ntịm mi ukot ima ima. Afo ukeyetke mi aran ke ibuot; edi n̄wan emi ada edifuọn̄ aran ọfiọn̄ọ mi ke ukot.” Jesus okụt ke n̄wan oro enen̄ede akabade esịt. Ntem Jesus ọdọhọ ete: “Ndọhọ fi nte, okposụkedi idiọkn̄kpọ esie ẹwakde, ẹmefen mmọ, koro ima esie okpon; edi owo eke ẹfende enye esisịt, enyene esisịt ima.”—Luke 7:44-47.

Se Jesus etịn̄de emi iwọrọke ke oburobụt uwem ọfọn. Edi akam owụt ke edieke owo anamde ikpọ idiọkn̄kpọ ekem akabade esịt onyụn̄ etiene Christ, ke Christ ayatua enye mbọm. Kere nte etiede n̄wan emi ke idem ke ini Jesus ọdọhọde enye ete: “Ẹmefen mme idiọkn̄kpọ fo. . . . Mbuọtidem fo anyan̄a fi; nyọn̄ ke emem.”—Luke 7:48, 50.