Jesus udah muru melikat ti jai enggau bantu ari kuasa kudus Petara. Tang, bala penulis Adat enggau orang Parisi nyangkal utai tu. Pengawa sida ulih ngujungka sida ngelaban kuasa kudus Petara. Nya alai, kati sida deka nyukung Petara tauka Sitan? Jesus madahka: “Enti pun kayu kita galak, iya deka mansutka buah ti manah. Tang enti pun kayu kita buruk, iya deka mansutka buah ti jai. Ari buah, kita ulih ngelala baka ni pun kayu nya.”—Matthew 12:33.

Jesus ngasilka buah ti manah. Nya kebuah iya, Jesus ulih muru melikat ti jai. Tang, orang nuduh iya bekerejasama enggau Sitan. Jaku tuduh nya tentu enda masuk akal. Baka ke kala diajar Jesus lebuh iya meri Jaku Ajar ba Atas Bukit, pun kayu ti galak tentu deka ngasilka buah ti manah. Nyadi, nama reti iya lebuh orang Parisi nuduh Jesus? Reti iya, sida ngasilka buah ti enda manah. Ku Jesus madah ngagai sida: “Kita anak ular ti bisa. Baka ni ku kita ulih nyebut utai ti manah enti kita empu endang jai? Laban utai ti disebut orang datai ari ati.”—Matthew 7:16, 17; 12:34.

Jaku kitai nunjukka utai ke bisi dalam ati kitai, lalu kitai deka diakim nitihka utai ke disebut kitai. Nya alai, Jesus madahka: “Aku madah ngagai kita: Lebuh Hari Pechara ila, mensia deka diakim ke tiap iti leka jaku ti enda beguna ke disebut sida. Ketegal utai ti disebut kita, kita deka dikumbai lurus. Lalu ketegal utai ti disebut kita, kita deka diakim.”—Matthew 12:36, 37.

Jesus udah ngereja mayuh pengawa ti luar biasa. Tang, bala penulis Adat enggau orang Parisi agi enda puas ati. Ku sida madahka: “Pengajar, beri meh kami tanda kena nunjukka nuan amat dianjung Petara.” Enda ngira sekalika sida empu bisi meda Jesus ngereja kereja ajih tauka enda, iya ke amat, udah bisi mayuh orang nyadi saksi mata ke pengawa Jesus. Nya alai, Jesus madah ngagai tuai pengarap orang Judah: “Kita tu rebak ti jai sereta enda taluk ngagai Petara. Kita suah amat minta tanda, tang nadai tanda deka diberi ngagai kita kelimpah ari tanda Nabi Jonah.”—Matthew 12:38, 39.

Jesus nerangka reti jaku ke disebut iya: “Baka Jonah ke dalam perut ikan ti besai pengelama tiga hari tiga malam, baka nya meh Anak Mensia deka mengkang dalam pendam pengelama tiga hari tiga malam.” Suba, Jonah kala ditelan ikan ti besai. Udah nya, iya baka ke diangkatka idup baru maya iya pansut ari ikan nya. Jesus madahka, iya empu deka mati lalu diangkatka idup baru ba hari ti ketiga. Lebuh maya nya, tuai pengarap orang Judah nulak “tanda Nabi Jonah,” laban sida enggai nesal ati sereta berubah.  (Matthew 27:63-66; 28:12-15) Tang “orang Nineweh” nesal ati pengudah Jonah nginjil ngagai sida. Nyadi, orang Nineweh nunjukka orang Judah ba jeman Jesus nya besalah. Jesus mega madahka, teladan kuin ari selatan deka nunjukka penyalah orang Judah. Tu ketegal, kuin nya deka mendingka penalam penemu Solomon. Tang Jesus madahka, “ba ditu bisi orang ke besai agi ari Solomon.”—Matthew 12:40-42.

Jesus nyemaka rebak ti jai maya nya enggau siku lelaki ke udah dilepaska ari siku melikat ti jai. (Matthew 12:45) Tang lelaki nya enda ngemenuhka runding iya enggau utai ti manah. Nya alai, melikat ti jai nya mai tujuh iku da agi melikat, ti jai agi ari iya empu lalu sida sama ngerasuk lelaki nya. Sama mega, bansa Israel udah dituchi sereta berubah nyadi manah agi, baka lelaki ke dilepaska ari melikat ti jai nya. Tang udah nya, orang Israel seruran nulak nabi ke dianjung Petara. Ulah sida majak jai nyentukka sida nyakal Jesus, ke bisi kuasa kudus Petara. Tu nunjukka keadaan orang Israel maya nya teruk agi ari suba.

Lebuh Jesus benung bejaku, indai Jesus enggau bala menyadi lelaki iya datai ngiga iya lalu sida bediri ba luar. Sekeda orang ke duduk semak enggau Jesus madahka: “Indai enggau sida menyadi lelaki nuan bisi ba luar. Sida deka betemu enggau nuan.” Pengudah nya, Jesus nunjukka kaul ti rapat ke dikembuan iya enggau bala murid iya. Sida nya baka menyadi lelaki, menyadi indu, sereta indai iya empu. Jesus ngunjurka jari iya ngagai bala murid iya lalu madahka: “Indai aku enggau bala menyadi aku nya orang ke ninga jaku Petara lalu ngereja iya.” (Luke 8:20, 21) Ba Jesus, kaul iya enggau kaban belayan iya amat berega, tang kaul Jesus enggau bala murid iya jauh agi berega ari nya. Baka nya mega, kitai rapat enggau bala menyadi Kristian kitai. Sida deka ngeringka kitai taja pan orang bukai kakang ati enggau kitai, tauka nyakal kitai enggau pengawa kitai. Endaka tu ngelantangka ati kitai?