Jesusajj janiw Diosan chʼamapampi demonionak alisskiti sasajja, escribanakasa fariseonakasa, espíritu santo contraw juchachasipjjaspänjja. Ukhamasti Dios toqetti jan ukajj Supay toqetcha saytʼasipjjani ukwa ajllipjjañapäna. Jesusajj sänwa: “Jumanakatejj suma arboläpjjsta ukhajja, achunakamajj sumäniwa. Jumanakatejj jan suma arboläpjjsta ukhajja, achunakamajj janirakiw sumäkaniti. Mä arbolajj achupatwa uñtʼasi” sasa (Mateo 12:33).

Jesusajj demonionakar alissusajj suma achunakwa uñachtʼayaskäna, ukhamajj Supayan yanaptʼapampiw alissu sañajj janipuniw walïkänti. Kunjamtï Jesusajj qollun yatichkänjja, suma arbolajj janiw jan suma achu achoqkaspati. Jesusar juchañchasajja, fariseonakajj jan suma achüpjjatapwa uñachtʼayapjjäna. Ukatwa Jesusajj jupanakar akham säna: “Asirun wawanakapa, ¿kunjamarak jumanakasti jan wali jaqëkasin sumanak parlapjjasmasti? Mä jaqejja, kunatï chuymapan phoqantatäki ukwa parlaraki” sasa (Mateo 7:16, 17; 12:34).

Cheqansa kunatï chuymasan utjki ukwa parltanjja, parlatasarjamaw juchañchatarakiñäni. Jesusajj sänwa: “Jaqenakajja taqe jan wali parlatanakapatwa Juicio Urun Diosarojj cuenta churapjjani. Ukhamajj arunakamarjamaw cheqap jaqet uñtʼayasïta, arunakamarjamaw juchañchatas uñjasirakïta” sasa (Mateo 12:36, 37).

Jesusajj musparkañ milagronaksa lurkchïnjja, escribanakasa fariseonakasa akham sasaw Jesusar sapjjäna: “Yatichiri, mä señal jumat uñjañ munapjjta” sasa. Jupanakajj Jesusan milagronakap janis uñjapkchïnjja, waljaniw Jesusar milagronak lurir uñjapjjäna. Ukatwa Jesusajj akham säna: “Diosat jitheqtir aka tiempon jakir jan wali jaqenakajja, mä señal uñjañ munasipkakiwa. Ukampis janiw kuna señalsa uñjapkaniti, jan ukasti Jonás profetan señalapak uñjapjjani” sasa (Mateo 12:38, 39).

Jesusajj sarakïnwa: “Kunjamtï Jonasajj kimsa urumpi kimsa arumampi mä jachʼa chawllan purakapankkänjja, ukhamarakiw jaqen Yoqapajj kimsa urumpi kimsa arumampi oraq manqhankani” sasa. Jonás profetarojj mä jachʼa chawllaw manqʼantäna, kimsa urutwa uka chawllajj waña oraqer jaqsjjarakïna, ukajj jaktankaspänsa ukhamänwa. Jesusajj jiwayatäsin kimsa urutwa jaktayatäñapäna ukwa qhanañchaskäna. Uk phoqasjjäna ukhajja, judío pʼeqtʼirinakajj ‘Jonás profetan señalap’ phoqasitap janiw istʼañ munapkänti, janirakiw juchanakap  jaytañsa ni arrepentisiñsa munapkänti (Mateo 27:63-66; 28:12-15). Uka judionakat sipansa, “Nínive markankir jaqenakajja” Jonasar istʼasajj arrepentisipjjänwa. Jupanakaw judionakarojj juchañchapjjañapäna, ukatsti Seba markankir reinajj ukhamarakiw jupanakarojj juchañchañapäna. Uka reinajj Salomonan yatiñap istʼañwa munäna, jupar istʼasajj wal kusisïna. Jesusasti akham sänwa: “Khititï Salomonat sipansa jukʼamp jilïrïki ukaw akankaski” sasa (Mateo 12:40-42).

Uka tiempon jakir jaqenakajja, demonio alissuta mä jaqer uñtasitäpjjewa sasaw Jesusajj säna (Mateo 12:45). Uka jaqejj janiw kunatï walïki uk lurañatak chʼamachaskänti, ukatwa demoniojj sarasinjja jupat sipansa jukʼamp jan wali paqallq demonionakar irptasinïna, uka jaqer mantañataki. Israel markajj uka jaqer uñtasitaw qʼomachatäna, ukampis janiw profetanakarojj istʼkänti, Diosan yanaptʼap katoqkäna uka Jesús contraw saytʼasirakïna. Ukhamatwa israelitanakajj qalltat sipansa jukʼamp jan walin uñjasipjjäna.

Jesusajj jaqenakar parlaskäna ukhajja, mamapampi jilanakapampiw puripjjäna. Jesusan jakʼapankirinakajj jupar akham sapjjänwa: “Mamamampi jilanakamampiw anqankasipki, jumampiw parlañ munapjje” sasa. Jesusajj kunja munasiñampis discipulonakaparojj uñjäna ukwa uñachtʼayäna, jupanakaw jupatakejj cheqpach jilanaka, kullakanaka, taykanaka ukhamänjja. Discipulonakapan ukar ampar loqtasajj akham sänwa: “Khitinakatejj Diosan arunakap istʼapki ukhamarak ukarjam lurapki ukanakaw jilanakajasa mamajasa” sasa (Lucas 8:20, 21). Jesusajj familiapar walsa munaskchïnjja, discipulonakaparuw jukʼamp munasïna. Yaqhepanakajja suma luräwinakasat pächasipjjaspawa juchañchapjjarakistaspawa, ukampis jiwasajj Jesusjamaw jilat kullakanakasarojj wal munastanjja.