Bihain liklik long Jisas i toktok long pasin bilong fogivim ol narapela long haus bilong Saimon em wanpela Farisi, Jisas i kirapim gen namba tu raun bilong wok autim tok bilong em long Galili. Em namba 2 yia bilong Jisas long mekim wok autim tok, na i gat sampela i raun wantaim em. Em ol 12-pela aposel na ol meri em Jisas i bin “rausim ol spirit nogut long ol na oraitim sik bilong ol.” (Luk 8:2) Namel long ol em Maria bilong Makdala, Susana, na Joana, man bilong em i wanpela ofisa bilong King Herot Antipas.

Planti man i lukim ol bikpela wok Jisas i mekim, na ol i gat narapela narapela tingting long em i husat tru. Dispela samting i kamap ples klia taim ol i bringim wanpela man i kam long Jisas. Spirit nogut i stap long em na em i aipas na mauspas. Tasol Jisas i oraitim em na spirit nogut i lusim em, na nau em inap lukluk na toktok. Ol manmeri i lukim mirakel Jisas i wokim na ol i kirap nogut, ol i tok: “Ating dispela man em pikinini bilong Devit, a?”—Matyu 12:23.

Jisas na ol disaipel i go stap long wanpela haus, tasol ol i no inap kaikai, long wanem, bikpela lain manmeri i kam bung ausait. Sampela i ting Jisas em i “Pikinini Bilong Devit.” Tasol sampela, olsem ol saveman bilong lo na ol Farisi, i lusim Jerusalem na ol i kam, tasol ol i no kam bilong kisim skul long Jisas o sapotim em, nogat. Ol i kam bilong daunim em. Ol i tokim ol manmeri olsem: “Belsebul i stap long em,” na Jisas i wok wantaim “hetman bilong ol spirit nogut.” (Mak 3:22) Taim ol wanblut bilong Jisas i harim stori long ol samting i kamap, ol i kam bilong kisim em i go. Bilong wanem ol i mekim olsem?

Long wanem, ol brata bilong Jisas i no bilip olsem Jisas em i Pikinini Bilong God. (Jon 7:5) Ol samting Jisas i mekim i kamapim bikpela tok pait namel long ol manmeri. Ol brata bilong Jisas i tingting i go bek long taim ol i yangpela yet long Nasaret, Jisas i no bin mekim pasin i kirapim kros pait olsem nau em i mekim. Ol i ting Jisas i gat sik bilong  tingting, olsem na ol i tok: “Tingting bilong em i paul pinis.”—Mak 3:21.

Tasol ol wok Jisas i mekim i kamapim klia wanem samting? Jisas i oraitim wanpela man i gat spirit nogut i stap long em, na nau em inap lukluk na toktok. Olgeta man i lukim Jisas i wokim dispela mirakel. Olsem na ol saveman bilong lo na ol Farisi i traim long sutim tok giaman long Jisas. Ol i tok: “Dispela man i save rausim ol spirit nogut long strong bilong Belsebul tasol, em hetman bilong ol spirit nogut.”—Matyu 12:24.

Jisas i save pinis long tingting bilong ol, olsem na em i tok: “Olgeta kingdom i bruk tupela lain ol bai bagarap, na olgeta taun o famili i bruk tupela lain ol bai i no stap strong. Olsem tasol, sapos Satan i rausim Satan, orait em yet i bruk long tupela lain. Olsem na hau bai kingdom bilong em i stap strong?”—Matyu 12:25, 26.

Tok bilong Jisas i stret tru! Ol Farisi i save olsem sampela bilong lain Juda i save rausim ol spirit nogut. (Aposel 19:13) Olsem na Jisas i askim ol: “Sapos mi rausim ol spirit nogut long strong bilong Belsebul, orait ol pikinini bilong yupela i rausim ol long strong bilong husat?” I olsem Jisas i tok, sapos Belsebul i helpim em long rausim ol spirit nogut, orait Belsebul i helpim ol tu. Jisas i tok moa: “Tasol sapos mi rausim ol spirit nogut long rot bilong strong bilong God, orait Kingdom bilong God i kam pinis na yupela i no luksave long en.”—Matyu 12:27, 28.

Taim Jisas i rausim ol spirit nogut, em i soim olsem em i gat strong bilong daunim Satan. Olsem na em i tok: “Olsem wanem wanpela man inap go insait long haus bilong wanpela strongpela man na kisim ol samting bilong en? Pastaim em i mas pasim dispela strongpela man long rop na bihain em inap stilim ol samting long haus bilong en. Man i no stap long sait bilong mi, em i save birua long mi, na man i no bungim ol samting wantaim mi, em i save tromoi ol samting i go nabaut nabaut.” (Matyu 12:29, 30) Tru tumas, ol saveman bilong lo na ol Farisi i kamapim klia olsem ol i birua long Jisas, na ol i stap long sait bilong Satan. Ol i traim long pulim ol manmeri long lusim Pikinini Bilong God, em man Jehova i sambai long en.

Jisas i givim strongpela tok long ol Farisi olsem: “Maski wanem wanem sin na tok nogut ol man i mekim, God bai fogivim ol. Tasol man i tok nogut long holi spirit, God bai i no inap fogivim sin bilong en inap oltaim oltaim, em i gat asua long sin i stap oltaim oltaim.” (Mak 3:28, 29) Long strong bilong holi spirit, Jisas i rausim ol spirit nogut, tasol ol saveman bilong lo na ol Farisi i tok Jisas i wokim ol mirakel long strong bilong Satan. Tingim, ol i tok nogut long holi spirit, olsem na God i no inap tru long fogivim ol!