Yezu be jinaw gwɛnna ka bɔ mɔgɔw la Ala ka fanga sababu la. Nka, diinan kuntigiw kɛtɔ ka ban o la, u ka teli ka hakili senu tɔgɔ tiɲɛ. O la do, u bena tugu jɔn lo kɔ? Ala wala Sutana? Yezu y’a fɔ ko: “Yiriɲuman deen ka di, nga yirijugu deen man di, bari yiri be lɔn a deen fɛ.”—Matiyo 12:33.

K’a fɔ ko Yezu be jinaw gwɛnna ka bɔ mɔgɔw la Sutana lo barika la, o ye hakilintanyako lo ye. Yezu ye kalanba min kɛ kulu kan, a y’a ɲɛfɔ ka gwɛ ko ni yiriden ka ɲi, o kɔrɔ ko a yiri lo ka ɲi, a tolinin tɛ. O la do, Fariziɲɛw ye jalaki kuma minw fɔ Yezu ma, u be mun lo yira? K’olu yɛrɛ tolinin lo. Yezu y’a fɔ u ye ko: “Aw minw ka jugu i n’a fɔ fɔnfɔnni, aw be se ka kumaɲuman fɔ cogo di, bari aw ka jugu. Mɔgɔ dusu fanin be fɛɛn min na, a daa b’o le fɔ.”—Matiyo 7:16, 17; 12:34.

Tiɲɛn na, an ka kumaw b’a yira min b’an dusukun na. Ala bena basigi o lo kan k’an kiti. O kama, Yezu y’a fɔ ko: “Ne b’a fɔ aw ye ko Ala bena mɔgɔw kiti loon min na, u ye kuma kuntan minw bɛɛ fɔ, a bena u ɲininga u fɔkun na. Ala bena i kiti ka kɛɲɛ n’i ka dalakuma ye. O sababu la, Ala be joo d’i ma, walima a b’i jalaki.”—Matiyo 12:36, 37.

Yezu ye kabakow kɛ. Nka sariya karamɔgɔw ni diinan kuntigiw b’a fɛ a ka dɔ kɛ olu ɲɛɛ na. U ko: “Karamɔgɔ, an b’a fɛ i ka taamashyɛn kabakoma dɔ kɛ an ɲɛ na.” U ye Yezu ka kabakow ye wo, u m’u ye wo, mɔgɔ caaman be se ka seereya kɛ o koo la. O kama, Yezu y’a fɔ o diinan kuntigiw ye ko: “Bi mɔgɔ juguw jatɔw bɛ taamashyɛn ɲini, nka taamashyɛn si tɛna jira u la ni kira Jonasi ta tɛ.”—Matiyo 12:38, 39, ABM.

Yezu ma taga k’u to ten. A y’a ka kumaw ɲɛfɔ u ye. A ko: “Jigɛba ye Zonasi kunu a ye tile saba ni suu saba kɛ a kɔnɔ cogo min na, Mɔgɔ Dencɛ fana bena tile saba, ni suu saba kɛ kaburu kɔnɔ ten.” Jɛgɛba sifa dɔ tun ye Zonasi kunu, nka a nana a fɔɔnɔ kɔfɛ. A kɛra i n’a fɔ a sara ka kunu le. O cogo la, Yezu be kɔn k’a fɔ ko ale bena sa ani ka kunu a tile sabanan loon. O koo kɛra tuma min na, Yahutuw ka diinan kuntigiw ma sɔn o tagamasiɲɛ na min bɔnin be Zonasi ta ma. U banna ka nimisa ani k’u sɔɔn yɛlɛma (Matiyo 27:63-66; 28:12-15). Nka, “Ninivukaw” ye Zonasi ka waajuli lamɛn ani u nimisara. O kama, u bena Yezu ka wagati mɔgɔw jalaki. Yezu y’a fɔ ko Seba masamuso ka ɲɛyirali fɛ, ale bena o mɔgɔw jalaki. O muso tun b’a fɛ ka Solomani ka hakilitigiya kumaw mɛn, ani u y’a kabakoya. Nka Yezu y’a fɔ ko: “Mɔgɔ be yan min lɔyɔrɔ ka bon ni Solomani ta ye.”—Matiyo 12:40-42.

 Yezu ye a ka wagati mɔgɔw ka koo suma ni cɛɛ dɔ ye, jina bɔra min na (Matiyo 12:45). Jina bɔra ka yɔrɔ lakolon min to, komi o cɛɛ ma foyi kɛ k’o datugu ni fɛɛn ɲuman ye, jina nin kɔsegira ka na ni jina wolonfila ye minw ka jugu n’ale yɛrɛ ye. O cogo kelen na, Ala tun ye Israɛldenw saniya ani k’u kolo, i n’a fɔ jina bɔra cɛɛ min na. Nka Israɛl siya banna Ala ka kiraw la, fɔɔ ka Yezu kɛlɛ yɛrɛ, k’a sɔrɔ a tun gwɛnnin lo ko Ala ka hakili senu be ale lo kan. O b’a yira ko Israɛl ka koow cogoya ka jugu ka tɛmɛ fɔlɔ ta kan.

Ka Yezu to kuma na, a bamuso n’a dɔgɔninw nana ani u lɔra jama gɛrɛfɛ. Minw tun siginin be Yezu kɔrɔ, olu dɔw y’a fɔ a ye ko: “I baa n’i dɔgɔninw lɔnin be kɛnɛma k’u mako b’i la.” Yezu y’a yira ko a nɔrɔnin lo kosɔbɛ a ka kalandenw na. A b’u jati i n’a fɔ a balimacɛw n’a balimamusow ani a bamusow. A y’a bolo sin a ka kalandenw ma ani a y’a fɔ ko: “Mɔgɔ minw be u tulo malɔ Ala ka kuma na k’a sira taama, olu le ye ne baa ni ne dɔgɔninw ye.” (Luka 8:19-21). Yezu b’a yira o cogo la ko hali n’a somɔgɔw koo ka di a ye cogo o cogo, a ka kalandenw koo ka gwɛlɛ a ma ka tɛmɛ a somɔgɔw kan. Jɛnɲɔgɔnya barikaman min be an n’an kerecɛnɲɔgɔnw cɛ, o b’an dusu saalo haali, sanko ni dɔw be sigasiga an na wala n’u b’an kɔrɔfɔ an ka koo ɲumanw kosɔn!