Ndék ngéda i mbus le a mal pôdôl inyu nwéhél i ndap Farisai ba nsébél le Simôn, Yésu a mbôdôl hônd i likalô ipe i Galiléa. A yé i nwii nwé mi nyônôs ima mu nson wé u likalô. A ta bé ke nyetama. Baôma bé 12 ba yé ni nye, yak ngim bôda ipe i a bi “héya mimbuu mimbe a mélés ki makon map” i nke ni nye. (Lukas 8:2) Ipôla yap di gwé Maria Magdaléna, Susana, ni Yôhana nu nlôm a yé ñénél bisônda wada nu Kiñe Hérôdé Antipas.

Kiki ngandak bôt i nok mam Yésu a mboñ, i mbôdôl bana ngandak pééna inyu nson wé. I jam li, li ntibil nene i ngéda ba nlona mut ndim a bak mbuk, a ban-ga ki mimbuu mimbe, inyu boñ le Yésu a mélés nye. Nano le mimbuu mimbe mi mpam i nyuu yé, a nla tehna ni pot. Bôt ba yé nhelek, ba nkal le: “Baa Man David bé nunu?”​—Matéô 12:23.

Limut li nkéña ndap het Yésu a nyiine, li yé ngandak kayéle nye ni banigil bé ba nla bé to je. Ndi bobasôna ba neebe bé le Yésu a yé “Man David” nu ba bi bôn. Ngim bayimbén ni Farisai i nyodne i Yérusalem, i nlo, he bé inyu emble Yésu, to inyu nit nye, ndi ba nkal bôt le: “A gwé Belsébub” a nsal lôñ yada ni “ñane mimbuu mimbe.” (Markô 3:22) Ngéda bôt ba lihaa li Yésu ba nok liyôgbe, ba nlo gwel nye. Inyuki?

Ha ngéda i, bilôk binyañ bi Yésu bi bé hémle bé le Yésu a yé Man Djob. (Yôhanes 7:5) I Yésu nunu a nlona liyôgbe lini, a ta bé kiki i Yésu ba bi yi ngéda ba bi nañ ntôñ i Nasaret. Ba nhoñol le ngim jam i nke bé yak Yésu, ba nkal le: “A nkônd njék.”​—Markô 3:21.

 Ndi kii i mam Yésu a mboñ ma ñunda? Yésu a ntip héya mut mimbuu mimbe, nano a nla tehna ni pot. Mut nye ki nye a nla bé pééna jo. Bayimbén ni Farisai ba noode ôbôs Yésu jôl. Ba nkal le: “I mut nunu a mpémés ndik mimbuu mimbe ni ngui i Belsébub, ñane mimbuu mimbe.”​—Matéô 12:24.

Yésu a nyi kii bayimbén ni Farisai ba nhoñol, jon a nyigye le: “Hiki ane i mbagla inyu kolba yomede i ntjiba, yak hiki tison tole ndap lihaa i mbagla inyu kolba yomede y’a nom bé. Nlélém jam, ibale Satan a mpémés Satan, ngo wee a yé i bagla inyu kolba nyemede; lelaa ni ane yé i nla nom?”​—Matéô 12:25, 26.

Kinje pék! Farisai i nyi le ngim bon ba Lôk Yuda i mpémés mimbuu mimbe. (Minson mi baôma 19:13) Jon Yésu a mbat le: “Ibale me mpémés mimbuu mimbe ni ngui i Belsébub, njee a nti bon banan ngui i pémés nwo?” Bisoman gwap bi ntihba yak bomede. I mbus Yésu a nke ni bisu i kal le: “Ndi ibale me mpémés mimbuu mimbe ni njel mbuu u Nyambe, wee yina ni le Ane i Nyambe i mpam i bééni ndi ni nyi bé hala.”​—Matéô 12:27, 28.

Inyu unda le a nlel Satan ngui mu kiki a mpémés mimbuu mimbe, Yésu a nkal le: “Lelaa mut a nla jôp i ndap i mpémba mut, a kadal gwom gwé ibale a mbôk bé a kañ mpémba mut u? Hala ndik nyen a nla yoñ gwom bi ndap yé gwobisôna. Nu ni nu a ta bé i pes yem a nkolba me, yak nu ni nu a nkot bé bôt ni me a nsand bo.” (Matéô 12:29, 30) Kiki bayimbén ni Farisai ba nkolba Yésu, hala a ñunda le i ntiik ba yé bagwélél ba Satan. Ba nsand bôt ipañ Man Djob nu a nsal ni ngui Yéhôva.

Yésu a mbéhe bagwélél ba Satan bana le: “B’a nwéhél bon ba bôt mam momasôna, to ba mboñ imbe béba, to ba nleñ imbe sol. Ndi nu ni nu a nsol mbuu mpubi, a’ kôhna bé nwéhél i boga ni boga, ndi kogse i béba yé i nom mba ni mba.” (Markô 3:28, 29) Hoñol jam hala a nkobla inyu bet ba nti Satan lipém li li nlôl ni mam mbuu mpubi u Djob u mboñ!