Éyoñe ba bene buni na Yésus a titane mimbia minsisim a ngule Zambe, bescribe a Bepharisien ba tele bebiene mbia été, amu ba biasé mbamba nsisim. Nde ñhe, ba ye tebe ngame fé: ye ngame Zambe, ye nyi Satan? Yésus a jô na: “Nge élé é ne mvaé, bibuma bi ne mvaé; e ne fe na, nge élé é ne abé, bibuma bi ne abé: amu bi ayem élé amu bibuma bié.”​—Matthieu 12:33.

A n’asu’u ya jô na, Yésus a kañe Satan éyoñ a wume mbamba ébuma a zene ya titane mimbia minsisim. Avale Yésus a nga liti Ékate mame ya Nkôle yôp, nge ébuma é ne abeñ, élé fe é ne abeñ, é nji bo ébol. Nde, jé bibuma Bepharisien bia liti, nge na bibôta’a mejô ba bo Yésus? Bia liti na bi ne ébol. Yésus a kate be na: “A mvoñe mekpwe, mi ne jô mbamba be mam aya mi too mbia be bôt? Amu jam anyu da jô e ne di da fuluku nlem.”​—Matthieu 7:16, 17; 12:34, Mfefé Nkôñelan.

Ôwé, mejô bia kuli anyu ma liti aval avé nleme wongan ô né, a ba ye tyi’i bia mejô a mam bia kuli anyu. Nde ñhe Yésus a jô na: “Me ajô mia na, bikobôkobô bise bôt be aye kobô, be aye yalane bise môs Zambe a ye tyi’i mejô. Amu wo aye kabe a mejô môé, wo aye fe ku a mejô môé.”​—Matthieu 12:36, 37.

Ja’a na Yésus a bo beta mesimba, bescribe a Bepharisien ba kômbô yene mam mefe. Ba jô nye na: “A Ñye’ele bôt, bi akômbô yen ndem wo aye bo.” To’o bebien ba te yen ane Yésus a bo mesimba nge momo, abui bôt e ne ngule ya bo’olô mam mese Yésus a bo. Yésus a ne ñhe ngule ya yalane betebe ôsu Bejuif na: “Bôte ya miaé wu be ne abé a bijabô be ajeñ ndem: me aye ve be ndem, ve ndeme Jonas nkulu mejô.”​—Matthieu 12:38, 39.

Yésus a nji jô’é na be ve’e befe’e a jam a te jô, nde a jô na: “Aval ane Jonas a nga to môse mila, a melu fe mela abume beta kos; nalé fe Mone môt a ye tabe môse mila a melu fe mela soñe si.” Beta kos a nga mine Jonas, ve a nga su’ulane kui abume kos, fo’o ve ane a beta wômô. Ane Yésus a liti na, émien a ye wu, a e môse lale a ye beta wômô. Éyoñe jam ete da ye boban, betebe ôsu Bejuif ba ye bene “ndeme Jonas,” a kate kôñelane minlem a tyendé. (Matthieu 27:63-66; 28:12-15) Ve, “bôte ya Ninive” be be nga kôñelane minlem éyoñe Jonas a nga kate be mejô me Zambe. Nde ba ye bo ngule ya ve miaé bôte wu mekua. Yésus a liti fe na, minga a mbe njô bôte ya Sheba a ye fe ve  be mekua. A nga kômbô yeme fe’e Salomon a bili, a a nga ku avem a fe’e jé. Ve Yésus a liti na, “môt a ne va a dañe Salomon.”​—Matthieu 12:40-42.

Yésus a ve’e miaé bôte wu a môt a mbe a bili mbia nsisime nyul. (Matthieu 12:45) Amu môt ate a nji jalé nsisime wé a mbamba be mam, mbia nsisim ate a beta so a mi mivo’o zangbwal mia dañ abé a lôt émien. Aval ete da da, be nga fubu a saé ayoñ Israël, fo’o ve aval ane be nga vaa môt ate mbia nsisim. Ve ayoñ e nga bene bekuli mejô Zambe a nga lôme be, akui na be bene Yésus, nnye ate e mbe é yené ne fômelé na a bili nsisime Zambe. Été jap é nto fo’o angôndô y’abé a dañ atata’a.

Nté Yésus a kobô, nyia a bobenyañe bé ba suan, a ba tebe jama bôt e fefel. Bôte be to Yésus bebé ba jô nye na: “Nyua a bobenyoñe bôé be tele atan, be akômbô yene wo.” Ane Yésus a liti na, ba be beyé’é bé be ne nlatan, be ne fo’o ane bobenyañ, bekal, a nyia wé. Nye ve same wo, a liti’i beyé’é bé, a jô’ô na: “Nyia wom a bobejañe bam be ne ba be awô’ô mejô me Zambe, a bo me.” (Luc 8:20, 21) A mboon ôte, a liti na, minkañe mia late nye a nda bôte jé mi kusa bo ngul, mi mia late nye a beyé’é bé mmie mia dañe dia. Avale mbamba jam ete éyoñe bi bili ngul élat a bobejañ a bekale ya nsisim, e dañe dañ éyoñe bôte bevo’o be nji tabe ndi a bia, nge na ba komekane bia amu mbamba be mam bia bo!