Nɔ́ nɛ Farisi bi ɔmɛ kɛ mlaa tsɔɔli ɔmɛ de kaa pi Mawu he wami nya nɛ Yesu ngɛ mumi yayamihi hiae ngɛ ɔ tsɔɔ kaa a bɔ musu kɛ si mumi klɔuklɔu ɔ. Lɔ ɔ ke o hyɛ ɔ, mɛnɔ se nɛ a ngɛ​​—Mawu aloo Satan? Yesu de ke: “Ke o du tso kpakpa a, e maa wo yiblii kpakpa; ke tso ɔ hí ɔ, e maa wo yiblii yaya. Tso yiblii nɛ a kɛ leɔ tso.”​​—Mateo 12:33.

Juɛmi be mi kaa nɔ ko ma de ke mumi yayamihi nɛ Yesu ngɛ hiae ɔ tsɔɔ kaa e ngɛ Satan sɔmɔe. Yesu de ngɛ e Yoku ɔ Nɔ Fiɛɛmi ɔ mi kaa tso kpakpa tsuaa tso kpakpa woɔ yiblii kpakpa, se pi yiblii yaya. Enɛ ɔ he ɔ, mɛni nɛ munyu nɛ juɛmi be mi nɛ Farisi bi ɔmɛ tu kɛ si Yesu ɔ tsɔɔ? Enɛ ɔ tsɔɔ kaa a ji nimli yayamihi. Yesu de mɛ ke: “Nyɛ sinɔhi a nina! Nyɛ nimli yayamihi! Kɛ nyɛ maa pee kɛ tu munyu kpakpa kɛɛ? Ejakaa nɔ́ nɛ hyi tsui mi tɔ ɔ, lɔ ɔ nya deɔ.”​​—Mateo 7:16, 17; 12:34.

Níhi nɛ wa deɔ ɔ tsɔɔ nɔ́ nɛ ngɛ wa tsui mi, nɛ lɔ ɔmɛ a nɔ a maa da kɛ kojo wɔ. Enɛ ɔ he ɔ, Yesu de ke: “I ngɛ nyɛ dee ke kojomi ligbi ɔ, nyɛ ti nɔ tsuaa nɔ maa bu akɔtaa ngɛ yaka munyu tsuaa yaka munyu nɛ e tu hyɛ he. Munyuhi nɛ nyɛ tu ɔ, lɔ ɔmɛ a nɔ a maa da kɛ wo nyɛ nguɔ, nɛ lɔ ɔmɛ nɔuu a nɔ a maa da kɛ bu nyɛ fɔ.”​​—Mateo 12:36, 37.

Ngɛ nyakpɛ níhi fuu nɛ Yesu pee ɔ tsuo se ɔ, Farisi bi ɔmɛ kɛ mlaa tsɔɔli ɔmɛ de Yesu ke: “Tsɔɔlɔ, wa ngɛ o nine nya okadi ko hlae nɛ waa hyɛ.” Ke Farisi bi ɔmɛ kɛ mlaa tsɔɔli ɔmɛ na Yesu nyakpɛ ní ɔmɛ jio, a nɛ́ eko jio ɔ, odase fuu ngɛ nɛ tsɔɔ kaa Yesu ngɛ nyakpɛ níhi pee. Enɛ ɔ he ɔ, Yesu de Yuda jami hɛ mi nyɛɛli ɔmɛ ke: “Nyɛ yi nɔ yaya bi nɛ nyɛ li Mawu! Nyɛ ke nyɛ ngɛ ye nine nya okadi hlae, pi jã? Dɛbi! Okadi pɛ nɛ a ma ha nyɛ ji gbalɔ Yona nɔ́ ɔ.”​​—Mateo 12:38, 39.

