I te otiga eiloa o tena faipatiga e uiga ki te fakamagaloga o agasala i te fale o te Falesaio ko Simona, ne kamata ne Iesu tena suā malaga talai i Kalilaia. Ko te lua tausaga tenā o tena galuega, kae ne seki malaga tokotasi atu a ia. Ne olo atu a ia mo apositolo e toko 12, e pelā foki mo nisi fāfine kolā ne “fakasaoloto mai i agaga ma‵sei kae faka‵lei aka foki olotou masaki” ne Iesu. (Luka 8:2) E aofia i a latou a Malia te Makatala, Susana, mo Ioana, ko te avaga a te ofisa pule a te tupu ko Helota Anitipa.

I te taimi ne gasolo aka ei o tokouke a tino ko iloa ne latou a mea ne fai ne Iesu, ne gasolo aka foki o uke a kinauga ne fai e uiga ki tena galuega. Ne matea ‵lei atu te mea tenā i te taimi ne avatu ei ki a Iesu se tagata telā ne ulufia ne temoni, ne ‵kivi ana mata kae gūgū foki kae ne faka‵lei eiloa tou tagata. Ko saoloto nei tou tagata mai temoni kae ko mafai foki o lavea kae faipati a ia. Ne ofo malosi eiloa te vaitino, kae fai atu: “E mata, e se ko ia tenei te Tama a Tavita?”—Mataio 12:23.

Ne tokouke ‵ki eiloa a tino ne maopoopo i tua o te fale telā ne nofo i ei a Iesu, telā ne seki mafai eiloa o ‵kai latou mo ana soko. E se ko tino katoa ne mafau‵fau me i a Iesu ko te “Tama a Tavita,” telā ne folafola mai. Ne olo atu a nisi failautusi mo Falesaio mai te koga ‵mao ko Ielusalema—kae e se ko te fia tauloto mai i a Iesu io me ko te fia ‵lago atu ki a ia. E fai atu latou ki tino: “Ko nofo i a ia a Pelesepulo” telā e ga‵lue fakatasi ei lāua mo “te pule o temoni.” (Maleko 3:22) I te taimi ne ‵logo ei a kāiga o Iesu i te uke o kinauga, ne olo atu ei latou o puke mai a Iesu. Se a te pogai?

Ia, i te taimi tenei, e seki tali‵tonu a taina o Iesu me i a ia ko te Tama a te Atua. (Ioane 7:5) A te Iesu telā e foliga mai me e māfua mai i a ia a kinauga ko se ‵pau mo te Iesu telā ne iloa ne latou i te taimi ne ‵tupu tasi aka ei latou i Nasaleta. Ne fakaiku aka ne latou me ko  tai masei tena mafaufau, me ne fai atu latou: “Ko masei tena ulu.”—Maleko 3:21.

Ne a mea e fakatalitonu mai ne fakamaoniga konā? Ne fatoa faka‵lei aka ne Iesu se tagata telā ne ulufia ne temoni, telā ko mafai foki nei ne ia o lavea kae faipati. E seai eiloa se tino e mafai o faka‵se ne ia a te mea tenei. Tela la, ne taumafai a failautusi mo Falesaio o fakamasei a Iesu ki se ‵losiga ‵se. Muna a latou: “E afuli fua ne te tino tenei a temoni e auala i a Pelesepulo, te pule o temoni.”—Mataio 12:24.

Ne iloa ne Iesu a mea e mafau‵fau ki ei a failautusi mo Falesaio, telā ne fai atu ei a ia: “A malo katoa kolā e mavae‵vae i a latou eiloa e malepe‵lepe, kae ko fa‵kai io me ko kāiga katoa kolā e mavae‵vae i a latou eiloa ka se tumau. E penā foki eiloa, kafai a Satani e afuli ne ia a Satani, ko tena uiga ko mavaevae eiloa a ia. Ka mafai la pefea o tumau tena malo?”—Mataio 12:25, 26.

Ko se faka‵tau eiloa i te gali o te fakamatalaga tenā! E iloa ne te kau Falesaio me e isi ne tino Iutaia kolā e ‵tuli keatea sāle ne latou a temoni. (Galuega 19:13) Ne fesili atu a Iesu: “Kafai e afuli ne au a temoni e auala i a Pelesepulo, i o oi la te igoa ne afuli i ei ne otou tama tāgata a temoni?” Ko tena uiga, e ‵tau o fai atu olotou ‵losiga ki a latou eiloa. Ne toe fai atu ne Iesu a te fakamatalaga tenei: “Kae kafai e afuli ne au a temoni e auala i te agaga o te Atua, ko tena uiga ko oti ne oko mai te Malo o te Atua kae e se iloa ne koutou.”—Mataio 12:27, 28.

E auala i se fakaakoakoga ke fakamaoni atu tena malosi ki luga i a Satani i te afuliga ne ia o temoni, ne fai atu a Iesu: “E mafai pefea o ulu mālō atu se tino ki se fale o se tagata mafi kae ‵fao ne ia ana kope, seiloga ke saisai muamua ne ia te tagata mafi tenā? Tenā fua te auala e mafai ei ne ia o puke a kope mai tena fale. So se tino e se kau mai ki a au e ‵teke ki a au, kae ko so se tino e se ga‵lue fakatasi māua o fakamaopoopo mai a tino e faka‵kalo ne ia a tino.” (Mataio 12:29, 30) E ‵teke tonu atu eiloa a failautusi mo te kau Falesaio ki a Iesu, telā e fakamaoni atu ei me i a latou ne tino a Satani. E ‵tuli kea‵tea ne latou a tino mai te Tama a te Atua, telā e galue fakatasi mo te fesoasoani o Ieova.

Ne fakailoa atu ne Iesu ki tino uiga fakasatani kolā ne ‵teke atu ke fakaeteete: “Ka fakamagalogina a agasala katoa a tino, faitalia a agasala e fai ne latou mo muna ma‵sei a latou e fai. Kae ko so se tino telā e muna masei ki te agaga tapu e se mafai o fakamagalo ke oko eiloa ki te se-gata-mai, ko te agasala telā e se mafai o fakamagalo.” (Maleko 3:28, 29) Mafaufau ki mea e ‵tupu ki a latou kolā e fai atu me ne māfua mai i a Satani a mea kolā e manino eiloa me ne fai e auala i te agaga o te Atua!