Sa pagsabing si Jesus nagpapalayas nin mga demonyo bako paagi sa kapangyarihan nin Diyos, an mga eskriba asin Fariseo posibleng makapaglanghad sa banal na espiritu. Kaya, kiisay sinda makampi—sa Diyos o ki Satanas? Si Jesus nagsabi: “Magsalang gibuhon nindong marahay an kahoy asin an bunga kaiyan o gibuhon nindong raot an kahoy asin an bunga kaiyan, huli ta an kahoy namimidbid sa bunga kaiyan.”—Mateo 12:33.

Kalulungan na sahutan si Jesus na naglilingkod siya ki Satanas huli sa nagigibo niyang marahay na bunga na pagpalayas nin mga demonyo. Arog kan malinaw na sinabi ni Jesus sa Sermon sa Bukid, kun marahay an bunga, marahay man an kahoy, bakong raot. Kaya, an bunga kan mga Fariseo, an daing kamanungdanan nindang sahot laban ki Jesus, patunay nin ano? Na sinda arog sa raot na kahoy. Sinabihan sinda ni Jesus: “Mga aki nin mga rimuranon, paano kamo makakataram nin marahay na mga bagay atang maraot kamo? Huli ta sa kapanuan kan puso nagtataram an nguso.”—Mateo 7:16, 17; 12:34.

Iyo, an mga sinasabi ta nagpapabanaag kan kamugtakan kan satong puso asin nagseserbing basehan sa paghukom. Huli kaini, nagsabi si Jesus: “Sinasabi ko sa saindo na sa Aldaw nin Paghukom, maninimbag an mga tawo sa gabos na daing saysay na bagay na pigtataram ninda; huli ta sa saimong mga tataramon ika ipapahayag na matanos, asin sa saimong mga tataramon ika huhusgaran na may sála.”—Mateo 12:36, 37.

Sa ibong kan mga milagro ni Jesus, an mga eskriba asin Fariseo naghagad pa: “Paratukdo, gusto ming makahiling nin tanda hali sa saimo.” Personal man nindang nahiling o dai, na naggibo siya nin mga milagro, dakul na nakahiling mismo an nagpapatunay kan mga ginibo niya. Kaya masasabi ni Jesus sa Judiong mga lider: “An henerasyon na maraot asin bakong maimbod sa Diyos sigeng hanap nin tanda, alagad ta dai nin tanda na itatao sa henerasyon na iyan apuwera sa tanda ni Jonas na propeta.”—Mateo 12:38, 39.

Lininaw ni Jesus an buot niyang sabihon: “Huli ta kun paanong si Jonas nasa tulak kan dakulaon na sira sa laog nin tulong aldaw asin tulong banggi, an Aki nin tawo mamumugtak man sa irarom nin daga sa laog nin tulong aldaw asin tulong banggi.” Si Jonas hinalon nin sarong klase nin dakulaon na sira dangan ilinuwas na garo binuhay liwat. Ihinula ni Jesus na siya mismo magagadan asin sa ikatulong aldaw bubuhayon. Kan nangyari na iyan, isinikwal kan Judiong mga lider an “tanda ni Jonas,” asin habo nindang magsulsol saka magbakli. (Mateo 27:63-66; 28:12-15) Sa kabaliktaran, “an mga taga Nineve” nagsurulsol pakatapos na maghulit sa sainda si Jonas. Kaya kokondenaron ninda an henerasyon na ini. Sinabi man ni Jesus na paagi sa halimbawa kan reyna nin Seba, kokondenaron man sinda kaini. Gusto niyang dangugon an kadunungan ni Solomon  asin nagngalas huli kaiyan. Ngunyan, sinabi ni Jesus na “sarong labi pa ki Solomon an yaon digdi.”—Mateo 12:40-42.

Iinagid ni Jesus an sitwasyon kan maraot na henerasyon na ini sa sarong tawo na linuwasan nin sarong maraot na espiritu. (Mateo 12:45) Huling dai niya pinano an sadiri nin marahay na mga bagay, buminalik an maraot na espiritu na may kaibang pitong mas maraot na espiritu asin sinaniban ini. Kaagid kaiyan, an nasyon nin Israel lininig na asin binago—kaparehong marhay kan tawo na linuwasan na kan maraot na espiritu. Pero isinikwal kan nasyon an mga propeta nin Diyos, na suminagkod sa pagtumang sa saro na malinaw na igwa kan espiritu nin Diyos, si Jesus. Ipinapahiling kaini na an kamugtakan kan nasyon nagin mas maraot pa kisa kan inot.

Mantang nagtataram si Jesus, an saiyang ina saka mga tugang nag-arabot asin nagtindog sa may likod kan kadaklan. An ibang nakatukaw na harani sa saiya nagsabi: “Nakatindog sa luwas an saimong ina asin mga tugang, gusto kang mahiling.” Dangan ipinahiling ni Jesus kun gurano siya kadayupot sa mga disipulo niya, na garo niya tunay na mga tugang na lalaki saka babayi asin ina. Iminustra ni Jesus an kamot niya pasiring sa mga disipulo asin nagsabi: “An sakuyang ina asin mga tugang iyo ining mga nagdadangog kan tataramon nin Diyos asin nag-uutob kaiyan.” (Lucas 8:20, 21) Kaya ipinahiling niya na gurano man siya kadayupot sa mga paryente niya, mas dayupot pa man giraray siya sa mga disipulo. Nakakaginhawa nanggad na magin arog kaiyan kadayupot sa mga tugang ta sa espirituwal, lalo na kun kita pinagdududahan nin iba o tinutuya pati na an satong marahay na mga gibo!