Nné ane a nga mane kobô ajô njaman abé nda be Simon mone Pharisien, Yésus a taté ôbane nkañete ôfe Galilée. A ne mbu baa ya ésaé nkañete jé, a a nji ke dulu ete étam. A ne a minlômane mié 12, ja’a fe binga béziñ a nga “va be mimbia minsisim a mevale me akone mefe.” (Luc 8:2) E zañe jap, bia koone Marie Madeleine, Suzanne, a Jeanne, nnye nnôm a ne mone bezimbi Njô bôt Hérode Antipas.

Mbôl abui bôt da wô’ô foé a lat a Yésus, nsañeta’ane a lat a ésaé jé a ne ve nenenen. Jam ete da yené ne ngeññ éyoñe ba zu Yésus môt a bili mimbia minsisim, a to fe ndindim, a teke ngule ya kobô, nye ve mane saé nye. Éyoñe ji a nto mvo’é a a nga yen, a kobô’ô fe. Bôte ba semen jam ete, be jô’ô na: “Ye nyôna a se mona David?”​—Matthieu 12:23, Mfefé Nkôñelan.

Jama bôt a ne nda ya Yésus a to aval é ne na, Yésus a beyé’é bé be kate’e kui na be di. Ve sa ke bôte bese mbe ba buni na Yésus a ne “Mona David” be nga ka’ale. Bescribe a Bepharisien béziñ ba te so Jérusalem, ve sa ke amu ba kômbô vô’ôlô ñye’elane Yésus nge su’u nye. Ba jô bôte na, “Beelzébub a ne nye nlem,” a na a saé bôt a ngule ya “njô mimbia minsisim.” (Marc 3:22) Éyoñe bivuvumane bi Yésus bia wô’ô jo’ojo’o ate, ba zu nyoñe nye. Amu jé?

A za’a kui éyoñ éte, bobenyañe be Yésus be nji be be buni’i na a ne Mone Zambe. (Jean 7:5) E Yésus a te yiane té abim zô’é é ne zañe bôte ji a selan a nyi ya be nga yem a to mongô e Nazareth. Ba su’ulane fase na a yianeya jañele nlô, a ba jô na: “A ne ane nyô a so’ étyi.”​—Marc 3:21.

 Ve jé mam ma liti? Yésus a ndeme saé môt a bili mimbia minsisim a éyoñe ji, môt ate a nga kobô a yen. Môt éziñ a vo’o de sôô. Nde bescribe a Bepharisien ba kômbô ve éyôlé Yésus mvit be jô’ô na: “Môte nyô a nji va mimbia minsisim a ngule jé, ve a ngule Beelzébul, njô mimbia minsisim.”​—Matthieu 12:24.

Yésus a yem asimesane bescribe a Bepharisien, éyoñ éte a jô na: “Ayoñ ese de akandane zañ a siñ ebien, de aye jañ; nlam ôse a nda ése, nge be akandane zañ a siñe bebien, be aye tabe: nalé ate nge Satan a va Satan, a salé zañ a siñ émien: wôna ayoñe dé de aye tabe aya?”​—Matthieu 12:25, 26.

Ôsimesan ôte ô ne été! Bepharisien ba yeme na abui Bejuif da bo ésaé ya titane mimbia minsisim. (Mam Minlôman 19:13) Nde Yésus a sili na: “Nge me ava mimbia minsisim a ngule Beelzébul, benyo bon be ava mie a ngule za?” Nalé a tinane na, mejô ba bo’olô nye ma yiane fe nambe beyé’é bap. Nde Yésus a ke ôsu a jô na: “Ve nge me ava mimbia minsisim a ngul Nsisime Zambe, wôna [éjôé] Zambe e zuya be mia.”​—Matthieu 12:27, 28.

Asu na a liti na, nge a va mimbia minsisim, nalé a tinane na a ne ngul a dañe Satan, Yésus a jô na: “Môt a ne ngule ya [nyiin] nda ngungu, a wôlé nye biôm bié aya, te taté ka’a ngungu? Wôna a ye sa nda jé. Môt a bo te kame ma, a siñe ma; a nyô a bo te volô kôane ma, nnye a tyam.” (Matthieu 12:29, 30) Amu bescribe a Bepharisien be tele Yésus ngame yat, ba liti fo’o na be ne bebo bisaé be Satan. Ba tindi bôte na be tube mone Zambe, nnye a bo mam a zene ya ngule Yéhôva a ve nye.

Yésus a bemene bebo bisaé be Satan bete a jô’ô be na: “Mam abé mese bôt be abo, a ébiasé ése be abiasé Zambe, bi aye jamban: ve môt a ye biasé Mbamba nsisim a se ngule ya jamban, akôsa bo a kui asu’ulan, ve abé dé e to nnôm éto.” (Marc 3:28, 29) Tame simesan aval nalé a tinan asu bôte ba jô na Satan nnye a ne mvuse jam da kôme yené na, da boban a zene ya mbamba nsisim Zambe!