Yesu noke yoku popia eci catiamẽla koku ecela konjo ya Simono u Fariseo, eye o linga ungende ukuavo wupange woku kunda ko Galilea. Eye o kasi vunyamo wavali wupange woku kunda, pole, ka kasi oku u enda lika liaye. Ovapostolo 12 va kuama Yesu kumue lakãi vana va “tundisiwile olondele kuenda va kayisua.” (Luka 8:2) Vamue pokati kakãi vaco, Maria Magadala, Susuana kuenda Yoana ukãi wa kalei ka Soma Herode Antipasi.

Osimbu omanu valua va lilongisa eci catiamẽla ku Yesu, ku kala onjuela yalua omo liovina a kala oku linga. Onjuela yaco yi livokiya eci ulumu umue o kuetiwe londele okuti omeke, haeye ocitende, ambatiwa ku Yesu kuenje o sakuiwa. Cilo ulume waco, ka kuetiwe vali londele kuenda o pondola oku vanja loku vangula. Omanu va komõha kuenje va popia vati: “U siti Omõla a Daviti?”—Mateo 12:23.

Owiñi una wa liongoluila konjo Yesu a sikĩla, walua okuti Yesu kumue lolondonge viaye ka va tẽla oku lia. Pole, havosiko va sima okuti Yesu eye una wa likuminyiwa okuti, “Omõla a Daviti.” Vakuavisonehua la va Fariseo vamue okuti va tunda ko Yerusalãi, ka veyilile oco va longisiwe la Yesu ale oku kala konele yaye. Ovo va popia komanu vati: “[Yesu] o kasi la Belesevulu” kuenje o kasi oku talavayela “soma yolondele.” (Marko 3:22) Eci vakuepata lia Yesu va yeva onjuela yaco, veya oco vambate Yesu. Momo lie?

Toke cilo vamanji a Yesu ka va tava okuti, eye omõla a Suku. (Yoano 7:5) Yesu una o kasi oku koka onjuela, huti ño hayeko una ovo va kũlĩha osimbu va kala kumosi ko Nasara. Ovo va sima okuti Yesu o vela kutue kuenje va popia vati: “Eye wa linga eyui.”—Marko 3:21.

Anga hẽ ovina evi viocili? Yesu wa mala oku sakula ulume umue wa kuatele olondele okuti, cilo o  pondola oku vanja loku vangula. Lomue o pondola oku patãla ovina viaco. Vakuavisonehua la va Fariseo va seteka oku vĩhisa ekalo lia Yesu poku u lundila lolondaka viesanda. Ovo va popia vati: “U o tundisa lika olondele vonduko ya Belesevulu, soma yolondele.”—Mateo 12:24.

Omo okuti Yesu wa kũlĩha ovina Vakuavisonehua la va Fariseo va kasi oku sima, eye o popia hati: “Ovosoma osi okuti a likatukila pokati, a nyõleha kuenda alupale osi ale onjo yosi okuti yi likatukila pokati, ka yamamako. Cimuamue haico okuti, nda Satana o tundisa Satana, o likatukila eye muẽle, oco hẽ usoma waye wamamako ndati?”—Mateo 12:25, 26.

Ka va kuete ndomo va patãla eci Yesu a popia! Va Fariseo va kũlĩha okuti va Yudea vamue, va siatavo oku tundisa olondele. (Ovilinga 19:13) Omo liaco, Yesu o va pula hati: “Oco puãi, nda ndi tundisa olondele vonduko ya Belesevulu, oloñame viene vi tundisa vonduko yelie?” Eci ci lomboloka okuti alundi va kasi oku lingila Yesu a tiamisiwila muẽle kokuavo. Yesu amisako poku popia hati: “Pole, nda ndi tundisa olondele vonduko yespiritu lia Suku, Usoma wa Suku [weya ale kokuene].”—Mateo 12:27, 28.

Oco Yesu a lekise okuti unene waye wa velapo unene wa Satana poku tundisa olondele, o popia hati: “Omunu o tuiyila ndati onjo yulume umue wa pama loku upa ovina viaye osimbu ka kutile ulume waco wa pama? Noke citava oku punda ovina viaye. Wosi ka kasi konele yange, ka tiamẽlele kokuange kuenda wosi ka kongela lame, o sandula.” (Mateo 12:29, 30) Vakuavisonehua la va Fariseo ka va kasi konẽle ya Yesu kuenje eci ci lekisa okuti va kasi oku vumba Satana. Ovo va tateka omanu koku yevelela Omõla a Yehova Suku, una o kuete ekuatiso li tunda Kokuaye.

Yesu o lungula omanu va kasi oku vumba Satana hati: “Ovina viosi omanu va linga vi ka ecelua, ndaño akandu avo, ale atonãi va popia. Puãi wosi o popia espiritu sandu etonãi, ka ka ecelua, pole o pisiwa ekandu ka li pui.” (Marko 3:28, 29) Sokolola eci olondaka evi vi lomboloka komanu vana va kasi oku tiamisila ku Satana ovina via lingiwa lespiritu lia Suku!