Na wekantọ lẹ po Falesi lẹ po ma kẹalọyi dọ Jesu yàn aovi lẹ jẹgbonu gbọn huhlọn Jiwheyẹwhe tọn gblamẹ wutu, owù lọ tin dọ yé to nùzan do gbigbọ wiwe go. Enẹwutu, adà mẹnu tọn mẹ wẹ yé na nọ—Jiwheyẹwhe tọn kavi Satani tọn? Jesu dọmọ: “Eyin mìwlẹ hẹn atin lọ yin dagbe, sinsẹ́n etọn na yin dagbe, kavi eyin mì hẹn atin lọ yin ylankan, sinsẹ́n etọn nasọ yin ylankan, na gbọn sinsẹ́n atin de tọn dali wẹ yè do nọ yọ́n ẹn.”—Matiu 12:33.

Nulunu wẹ e yin nado sawhẹdokọna Jesu dọ huhlọn Satani tọn wẹ e yí do to sinsẹ́n dagbe lọ detọ́n, enẹ wẹ aovi lẹ yinyan jẹgbonu. Dile Jesu hẹn ẹn họnwun hezeheze to Yẹwhehodidọ Osó ji tọn mẹ do, eyin atin de yin dagbe, dagbe wẹ sinsẹ́n etọn na yin ga, e ma na yin ylankan. Enẹwutu, etẹwẹ sinsẹ́n Falesi lẹ tọn, enẹ wẹ owhẹ̀ nulú tọn he yé to sisadokọna Jesu lẹ dohia? Dọ atin ylankan lẹ wẹ yé. Jesu dọna yé dọmọ: “Mì ovi amàpoe tọn lẹ, nawẹ mì sọgan dọ onú dagbe lẹ gbọn to whenuena e yindọ mẹylankan wẹ mìwlẹ yin? Na sọn susugege nuhe tin to ahun mẹ lẹ tọn mẹ wẹ onù nọ dọtọ́n.”—Matiu 7:16, 17; 12:34.

Mọwẹ, nuhe mí nọ dọ lẹ nọ do ninọmẹ ahun mítọn tọn hia bo yin dodonu de na whẹdida. Enẹwutu, Jesu dọmọ: “Yẹn dọna mì dọ ohó ovọ́ he gbẹtọ lẹ dọ lẹpo wẹ yé na dogbè etọn to Whẹdazangbe; na gbọn ohó towe lẹ dali wẹ hiẹ na yin lilá di dodonọ, podọ gbọn ohó towe lẹ dali wẹ hiẹ na yin whẹgbledo.”—Matiu 12:36, 37.

Mahopọnna azọ́n huhlọnnọ he Jesu to wiwà lẹ, wekantọ lẹ po Falesi lẹ po biọ ohia devo dọmọ: “Mẹplọntọ, míwlẹ jlo na mọ ohia de sọn dè we.” Vlavo yelọsu lẹ mọ ẹn bọ e to azọ́njiawu lẹ wà kavi lala, mẹsusu yí nukun yetọn do mọ azọ́njiawu he wà e te lẹ. Enẹwutu, Jesu sọgan dọna sinsẹ̀ngán Ju enẹlẹ dọmọ: “Whẹndo ylankan podọ ayọdetọ de to ohia de dín mapote, ṣigba ohia de ma na yin nina ẹn adavo ohia Jona yẹwhegán lọ tọn.”—Matiu 12:38, 39.

Jesu hẹn nuhe dọ e te họnwun na yé madọngbàn dọmọ: “Kẹdẹdile Jona nọ adọ̀go whèvi daho lọ tọn mẹ na okle atọ̀n ozán atọ̀n do, mọkẹdẹ wẹ Visunnu gbẹtọ tọn na nọ aigba homẹ na okle atọ̀n ozán atọ̀n do niyẹn.” Whèvi daho de ze Jona mì, amọ́ ewọ wá tọ́njẹgbonu taidi dọ e yin finfọnsọnku wẹ nkọ. Jesu gbọnmọ dali bo dọ dọdai dọ emi lọsu na kú bo na yin finfọn to azán atọ̀ntọ gbè. To whenue enẹ wá jọ, sinsẹ̀ngán Ju lẹ gbẹkọ ‘ohia Jona tọn’ lọ go bo gbẹ́ nado lẹnvọjọ bosọ diọ. (Matiu 27:63-66; 28:12-15) To vogbingbọn mẹ, “omẹ Nineve tọn lẹ” lẹnvọjọ to whenue Jona dọyẹwheho na yé. Enẹwutu, yé na gblewhẹdo whẹndo ehe. Jesu sọ dohia dọ gbọn apajlẹ etọn dali, ahọsi Ṣeba  tọn na gblewhẹdo yé ga. Ewọ jlo na sè nuyọnẹn Sọlomọni tọn bọ nuyọnẹn etọn sọ hẹn awuji i. Todin, Jesu dọ dọ “mẹde he hugan Sọlomọni tin tofi.”—Matiu 12:40-42.

Jesu yí ninọmẹ whẹndo ylankan ehe tọn jlẹdo mẹde he mẹ gbigbọ mawé tọ́n sọn go. (Matiu 12:45) Na mẹlọ ma yí nudagbe lẹ do sú odò lọ wutu, gbigbọ ylankan lọ lẹkọwa po gbigbọ ṣinawe devo lẹ po he ylanhu ewọ lọsu bọ yé nọ ewọ mẹ. Mọdopolọ, akọta Islaeli tọn ko yin kiklọ́we bo yin hinhẹn jẹ yọyọ—taidi mẹhe mẹ gbigbọ mawé tọ́n sọn lọ. Ṣigba, akọta lọ gbẹ́ yẹwhegán Jiwheyẹwhe tọn lẹ dai kaka bo wá diọnukunsọ Jesu, yèdọ mẹhe e họnwun dọ gbigbọ Jiwheyẹwhe tọn tin to e ji. Ehe dohia dọ ninọmẹ akọta lọ tọn ylanhu lehe e te do to bẹjẹeji.

Dile Jesu to hodọ, onọ̀ etọn po nọvisunnu etọn lẹ po wá bo ṣite to gbẹtọgun lọ pá. Delẹ to mẹhe sinai sẹpọ Jesu lẹ mẹ dọna ẹn dọmọ: “Onọ̀ towe po nọvisunnu towe lẹ po to ote to gbonu bo to jijlo nado mọ we.” Whenẹnu wẹ Jesu do lehe ewọ vẹ́ po devi etọn lẹ po sọ hia, yèdọ mẹhe taidi nọvisunnu, nọviyọnnu po onọ̀ jọnun lẹ po na ẹn. Dile e dlẹnalọ etọn hlan devi etọn lẹ, e dọmọ: “Onọ̀ ṣie po nọvisunnu ṣie lẹ po wẹ omẹ ehelẹ he nọ sè ohó Jiwheyẹwhe tọn bo nọ basi i.” (Luku 8:20, 21) Gbọnmọ dali, e dohia dọ mahopọnna lehe kanṣiṣa he tin to ewọ po hẹnnumẹ etọn lẹ po ṣẹnṣẹn họakuẹ sọ, haṣinṣan he e tindo hẹ devi etọn lẹ tlẹ sọ họakuẹ humọ. Homẹmiọnnamẹnu nankọ die e yin na mí nado tindo haṣinṣan pẹkipẹki mọnkọtọn hẹ mẹmẹsunnu mítọn lẹ, titengbe to whenue mẹdevo lẹ nọ vẹnudo mí kavi ṣàn míwlẹ po azọ́n dagbe mítọn lẹ po kò!