Yĩla aandĩki na Avalisi maleile kana Yesũ aumasya ndaimoni kwa vinya wa Ngai, maĩ matonya kũlika naĩnĩ ya kũuma veva mũtheu. Ĩndĩ, mo mesaa kũnyuva kwĩthĩwa ngalĩko ya Ngai kana nĩ ya Satani? Yesũ ameie atĩĩ: “Vandai mũtĩ mũseo na ũsyao waw’o ũkeethĩwa mũseo, kana mũvande mũtĩ mũthũku na ũsyao waw’o ũkeethĩwa mũthũku, nũndũ mũtĩ ũmanyĩkaa kwĩsĩla ũsyao waw’o.”—Mathayo 12:33.

Yĩla Yesũ waumisye ndaimoni eekie maũndũ maseo, kana kwa ndeto ingĩ, maũndũ asu weekie maĩ ũsyao mũseo. Kwoou nĩ ũndũ wa ũtumanu kwasya kana yĩla Yesũ weekie maũndũ asu amũthũkũmaa Satani. O tondũ Yesũ waeleisye nesa nthĩnĩ wa Ũtavany’a wa Kĩĩmanĩ, ethĩwa ũsyao nĩ mũseo, o naw’o mũtĩ nĩ mũseo. Kwoou, ũsyao wa Avalisi, ũla nĩ ndeto nthũku ila mamũneeneaa Yesũ, woonanasya ata? Woonanasya kana nĩ athũku. Yesũ ameie atĩĩ: “Inyw’ĩ ũsyao wa nzoka mbai, mũtonya ata kũneena maũndũ maseo na mwĩ athũku? Nũndũ kĩla kyusũĩte ngoonĩ nĩkyo kanyw’a ũneenaa.”—Mathayo 7:16, 17; 12:34.

Kwa w’o, ndeto sitũ syonanasya kĩla kĩ ngoonĩ yitũ, na ndeto isu nĩsyo ikatuma Yeova na Yesũ mamanya ũndũ meũtũsilĩla. Nĩkyo kĩtumi Yesũ waisye atĩĩ: “Nĩngũmwĩa kana andũ makaumya ũtalo Mũthenya wa Sila kumana na ndeto o na yĩva ĩtatethya ĩla maneenaa; nũndũ kwa ndeto syaku ũkatalĩlwa ũlũngalu, na kwa ndeto syaku ũkasilĩlwa.”—Mathayo 12:36, 37.

O na kau Yesũ nĩweekaa syama mbingĩ, aandĩki na Avalisi mendaa eke maũndũ maingĩ kwĩ asu. Mamwĩie: “Mũmanyĩsya, twĩenda kwona kyama kuma kwaku.” Methĩwe nĩmoonete Yesũ ayĩka syama kana mayoonete, ve andũ aingĩ meeyooneete ayĩka syama na maĩ matonya kũkũsĩĩa ĩũlũ wa maũndũ ala Yesũ weekie. Kwoou, Yesũ atavisye atongoi asu Ayuti atĩĩ: “Inyw’ĩ nzyawa nthũku na yusĩe ũlaalai, mũendeee kũkũlya nĩmwony’e kyama, ĩndĩ vaiĩ kyama mũkona ate o kĩla kya mwathani Yona.”—Mathayo 12:38, 39.

Yesũ ndaamatia matesĩ kĩla wamatavasya, ameie atĩĩ: “Nũndũ o tondũ Yona waĩ ĩvunĩ ya ĩkũyũ ĩnene mĩthenya ĩtatũ ũtukũ na mũthenya, now’o Mwana wa mũndũ ũkekala ngoonĩ ya nthĩ mĩthenya ĩtatũ ũtukũ na mũthenya.” Yona nĩwamelilw’e nĩ ĩkũyũ ĩnene ĩndĩ ĩtina wa mĩthenya ĩtatũ auma ĩkũyũnĩ yĩu o ta mũndũ wathayũũkw’a. O nake Yesũ mwene nĩwawetie kana akakw’a na ĩtina wa mĩthenya ĩtatũ aithayũũkw’a. Yĩla ũndũ ũsu wesie kwĩthĩwa, atongoi Ayuti nĩmaleile ‘kyama kya Yona’ kwa kũlea kwĩlila na kũalyũka. (Mathayo 27:63-66; 28:12-15) Kĩvathũkany’o na atongoi  asu, “andũ ma Nineva” nĩmeelilile ĩtina wa Yona kũmatavya ũvoo mũseo. Kwoou, andũ ma Nineva makavuany’a naĩ sya atongoi asu. Yesũ asyokie aweta ĩũlũ wa ngelekany’o ya mũsumbĩ mũndũ mũka wa ngalĩko ya ĩtheo, kana wa Sieva, ũla kwĩsĩla maũndũ ala weekie ũkavuany’a naĩ sya andũ asu. Mũsumbĩ ũsu nĩwendaa kwĩw’a mũno ĩũlũ wa ũĩ wa Solomoni, na yĩla weewie ũndũ Solomoni waĩ na ũĩ wingĩvĩte nĩwaseng’ie mũno. Ĩndĩ, Yesũ aendeeie kwasya, “mũndũ mũnene kwĩ Solomoni e vaa.”—Mathayo 12:40-42.

Yesũ aelekanisye nzyawa ĩsu nthũku na mũndũ waumiw’e maveva mavuku. (Mathayo 12:45) Nũndũ mũndũ ũsu ndaausũsya syĩndũ nzeo vala vaumie veva ũsu mũthũku, veva ũsu mũthũku nĩwasyokie wĩ na maveva angĩ mũonza mathũku kwĩ ala waĩ namo na mamũlika. O ta ũu, mbaĩ ya Isilaeli yaĩ ĩnathew’a na ĩkaalyũka, o tondũ kweethĩiwe kwa ũla mũndũ ĩtina wa veva mũthũku kuma nthĩnĩ wake. Ĩndĩ mbaĩ ĩsu nĩyaleile athani ma Ngai, na mwĩkalĩle ũsu woo wesa kũtuma mbaĩ ĩsu ĩmũvĩnga ũla waĩ na veva wa Ngai, nake nĩ Yesũ. Ũndũ ũsu nĩwoonanisye kana mbaĩ ĩsu yaĩ nthũku kwĩ ũndũ yailyĩ mwambĩĩonĩ.

Yesũ aendeee kũneena, inyia wake na ana-a-inyia nĩmavikie na maũngama vakuvĩ na ĩkomano ya andũ. Andũ amwe mekalĩte vakuvĩ nake mamwĩie atĩĩ: “Inyia waku na ana-a-inyia maku maũngamĩte vaya nza mayenda kũkwona.” Yesũ nĩwoonanisye ũndũ waĩ na ngwatanĩo ya vakuvĩ na amanyĩw’a make ala wamonaa ta ana-a-inyia, eĩtu-a-inyia, na inyia. Nĩwatambũũkisye kw’oko kwake kwelekela amanyĩw’a make na asya: “Inyia wakwa na ana-a-inyia makwa nĩ aa ala mew’aa ndeto ya Ngai na kũmĩka.” (Luka 8:20, 21) Kwa kwĩka ũu nĩwoonanisye kana o na kaũ nĩwendete andũ make ma mũsyĩ, ngwatanĩo yake na amanyĩw’a make nĩyo ya vata vyũ. Nĩ ũndũ wa vata kwitũ kwĩthĩwa na ngwatanĩo ya vakuvĩ na ana-a-asa maitũ na mũno mũno yĩla andũ angĩ meethĩwa na nzika ĩũlũ witũ kana maneena maũndũ mathũku kwelekela wĩa witũ!