Andũ meew’a ndeto sya Yesũ na meko make meethĩawa na mawoni me kĩvathũkany’o kwosana na ũndũ ngoo syoo iilyĩ. Ũndũ ũsu nĩwoonekie nesa nthĩnĩ wa mũsyĩ ũmwe waĩ Kalilii. Mũvalisi ũmwe weetawa Simoni nĩwamũthokisye Yesũ kwake maĩsanĩe, na nĩvatonyeka akethĩwa endaa kũmanya maũndũ maingĩ ĩũlũ wa Yesũ nĩkwĩthĩwa nĩweew’ĩte ĩũlũ wa syama sya ũsengy’a ila weekaa. Yesũ nĩweetĩkĩlile na nĩvatonyeka akethĩwa oonie ũsu wĩ mwanya mũseo wa kũtavya ala mathoketw’e ũvoo mũseo, o tondũ weekĩte mavinda mavĩtu athokw’a nĩ aumĩthya ma koti na eki ma naĩ.

Ĩndĩ Yesũ ndaathokw’a nesa ũndũ aeni mathokaw’a ĩvindanĩ yĩu. Nũndũ wa kwĩthĩwa malelũ nthĩ ya Valestina meethĩawa na kĩtoo kingĩ, andũ mathi savalĩ ndaasa maaũ moo nĩmavyũvaa mũno na maithokoana, kwoou kyaĩ kĩthĩo kya andũ ma nthĩ ĩsu kũthambya aeni maaũ na kĩw’ũ kĩthithu. Yĩla Yesũ wavikie ndaaĩkwa maũndũ asu. O na mayaamũmumunya o tondũ meekaa ta nzĩa ya kũthokya aeni. Ũndũ ũngĩ meekaa nĩ kwĩtĩkĩsya mũeni mauta mũtwe mamwony’e me na vata mũno nake, ĩndĩ andũ asu mayaamwĩtĩkĩsya Yesũ mauta mũtwe. Kwoou, no twasye kana andũ asu mayaamũthokya Yesũ ũndũ aeni mathokaw’a.

Yĩla mambĩĩie kũya, ve mũndũ mũka walikile nyũmba atemũthokye. Mũndũ mũka ũsu nĩweesĩkĩe “ndũanĩ ĩsu ta mwĩki wa naĩ.” (Luka 7:37) Ithyonthe twĩ ene naĩ, na kwoou nĩtũvĩtasya, ĩndĩ mũndũ mũka ũsu aĩ na mwĩkalĩle mũthũku mũno, na nĩvatonyeka akethĩwa aĩ ĩlwaya. Nũtonya kwĩthĩwa eewie ĩũlũ wa momanyĩsyo ma Yesũ, ta yĩla Yesũ wathokisye ‘onthe ala manoete na maĩ na mĩio mĩito moke kwake nĩ kana amathũmũsye.’ (Mathayo 11:28, 29) Na kwoou, ndeto isu sya Yesũ na meko make, nitonya kwĩthĩwa nesyo syatumie mũndũ mũka ũsu enda kũmwona Yesũ.

Mũndũ mũka ũsu nĩwaendie vala ve Yesũ na atulya ndu maaũnĩ make. Nĩwambĩĩie kũĩa na etĩkĩsya methoi maaũnĩ ma Yesũ, na ĩndĩ avangũla methoi asu na nzwĩĩ sya mũtwe wake. Amina kwĩka ũu nĩwamumunyie maaũ ma Yesũ na ametĩkĩsya mauta me mũuke mũseo ala wakuĩte. Yĩla Simoni woonie ũu ndaaendeew’a na kwoou asya ũũ ngoonĩ yake: “Ta kethĩwa mũndũ ũũ kwa w’o nĩ mwathani, ethĩwa amanya mũndũ mũka ũũ ũkũmũkiita nũũ na nĩ wa mũthemba mwaũ, nũndũ nĩ mwĩki wa naĩ.”—Luka 7:39.

Yĩla Yesũ wamanyie maũndũ ala Simoni wasũanĩaa, amwĩie: “Simoni, nĩ na ũndũ ngwenda kũũtavya.” Nake asya: “Mũmanyĩsya, ndavye!” Yesũ aendeeie kũmwĩa atĩĩ: “Andũ elĩ nĩmataĩtwe nĩ mũndũ wakovethasya mbesa; ũmwe ataĩtwe ndinalĩ 500, ĩndĩ ũla ũngĩ ndinalĩ 50. Yĩla meethĩiwe mate na kĩndũ kya kũmũĩva, nĩwamaekeie elĩ na ngenda. Kwoou, nĩ wĩva katĩ woo wĩmwenda mũnango?” O na kau noĩthwa Simoni ateetĩkĩlanaa na ndeto sya Yesũ, asũngĩie asya: “No nasye nĩ ũla waekeiwe mbingĩ.”—Luka 7:40-43.

Yesũ nĩweetĩkĩlanile na ũsũngĩo wa Simoni. Ĩtina wa ũu nĩwasyaisye mũndũ mũka ũsu na amwĩa Simoni atĩĩ: “We nũkwona mũndũ mũka ũũ? Nĩlikile nyũmba kwaku na ndũnanenga kĩw’ũ kya kũthamba maaũ. Ĩndĩ mũndũ mũka ũũ nĩwetĩkĩsya maaũ makwa methoi make na amavangũla na nzw’ĩĩ syake. We ndũnamumunya, ĩndĩ kuma yĩla nĩlikile vaa, mũndũ mũka ũũ ndanaeka kũmumunya maaũ makwa. Ndũnetĩkĩsya mũtwe wakwa mauta, ĩndĩ mũndũ mũka ũũ nĩwetĩkĩsya maaũ makwa mauta me mũuke mũseo.” Yesũ nĩwoonie kana mũndũ mũka ũsu oonanasya kana nĩwĩlilĩte kuma ngoonĩ nũndũ wa mwĩkalĩle wake mũthũku. Na kwoou, aminĩĩa na kwasya, “Nĩngũkwĩa, naĩ syake o na kau nĩ mbingĩ, nĩsyaekewa, nũndũ oonany’a wendo mwingĩ. Ĩndĩ ũla waekewa  o ũndũ mũnini, endaa o vanini.”—Luka 7:44-47.

Yesũ ndeetĩkĩlanaa na mwĩkalĩle mũthũku wa ũlaalai. Ĩndĩ, nĩweew’ĩaa tei na akaelewa andũ ala meekĩte naĩ ngito ĩndĩ moonanasya kana nĩmelilĩte na nĩmekwenda kũmũsyokea Klĩsto nĩ kana amathũmũsye. Mũndũ mũka ũsu waĩ na mwĩkalĩle mũthũku ĩndĩ eelila nĩweewie athũmũa yĩla Yesũ wamwĩie atĩĩ: “Naĩ syaku nĩsyaekewa. . . . Mũĩkĩĩo waku nĩwaũtangĩĩa; thi na mũuo.”—Luka 7:48, 50.