Moohipisa nuumala olavula voohimya sa olevelela etthoko ya nFarisi iihaniwa Simoni, Yesu aahipaceriha ekwaha ekina ya olaleerya oGalileya. Tthiri, yaari eyaakha ya nenli ya muteko awe woolaleerya. Nto kheetta mekhawe. Aari ni arummwa awe 12, vamosa ni athiyana, yaawo “yakumihiwe malaikha ònanarexa ni yavonihiwe iretta saya”. (Luka 8:2) Aahikhala eriyari aya, Maria mMadala, Susana ni Yohana yoowo aatheliwe ni murumeyi a Mwene Herodi.

Vaavo atthu anceene yaatepa aya osuwela miteko sa Yesu, yaanitepa manyaku-nyaku. Eyo yaahooneya vaavo aaruuheliwa awe mulopwana aavariwe ni nlaikha nootakhala, yoowo ahoona ni ahaalavula, nto khunvoniha. Mulopwana ole aahipacerya woona ni olavula okhala wira nlaikha nne naahoomoliwa ni Yesu. Atthu ale yaahitikinihiwa anahimya wira: “Toko yola kahi Mwana a Davidi?”​—Matheyo 12:23.

Muttitthi ole waathukumanne etthoko aari awe Yesu khiwaareere, nto Yesu ni awiixutti awe khiyaarina okathi woolya. Masi khahiyo wira atthu otheene yoona wira Yesu ti “Mwana a Davidi” aaleiheriwe. Alipa-oolepa akina ni aFarisi yaakhumme oYerusalemu. Masi awo khiyaarwenle wiixuttihiwa ni Yesu aahiiso omukhaliherya. Maana yaanaaleela atthu wira: “Ole ori ni Bèli-Zebuli” aahiiso onivara okhaliheriwaka ni “owerya wa mulupale a malaikha òtakhala”. (Marko 3:22) Vaavo amusi a Yesu yiiwale aya itthu iyo, yaahimurowela. Nthowa xeeni?

Nave mpakha okathi ole, axinnawe Yesu khiyaakupali wira Yesu Mwaana a Muluku. (Yohani 7:5) Annawe khiyaakupali wira manyaku-nyaku ale yaakumiheriwe ni Yesu. Okhala wira yaanimusuwela oratteene ni yannunwe vamosa oNazarethi. Yoonaka wira Yesu khaakhanle saana mmuupuweleloni, awo yaahimmye so: “Orovahuwa”.—Marko 3:21.

 Niireke eyo yaari ekeekhai? Nnaari. Maana Yesu oomonle nlaikha nootakhala nanvanre mulopwana ohinawerya woona nnakhala olavula. Atthu otheene yaahoona eyo. Tivonto alipa-oolepa ni aFarisi, yaaheererya onvaanyiha ahimyaka wira: “Ola òmolaka malaikha òtakhala, onnòmola n’uwerya wa Bèlizebuli, mulupale a malaikh’awo”.—Matheyo 12:24.

Okhala wira Yesu aahisuwela ele alipa-oolepa ni aFarisi yuupuwela aya, nto aahaaleela wira: “Omwene omosá wakawanyeyaka yoworu, onopweteya. Ntthoko walá muttetthe wakawanyeyaka yoworu, khunwerya okhala. Siso, Satana aìsomolaka mwanene, ohìkawanya mmansawe: nto omwene awe onkhala-tho sai?”—Matheyo 12:25, 26.

Tthiri Yesu aahitthokiherya saana! Maana aFarisi yaanisuwela wira aYuda akina yaanoomola malaikha ootakhala. (Miteko 19:13) Tivo Yesu aakonhe awe wira: “Miyo kòmolaka malaikha a Satana n’uwerya wa Bèlizebuli, khi atthu anyu anòmola n’uwerya wa wani?” Mwa enamuna ekina, itthu yaahimya aya saavara mmensaya. Nuumala-vo, Yesu aahivikaniha oriki: “Nto miyo kòmolaka malaikha òtakhala n’uwerya” wa munepa wa Muluku, “vosuwanyeya wira Omwene wa Muluku wophiya wa nyuwo”.—Matheyo 12:27, 28.

Ooniheryaka wira oomola malaikha ootakhala orumeelaka munepa wa Muluku ohiya wa Satana, Yesu aahimmye wira: “T’ani onwerya okela mpani mwa mutthu òtupa, omwakha itthu sawe, ahipajenrye omutthuka mwanene owo? Amutthuká vale, onowerya okuxa muhakhu. Ole ohikhanle ni miyo, onnikivirikanya: ole ohinthukumanya vamosá ni miyo, onomwarexa”. (Matheyo 12:29, 30) Mwekeekhai alipa-oolepa ni aFarisi yaaninvirikanya Yesu, maana yaahooniherya wira yaari arumeyi a Satana. Atthu ale yaanaahapuxa atthu wira ahimwiiweleleke Mwaana a Muluku, yoowo aakhaliheriwa ni Yehova.

Yesu aahaalopola atthu ale yaarumeeliwa ni Satana wira: “Atthu anoleveleliwa itampi sothene sinìraya, nave-tho molumo ònveha Muluku. Nto yale anveha eroho [munepa] yowarya, khanrowa ophwanya nlevelelo: ti yottheka entthuna wakhalela mahiku othene”. (Marko 3:28, 29) Tthiri atthu ale anoophwanya maxakha! Maana yaahimya wira miteko Yesu aapaka awe orumeelaka munepa wa Muluku, aakhaliheriwa ni Satana.