Nĩ ũndũ wa kũrega atĩ Jesu arahũthĩra roho wa Ngai kũruta ndaimono, andĩki-Watho na Afarisai marĩ ũgwati-inĩ wa kũruma roho mũtheru. Gũkĩrĩ ũguo-rĩ, mekũrũgama mwena wa Ngai kana wa Shaitani? Jesu akoiga ũũ: “Angĩkorũo inyuĩ mũrĩ mũtĩ mwega, maciaro manyu marĩkoragwo marĩ mega, no angĩkorũo mũrĩ mũtĩ mũru, maciaro manyu marĩkoragwo marĩ moru, nĩ gũkorũo mũtĩ ũmenyekaga na maciaro maguo.”​—Mathayo 12:33.

Nĩ ũrimũ kuuga atĩ maciaro mega ma kũingata ndaimono maroimana na Jesu gũkorũo agĩtungatĩra Shaitani. O ta ũrĩa Jesu onanirie wega Mahunjio-inĩ make ma Kĩrĩma-inĩ, angĩkorũo maciaro nĩ mega, mũtĩ o naguo nĩ mwega, ti mũbuthu. Kwoguo maciaro ma Afarisai, thitango ciao cia ũrimũ kwerekera Jesu ironania atĩa? Atĩ nĩ abuthu. Jesu akameera: “Inyuĩ njiarũa cia nyoka, mũngĩhota atĩa kwaria maũndũ mega na mũrĩ oru? Tondũ kanua karagia kĩrĩa kĩiyũire ngoro.”​—Mathayo 7:​16, 17; 12:34.

Ciugo citũ cionanagia kĩrĩa kĩrĩ ngoro-inĩ citũ, na igakorũo irĩ mũthingi wa gũtuĩrũo cira. Kwoguo Jesu akoiga ũũ: “Ngũmwĩra atĩrĩ, ũndũ o wothe wa tũhũ andũ maragia, nĩ magaacirithio nĩ ũndũ waguo Mũthenya wa Cira; tondũ ciugo ciaku nĩcio igaatũma ũtuwo mũthingu, kana itũme ũtuĩrũo.”​—Mathayo 12:​36, 37.

O na gũtuĩka Jesu nĩ areka maũndũ ma hinya, andĩki-Watho na Afarisai no marenda makĩria, makamwĩra: “Mũrutani, tũkwenda kuona ũkĩringa kĩama.” O na akorũo o nĩ meyoneire kana matiĩyoneire, kũrĩ na ũira wa andũ aingĩ meyoneire na maitho maũndũ marĩa Jesu areka. Nĩkĩo Jesu arera atongoria acio Ayahudi ũũ: “Inyuĩ rũciaro rũrũ rũru na rũtharia, mwendaga kuona kĩama, no gũtirĩ kĩama mũkaaringĩrũo o tiga kĩrĩa kĩa mũnabii Jona.”​—Mathayo 12:​38, 39.

Jesu ndekũmatiga magĩĩciria ũrĩa arenda kuuga, akameera ũũ: “O ta ũrĩa Jona aarĩ thĩinĩ wa nda ya thamaki nene mĩthenya ĩtatũ ũtukũ na mũthenya, noguo Mũrũ wa mũndũ arĩkorũo thĩinĩ wa mbĩrĩra mĩthenya ĩtatũ ũtukũ na mũthenya.” Jona aameririo nĩ thamaki nene, no agĩcoka akiuma ta arĩ kũriũkio aariũkirio. Kwoguo Jesu akoiga atĩ o nake nĩ agaakua na mũthenya wa gatatũ ariũkio. Thutha-inĩ gwekĩka ũguo, atongoria Ayahudi makarega ‘kĩama kĩa Jona,’ makaaga kwĩrira na gũcenjia. (Mathayo 27:​63-66; 28:​12-15) Ngũrani nao, “andũ a Nineve” nĩ meeririre thutha wa kũhunjĩrio nĩ Jona. Nĩ ũndũ ũcio, nĩ magaatuĩra rũciaro rũrũ. Jesu ningĩ akoiga atĩ mũtumia ũrĩa warĩ mũthamaki wa mwena wa mũhuro, nĩ akaamatuĩra o nake kũgerera kĩonereria gĩake. Nĩ  eerirĩirie mũno kũigua ũũgĩ wa Suleimani na akĩgegio nĩguo. Rĩu Jesu akoiga, “haha harĩ na mũndũ ũkĩrĩte Suleimani.”​—Mathayo 12:​40-42.

Jesu akaringithania rũciaro rũu rũru na mũndũ ũrutĩtwo roho mũru. (Mathayo 12:45) Tondũ wa mũndũ ũcio kwaga gũthinga ithenya rĩu rĩatigwo akĩhũthĩra maũndũ mega, roho ũcio ũgacoka na maroho mangĩ mũgwanja moru kũũkĩra na makaingĩra thĩinĩ wake. Ũndũ ũmwe na ũcio, rũrĩrĩ rwa Isiraeli nĩ rwatheretio na rũgacenjia, o ta mũndũ ũcio ũrutĩtwo roho mũru. No rũkĩrega anabii a Ngai, na marigĩrĩrio-inĩ rũkaregana na Jesu, o we ũroneka hatarĩ nganja atĩ arĩ na roho wa Ngai. Ũndũ ũcio ũkonania atĩ rũrĩrĩ rũu rũthũkĩte kũrĩ ũrĩa rwarĩ hau kabere.

O Jesu akĩaragia, nyina na ariũ a nyina magoka na makarũgama thutha wa kĩrĩndĩ. Amwe arĩa maikarĩte hakuhĩ nake makamwĩra: “Maitũguo na ariũ a maitũguo marũgamĩte nja, makĩenda gũkuona.” Jesu agacoka akonania ũrĩa aiguaga ena ũkuruhanu wa hakuhĩ na arutwo ake, arĩa matariĩ ta ariũ a nyina, aarĩ a nyina, na nyina harĩ we. Agatambũrũkia guoko gwake kwerekera arutwo ake, akoiga: “Maitũ na ariũ a maitũ nĩ aya maiguaga kiugo kĩa Ngai na magagĩathĩkĩra.” (Luka 8:​20, 21) Na njĩra ĩyo akonania atĩ o na akorũo ũrĩa metainwo na andũ ao nĩ kwa bata, ũrĩa metainwo na arutwo ake nĩ kwa bata o na makĩria. Na githĩ ti ũndũ wa gũcanjamũra harĩ ithuĩ gũkorũo na ũkuruhanu ta ũcio na aarĩ na ariũ a Ithe witũ a kĩĩroho, na mũno rĩrĩa andũ angĩ matwĩkĩrĩra nganja kana matũũkĩrĩra nĩ ũndũ wa wĩra witũ mwega?