Yesu le kaa a nui nɔ́ nɛ e de ɔ sisi, enɛ ɔ he ɔ, e de mɛ ke: “Bɔ nɛ Yona ye nyɔ kɛ pia ligbi etɛ ngɛ wo mi lo ngua a muklii mi ɔ, jã Nɔmlɔ Bi ɔ maa ye nyɔ kɛ pia ligbi etɛ ngɛ zu mi.” Lo ngua ko mi Yona, se e kpale vie lɛ, nɛ e ngɛ kaa nɔ́ nɛ e te si ekohu. Lɔ ɔ he ɔ, Yesu ngɛ tsɔɔe kaa e ma gbo nɛ ligbi etɛ se ɔ, a ma tle lɛ si. Pee se ɔ, nɔ́ nɛ Yesu de ɔ ba mi, se Yuda jami hɛ mi nyɛɛli ɔmɛ a kua ‘Yona okadi’ ɔ, nɛ a tsakee we a tsui. (Mateo 27:63-66; 28:12-15) Benɛ Yona fiɛɛ kɛ ha “Nineve bi ɔmɛ” ɔ, a tsake a tsui. Enɛ ɔ he ɔ, a maa bu yi nɔ nɛ ɔ fɔ. Yesu tsɔɔ kaa Sheba manyɛ ɔ po maa bu mɛ fɔ. Ejakaa e hia  blɔ kɛ je e ma mi tɔɔ nɛ e ya bu Matsɛ Salomo nile munyuhi tue. Yesu ya nɔ nɛ e de mɛ ke: “Nɔ́ ko ngɛ hiɛ ɔ nɛ pe Salomo.”​—Mateo 12:40-42.

Yesu ngɔ jamɛ a yi nɔ atua tsɔli ɔmɛ kɛ to nyumu ko nɛ a hia mumi yayami ngɛ e mi ɔ he. (Mateo 12:45) Akɛnɛ nyumu ɔ ngɔɛ ní kpakpahi kɛ wui e mi he je ɔ, daimoniohi kpaago kpale ba sɛ e mi. A tsu Israel ma a he kaa bɔ nɛ a hia mumi yayami ngɛ nyumu ɔ mi ɔ. Se Israel bi ɔmɛ kua Mawu gbali ɔmɛ, nɛ a te si kɛ wo Yesu, nɔ nɛ Mawu mumi ɔ ngɛ e nɔ ɔ. Enɛ ɔ tsɔɔ kaa ma a si fɔfɔɛ puɛ pe kekle ɔ po.

Benɛ Yesu ngɛ munyu tue ɔ, e nyɛ kɛ e nyɛmimɛ ɔmɛ ba lejɛ ɔ, nɛ a ba da si ngɛ ni ɔmɛ a se. Kɛkɛ nɛ ni komɛ de Yesu ke: “O nyɛ, kɛ o nyɛmimɛ ɔmɛ daa si ngɛ kpo ɔ nɔ, nɛ a ngɛ hlae nɛ a na mo.” Yesu ha nɛ ni ɔmɛ na kaa e kaseli ɔmɛ ngɛ e tsui nɔ pe e yayo kɛ e nyɛmimɛ ɔmɛ. Yesu kɛ e nine tsɔɔ e kaseli ɔmɛ a nɔ nɛ e de ni ɔmɛ ke: ‘Ye maa, kɛ ye nyɛmimɛ ji nihi nɛ nuɔ Mawu munyu ɔ, nɛ a yeɔ nɔ.’ (Luka 8:20, 21) Nɔ́ nɛ e ngɛ tsɔɔe ji kaa, ke huɛ bɔmi nɛ ngɛ e kɛ e weku li ɔmɛ a kpɛti ɔ mi wa kaa mɛni po ɔ, huɛ bɔmi nɛ ngɛ e kɛ e kaseli ɔmɛ a kpɛti ɔ he jua wa ha lɛ pe nɔ́ nɛ ngɛ e kɛ e weku li ɔmɛ a kpɛti ɔ. E ngɛ mi kaa nihi gbeɔ wa he guɛ, nɛ a tuɔ ní tsumi kpakpa nɛ wa ngɛ tsue ɔ he munyu yaya mohu lɛɛ, se huɛ bɔmi kpakpa nɛ ngɛ waa kɛ wa nyɛmimɛ Kristofohi a kpɛti ɔ haa nɛ wa bua jɔɔ!