Omu Yesu akumishile kuhanjika vyakukonekela kuzuvo yakaFwaliseu Shimona, akatukile ungeji wamuchivali wakuya nakwambulwila kuNgalileya. Halwola kana himunahichi lyehi myaka yivali kufuma haze aputukile mulimo wenyi wakwambulula. Kayile ukawenyiko, oloze ayile navaposetolo jenyi 12, namapwevo vamwe vaze “alowele vashipilitu vakuhuka nakuvoka kukuviza chavo.” (Luka 8:2) Hamapwevo kana hapwile naMaliya wakuMangatala, naSuzana, naYowana pwevo lyamuka-kulama vyuma vyaMwangana Helote Andepa.

Omu vatu vavavulu vatachikijile vyaYesu, navikokojola vyakutalisa kumulimo wenyi nawa vyavulile. Echi chasolokele omu Yesu okile lunga wakapuputa uze vamunehelele, uze apwile nandemone, kaha nawa kamama. Ngocho uze lunga valowele ndemone, aputukile jino kuhanjika nakumona. Vatu valikomokelele nakuputuka kwamba ngwavo: “Uno ou keshi MwanaNdavichiko nyi?”—Mateu 12:23.

Liyongomena lize lyalikungulwilile kuzuvo kuze apwile Yesu lyatohwele chikuma ngocho chalingishile Yesu natumbaji twenyi vahone nakulya. Oloze vatu vamwe kavashinganyekele ngwavo Yesu apwile “MwanaNdavichi” uze vashikileko. Vaka-kusoneka navaFwaliseu vamwe vatambukile tunda yayisuku kufuma kuYelusalema, oloze kavejile mangana vevwilile kuli Yesu chipwe kumukundwizako. Valwezele vatu ngwavo: “Atwama naMbelezembule,” kaha eji kulovolanga vandemone “nangolo jakufuma kuli muka-kuyula vandemone.” (Mako 3:22) Omu vausoko jaYesu vevwile mujimbu kana, vayile kuze mangana vamukande. Mwomwo ika?

Halwola kana vandumbu jaYesu kavetavilile nge apwile MwanaKalungako. (Yowano 7:5) Ou Yesu akatwile vikokojola kanevi, kapwile Yesu uze vatachikijile omu vakolelelenga hamwe muNazaletako. Ngachize, vapwile nakushinganyeka ngwavo kuli vimwe  vinaluwangana mumutwe wenyi, kaha vambile ngwavo: “Nazaluka.”—Mako 3:21.

Yesu okile lunga uze apwile nandemone, kaha uze lunga aputukile kuhanjika nakumona. Echi chasolola nge Yesu kazalukileko. Naumwe wauchi ahamikile. Jino vaka-kusoneka navaFwaliseu vasakile kuhana Yesu mulonga, vambile ngwavo: “Ou lunga keshi kulovola vandemone nangolo jekako, shina nangolo jaMbelezembule, muka-kuyula vandemone.”—Mateu 12:24.

Yesu atachikijile vishinganyeka vyavaka-kusoneka navaFwaliseu, kaha ambile ngwenyi: “Weshowo wangana naulimbalaka uvene weji kunonganga, kaha yeshoyo nganda chipwe zuvo nayilimbalaka ivene kayeshi kuzamako. Chochimwe nawa, kachi nge Satana ali nakulovola Satana, kaha nalifumbukila ivene. Kahaze wangana wenyi nauzama ngachilihi?”—Mateu 12:25, 26.

Vyuma ahanjikile Yesu vyapwile vyamangana chikupu. VaFwaliseu vatachikijile ngwavo navaYuleya vamwe valowelenga vandemone. (Vilinga 19:13) Ngocho Yesu avahulishile ngwenyi: “Kachi nge ami ngweji kulovolanga vandemone nangolo jaMbelezembule, nyi vana venu veji kulovolanga vandemone nangolo jeya?” Mazu kana anakulumbununa nge vyuma vavangijikilile Yesu vikiko valingilenga. Yesu atwalileho ngwenyi: “Oloze nge ami ngweji kulovolanga vandemone nashipilitu yaKalunga, kaha Wangana waKalunga uneza chikupu chakuzeneka enu kutachikiza.”—Mateu 12:27, 28.

Hakusaka alumbunune nge mulimo wakufumisa vandemone wasolwele ngolo atwama najo hali Satana, Yesu jino ambile ngwenyi: “Uno mutu mwahasa ngachilihi kwingila muzuvo yamutu wangolo nakupukula vikumba vyenyi nge kanda avangile kukasa mutu kana? Kuvanga nalingi ngocho numbanyi apupe zuvo yenyi. Weshowo keshi kuli amiko napu muka-kole wami, kaha weshowo keshi kukungulwila hamwe nayamiko eji kumwanganga.” (Mateu 12:29, 30) Vaka-kusoneka navaFwaliseu vemanyinyine Yesu nakole, nakusolola jino nge hivatu jaSatana. Vamwangilenga vatu nakuvafumisa kuli MwanaKalunga uze vakafwilenga kuli Ise.

Ngocho, Yesu ahuhumwine ava vaka-kole, vatu jaSatana ngwenyi: “Vyuma vyosena navakavakonekelavyo vana vavatu, numba jipwa jishili chipwe kusaula chosena navasaula vyuma vyajila. Oloze weshowo mwasaula shipilitu yajila kaveshi kukamukonekelako haya myaka namyaka, oloze mwapwa namulonga washili yahaya myaka yosena.” (Mako 3:28, 29) Achishinganyekenu haukalu waunene navakamona vaze vapwile nakukundwiza Satana hakufwefulula milimo yazachile shipilitu yaKalunga.