Mafuku apeela kunyima kw’aye kwisambila pabitale kufwila bangi lusa mu nshibo ya Simone badi Mufadisee, Yesu babangile lungi lwendo lwaye lwa bulungudi ku Ngalileya. E mu kipwa kya kabidi kya mudimo waye na bangi. Batumiibwa baye 12 be naaye na bangi bana bakashi “babadi mupaashe ku bikudi bibi na ku mikumbo.” (Luka 8:2) Kubadi Maadiya a ku Mandala, Suzaana na Jane badi mukashi a musalayi a Nfumu Eroode Antipase.

Pabadi bantu bebungi abapusha mukandu wa Yesu, bantu abadi abanyisha kwela mpaka. Bibadi bimwenekye kalolo pababadi batwale muntu sha bikudi bibi, mpofu shibadi bya kwakula na Yesu nkumupaasha. Binobino yawa muntu takalakashwa dingi na bikudi bibi nya, e kumona na kwakula. Bantu abadi nka penda abakaanya pa kwakula shi: “Uno ta Mmwana a Daviide nyi?”​—Mateo 12:23.

Yesu na balongi baye tababadi sunga na bya kudya kidiibwa nya, mwanda wa lusa lwa bibumbu bibadi biifunyishe nshibo ibabadi bashale. Anka ta mbooso abadi abakumiina shi Yesu “Mmwana a Daviide” nya. Bangi bafundji na Bafadiseo abafikile mu misoko yooso ya Yelusaleme tababapetele dilongyesha sunga kukwatshishena Yesu nya. Abadi abalungula bantu shi: “Ee na Belzebule munda mwaye” kwete kufuba na “nfumu a bikudi bibi.” (Maako 3:22) Pabadi bakwabo na Yesu bapushe pabitale kaaka kafutakanyi, abafikile mu kwata Yesu. Bwa kabingilo kinyi?

Mwanda bakwabo na Yesu tababadi babande kushingula shi Yesu Mmwan’Efile nya. (Yowano 7:5) Yesu badi amweneka bu afwisha kaaka kafutakanyi, badi mwilekene na Yesu ababadi baukye pababadi abakulu mu Nazarete. Abamwene  shi mutwe aumukalakasha pa kwakula shi: “Bashimisha kinangu.”​—Maako 3:21.

Abadi bashinkamishe kinyi kunyima? Yesu bakatuka mu kupaasha muntu sha bikudi bibi bapete ngobesha ya kumona na kwakula. Ta kwi muntu e kwelesha mpaka dingi nya. Binobino bafundji na Bafadisee nkukimba kubepuula Yesu na myanda ya madimi. Ababangile kwakula shi: “Yaawa abingila bikudi bibi’nka ku matalwa a Belzebube, nfumu a tufilefile.”​—Mateo 12:24.

Bu bibadi auku binangu bya bafundji na Bafadisee, Yesu bebambile shi: “Bufumu booso bwitshibe abo bunabene, bwi na kya kufwa, ta kwi kibundji sunga kifuko kiitshibe akyo kinabene kilombene kushaala kinyingye. Byabya, su kafilefile abinga kafilefile naaye, mmwitshibe aye nabene; paapa mbikunyi abishala bufumu bwaye bunyingye?”—Mateo 12:25, 26.

Abakaanyine bikata! Bafadisee abaukanga shi bangi beena Yuuda abadi abatusha bikudi bibi. (Bikitshino 19:13) Binobino Yesu nkwibepusha shi: “Su nku matalwa a Belzebule nkwambingila’mi tufilefile, balongi beenu abebibingila ku matalwa kinyi?” Mu ungi ngakwilo, bi’nka bu’shi aa mayi abadi ebatale abo banabene. Yesu kwibelesha dingi kinangu shi: “Anka su nku kikudi ky’Efile Mukulu kwambingila tufilefile, byabya Bufumu bw’Efile Mukulu bubafiki kwanudi.”—Mateo 12:27, 28.

Bwa kulesha kishinkamiisho shi bukome bwaye bwa kubinga bikudi bibi mbutabukile bwa Satana, Yesu bambile shi: “Mbikunyi bilombene muntu kutwela mu nshibo mwa muntu e bukome amunyenga bintu byaye kwashi mubande kumwanya myoshi? Paapa, apaula nshibo yaaye. Yawa shi lupese lwande nnango naami, shabungu naami apalakasha.” (Mateo 12:29, 30) Bafundji na Bafadisee abadi binyibinyi beena ngo na Yesu, nkishinkamiisho kya’shi abadi beena Satana. Abadi abapalakasha bantu kula na Mwan’Efile Mukulu badi afubu ku bukwashi bwa Yehowa.

Yesu badi mudimushe bano beena dyabulu shi: “Milwisho yooso na kapeesha kooso abikalekyelwa bana ba bantu, sunga byekala bungi naminyi. Anka su muntu apeesha kikudi kiselele ashala shi kulekyelwa bwa looso, akapishiibwa bwa ikalaika.” (Maako 3:28, 29) Banda kunangushena byabibadya kukalakasha baba abamonanga mifubo ya kikudi ky’Efile Mukulu ayimweneka patooka bu ya Satana!