Banembeshi ne Bafaliseo byo baambilenga’mba Yesu kechi upanga bandemona na bulume bwa Lesa ne, baubilenga mwenga mupashi wazhila. Pano bajinga ku lubaji lwa kwa ñanyi? Kwi Lesa nyi, inyi kwi Satana? Yesu wibambijile’mba: “Anweba mwakonsha kulengela kichi kuwama ne bipangwa byakyo kuwama, nangwa kutamisha kichi ne bipangwa byakyo kumo, mambo kichi bekiyukila ku bipangwa byakyo.”—Mateo 12:33.

Mu mwingilo wa kwa Yesu wa kupanga bandemona mwafumine bipangwa byawama. Onkao mambo, kyatamine bingi kwambila Yesu amba waingijilenga mwingilo wajinga wa kwa Satana. Byonkatu Yesu byo aambile mu Jashi janji ja pa Mutumba, umvwe bipangwa byawama, ko kuba’mba kichi nakyo kyawama, kechi kyatama ne. Pano bino, bipangwa byatama bya Bafaliseo byo bapelengamo Yesu mambo a bubela ne kumulengulula byamwesheshenga ka? Byamwesheshenga’mba bajinga na muchima watama. Yesu wibambijile’mba: “Anweba baana ba miloolo, mwakonsha kwamba byepi bintu byawama byo muji babi? Mambo kanwa kamba monka mwavujila biji mu muchima.”—Mateo 7:16, 17; 12:34.

Kya kine, byo twamba bisolola biji mu michima yetu kabiji byo biketulengela kuzhatwa nangwa kubinga. Onkao mambo, Yesu waambile’mba: “Kine nemwambila namba, bantu bakatotolola pa Juba ja Kije, pa byambo byonse byatu byo bamba; mambo bakemubingisha na byambo byenu kabiji na byambo byenu byonka bakemuzhachisha.”—Mateo 12:36, 37.

Nangwa Yesu waubile mingilo ya kukumya, banembeshi ne Bafaliseo bakebelenga’mba obepo ne bikwabo. Bamwambijile’mba: “Mufunjishi, tumweshaipo kiyukilo.” Nangwa inge kya kuba bano bantu kechi bemwenejilepo bya kukumya byaubile Yesu ne, bino kwajinga bantu bavula bingi bamwene bakonsheshe kushimikizha bino bintu. Onkao mambo, Yesu waambijile bantangi ba Bayudea amba: “Kisemi kibi kabiji kya bankende kikebatu kumona kiyukilo, bino kechi bakekimwesha kiyukilo ne, kana kyonka kya ngauzhi Yona.”—Mateo 12:38, 39.

Pa kulumbulula mwatajile kino, Yesu wanungilepo amba: “Byonkatu Yona byo aikele munda mwa jisabi jikatampe moba asatu mute ne bufuku, ne Mwana muntu naye ukekala moba asatu mute ne bufuku mu kilende.” Byo bamumiine ku jisabi jikatampe, Yona walupukile mu jino jisabi nobe wasanguka. Onkao mambo, Yesu waambijilenga jimo amba ukafwa kabiji pa juba ja busatu ukasanguka. Kimye Yesu kyo asangukile, bantangi ba Bayudea bakaine kino ‘kiyukilo kya ngauzhi Yona,’ ko kuba’mba bakaine kulapila ne kuleka byubilo byabo byatama. (Mateo 27:63-66; 28:12-15) Kupusanako na bantangi ba Bayudea, “bena Ninevwa” balapijile kimye Yona kyo ebasapwijile. O ene mambo bena Ninevwa o bakazhachishisha kino kisemi. Yesu waambile ne pa mfumu wamukazhi  wa ku Sheba byo akamwesha’mba bano bantu bazhatwa. Uno mfumu waishile na kumvwa maana a kwa Solomone kabiji wakuminye bingi pa bintu byo amwene ne kumvwa. Yesu waambile’mba: “Muntu wakila Solomone uji ponka pano.”—Mateo 12:40-42.

Yesu waingijishe kishimpi kya muntu ye bapangilemo ndemona pa kulumbulula kino kisemi kyatama. (Mateo 12:45) Na mambo a kuba’mba awa muntu kechi wayuzhizhe muchima wanji na bintu byawama ne, ndemona wabwelele kabiji waichijilepo ne mipashi ikwabo itanu na ibiji yakilamo kutama, ne kutwela jibiji mu yewa muntu. Mu jishinda jimotu, kisaka kya bena Isalela bekitokeshe nobe muntu ye bapangilemo ndemona. Pano bino, kino kisaka kyakaine bangauzhi ba Lesa, kufikatu ne ku kushikwa Yesu wajinga na mupashi wa Lesa. Kino kyamwesheshe’mba michima yabo yatamine kukila ne byo yajinga kala.

Yesu byo akyambilenga ku jibumba, bainanji ne bankasanji baimene pangye ya jibumba. Muntu umo wamwambijile Yesu amba: “Bainenu ne bankasenu baimana pangye bakeba kwisamba nenu.” Yesu wamwesheshe bulunda bwawama bo ajinga nabo na baana banji ba bwanga, mambo bajingatu nobe bankasanji babalume, banyenga yanji ne bainanji. Byo atanyikijile kuboko kwanji kwajinga baana ba bwanga waambile’mba: “Bamama ne bankasami ke bano bomvwa mambo a Lesa ne kuba byo aamba.” (Luka 8:20, 21) Byo aambile bino, Yesu wamwesheshe’mba nangwa kya kuba balongo banji wibanemekele bingi, bulunda bo ajinga nabo na baana banji ba bwanga bwanemene bingi. Kwikala na bulunda bwawama na balongo betutemwa kwitutekenesha bingi, kikatakata inge bantu ke betuzhinauke nangwa kwitwendeleka pa mingilo yetu yawama.