Vatu vakwile mujila yakulisezaseza kuvyuma vize Yesu ahanjikilenga nakulinga. Omu mukiko chasolokele muzuvo yimwe muNgalileya. KaFwaliseu walijina lyaShimona, asanyikile Yesu ezenga kuzuvo yenyi nakulya, pamo asakile kwijiva kanawa ou mutu alingilenga vyuma vyakukomwesa. Ngocho Yesu hakumona ngwenyi lwola kana lwamwaza kwambulwila vatu vaze vapwileko, etavile kuya ngana muze alingilenga hakumusanyika kuli vaka-kutambula mitelo navaka-shili.

Oloze hakwingila muzuvo, Yesu kavamutambwile nalikoji nganomu vatambwilenga vangeji vosenako. Omu vatu vatambukilenga mumikwakwa yalukungu muPaleshitane, kumahinji avo kwazuminenga nakupwa namajilo. Ngachize, muchisemwa chavo vasanyishilenga vangeji kumahinji nameya atuta mangana vasolole nge vanavatambula nalikoji. Oloze Yesu kavamusanyishile kumahinjiko. Kaha nawa kavamusweswenyele nge muze valingilenga kuli vangejiko. Kavamuhingunwinyine maji kumutwe mangana vasolole nge vanamutambula namavoko avaliko. Jino vamutambwile ngachilihi?

Omu vangeji vosena vasendavalile kumesa nakuputuka kulya, pwevo umwe himwalingilila ivene muzuvo chakuhona kumusanyika. Pwevo kana vamutachikijile munganda yize “ngwavo muka-shili.” (Luka 7:37) Numba tuhu vatu vosena vapwa vakuhona kukupuka mwosena, vakashili, oloze chasoloka nge uze pwevo apwile muka-ujila. Atela evwile kunangula chaYesu, kuhakilako namazu aze ambile ngwenyi ‘vosena vaze valemuwile naviteli vatelelele kuya kuli ikiye avahizumune.’ (Mateu 11:28, 29) Ngocho mazu aYesu navilinga vyenyi vyalingishile uze pwevo ayenga nakutondatonda kuze apwile Yesu.

Uze pwevo ejililile kunyima yaYesu kumesa nakufukama kumahinji enyi. Alilile nakuzovesa mahinji aYesu namasoji enyi, kaha awahunjile najikambu jenyi. Asweswenyele kumahinji aYesu nakuhingunwinako maji alivumba lyamwaza aze apwile nawo. Shimona alikomokelele hachuma kana, kaha alyambile ngwenyi: “Kachi nge ou lunga apwanga kapolofweto, kachi natachikiza pwevo kanou ali nakumukwata nomu apwa. Kachi natachikiza ngwenyi muka-shili.”—Luka 7:39.

Yesu hakwijiva vyuma apwile nakushinganyeka Shimona, ambile ngwenyi: “Ove Shimona, nguli nachuma chimwe nangusaka kukulweza.” Ikiye ambile ngwenyi: “Ove Muka-kunangula, chihanjike!” Yesu atwalileho ngwenyi: “Kwapwile malunga vavali vapwile namikuli kuli mutu umwe muka-kulevanyisa. Umwe apwile namukuli wajindenali 500, mukwavo jindenali 50. Jino omu vahonene kuwana vyakufweta kumikuli kana, avakonekelele vosena vavali namuchima wakusuuluka. Shikaho, umwe ulihi hali ava mwamuzanga chikuma?” Shimona akumbulwile nakanengauli ngwenyi: “Mukumona chami shina uze vakonekelele mukuli waunene chikuma.”—Luka 7:40-43.

Yesu amwitavilile. Kaha atalile uze pwevo nakwamba kuli Shimona ngwenyi: “Unamumono ou pwevo nyi? Ami nguneza muzuvo yove, oloze ove kawanguhanyine meya akusana kumahinji amiko. Oloze ou pwevo nazovesa mahinji ami namasoji enyi nakuwahunda najikambu jakumutwe wenyi. Ove kawangusweswenyeleko, oloze ou pwevo kufuma vene haola yize ngwezanga muno kalitwaminyine kungusweswenya kumahinji amiko. Ove kawanguhingunwinyine maji kumutwe wamiko, oloze ou pwevo nanguhingunwina maji alivumba lyamwaza kumahinji ami.” Yesu amwene ngwenyi ou pwevo asolwele nge apihililile nakwalumuka kuvilinga vyenyi vyavipi. Ngocho akukulwile ngwenyi: “Nangukulweza ngwami, mwomwo yachuma kanechi, jishili jenyi, numba jinapu jajivulu, vanamukonekelajo mwomwo nasolola zangi yayinene. Oloze ou vanakonekela chindende, mwasolola nawa zangi yayindende.”—Luka 7:44-47.

Yesu kapwile nakukundwiza vilinga vyaujilako. Oloze asolwele muchima wakeke hali vatu vaze valingile shili yayinene, vaze nawa vapihililile nakwalumuka nakwiza kuli Kulishitu avakafwe. Achishinganyekenu ocho kuwaha evwile ou pwevo omu Yesu amwambile ngwenyi: “Jishili jove vanakukonekelajo. . . . Lufwelelo lwove lunakulwili, liyile kwove mukuunda.”—Luka 7:48, 50.