Kiki ba mpééna le Yésu a mpémés mimbuu mimbe ni ngui Djob, bebek bayimbén ni Farisai ba yé sol mbuu mpubi. Jon, imbe pes ba ga yoñ, pes i Djop tole pes i Satan? Yésu a nkal le: “Ibale ni mbôñgôl e, y’a num matam malam, ndi ibale ni mbôñgôl bé e, matam mé m’a ba bé malam, inyule matam mon ma nyelel le e i yé ilam tole i yé ibe.”​—Matéô 12:33.

Hala a yé libak li ngi yi i hoñol le Yésu a mpémés mimbuu mimbe ni ngui Satan. Kiki Yésu a bi toñol mu Nkwel wé ngii hikôa, ibale matam ma yé malam, yak e i yé lam, i ta bé mbolok. Ndi kii maboñok ma Farisai ma ñunda? Bisoman gwap inyu Yésu bi ñéba le ba yé bibéba bi bôt. Yésu a nkal bo le: “A bon ba péé, lelaa ni nla pot mam malam ki le ni yé bibéba bi bôt? Inyule i mam ma yôni mut ikété ñem mon nyo u mpot.”​—Matéô 7:16, 17; 12:34.

Ñ, bipôdôl gwés bi ñunda kii i yé bés ñem, d’a kôhna ki mbagi inoñnaga ni gwo. Jon Yésu a nkal le: “Me nkal bé le: Bôt b’a timbhe i Hilo hi Mbagi inyu hiki bañga ba mpot i i gwé bé nseñ; inyule inyu bipôdôl gwoñ nyen w’a kéla le u téé sép, inyu bipôdôl gwoñ ki nyen w’a kôhna mbagi nôgôs.”​—Matéô 12:36, 37.

To hala kiki Yésu a mboñ bihélha bi mam, bayimbén ni Farisai ba ngwés le a boñ iloo ha, inyu hala nyen ba nkal ni le: “A Lét, di ngwés le u unda bés yimbne.” To bomede ba bi tehe Yésu a mboñ bihélha bi mam tole ba bi tehe bé, ngandak bôt i nla ti mbôgi i bihélha bi mam Yésu a mboñ. Yésu a nla ni kal baéga bibase bi Lôk Yuda le: “Hiai hibe ni hi ndéñg hi nwaa bé bat yimbne, ndi hi’a kôhna bé yimbne yo ki yo, handugi yimbne i mpôdôl Yôna.”​—Matéô 12:38, 39.

Yésu a nti bé bo pôla i bat mambadga mu jam a nkal: “Ndik kiki Yôna a bi tégbaha dilo daa ikété libum li njok hiobi, hala nyen Man mut a’ tégbaha dilo daa ikété soñ.” Mbôm hiobi i bi mil Yôna, ndi a bi pam wengoñle a bi tuge. Yésu a bi legel bisu bi ngéda le nyemede a’ wo, ndi i hilo hi nyônôs aa a’ tuge. Kiki hala a bi yon i mbus ngéda, baéga bibase bi Lôk Yuda ba bi tañ “yimbne i mpôdôl Yôna,” ba tjél hiel ñem, ba tjél ki héñha. (Matéô 27:63-66; 28:12-15) Maselna ni hala, “bôt ba Ninivé” ba bi hiel miñem nwap i mbus likalô li Yôna. Jon ba ga kéés hiai hini. Yésu a nkal ki  le ni ndémbél yé, kiñemuda i Séba i ga ôm bo nsohi. A bi bana ngôñ i emble pék i Salômô, a bégés ki yo. Nano Yésu a nyigye le: “Nu a nloo Salômô a yé hana.”​—Matéô 12:40-42.

Yésu a nhégha béba hiai hini ni mut ba nhéya mbuu mbe. (Matéô 12:45) Mu kiki mut a nyônôs bé niñ yé ni biloñge bi mam, mbuu mbe ba bi pémés u ntémb u loo ni mimbuu mimbe minsaambok mi mi nlôôha ba béba, mi njôp ikété yé mi yééne mu. Nlélém ni litén li Israel li ba bi pubus, ni uñgus kiki mut nu ba nhéya mbuu mbe. Ndi litén li bi tjél nôgôl bapôdôl ba Djob, li nkolba yak Yésu nu Yéhôva a bi om, ki le a bé nyonok ni mbuu Djob. Jon libak li litén li nlôôha ba béba.

Mu kiki Yésu a yé pot, nyañ ni bilôk binyañ ba nlo ba telep i mbus limut li li nkéña Yésu. I bôt ba yé Yésu ipañ, ba nkal nye le: “Nyuñ ni lôknyuñ ba téé i mbégdé, ba nyéñ tehe we.” Nano, Yésu a ñunda le a gwé maada ma ngui ni banigil bé. Ni woo wé, a ñunda banigil bé, a kal le: “Ini ni bilôk bikéé ba yé i bôt ba ñemble bañga i Nyambe, ba nôglak ki yo.” (Lukas 8:20, 21) Ni njel i, Yésu a ñunda le ibabé i béñge maada ma tôbôtôbô a gwé ni lihaa jé, maada a gwé ni banigil bé ma nlôôha bana mahee. Kinje hogbe di gwé i bana nya maada ma ngui i ni bilôk bikéé, téntén ngéda bôt bape ba mpééna bés, tole ba ñôm bés nsohi inyu maboñok més malam!