Asoneki ye Afarisi bayisidi mu vonza kia tianguna mwand’avelela wau bavovele vo Yesu ke mu nkum’a Nzambi ko kevaikisilanga nkuya. Ozevo, nkia sambu bekala, dia Nzambi yovo dia Satana? Yesu ovovele vo: “Avo nukitwidi o nti se wambote, e mbongo andi yambote ikala, kansi avo nukitwidi o nti se wambi, e mbongo andi yambi ikala, kadi konso nti uzayilwanga muna mbongo andi.”—Matai 12:33.

Dia uzowa mu vova vo Yesu mu nkum’a Satana kevaikisilanga nkuya. Nze una Yesu kavova muna Longi diandi vana Mongo, avo mbongo yambote, o nti mpe wambote ukala, ke wambi ko. Ozevo, e mbongo ya Afarisi ye mfundu miau mia uzowa mu kuma kia Yesu, adieyi misongele? Wantu ambi kikilu. Yesu ubavovese vo: “Wan’a mpidi, aweyi nulenda vovela mambu mambote wau nwina yo bi? Kadi muna ntima i mutukanga mana kevovang’o nua.”—Matai 7:16, 17; 12:34.

Kieleka, e mpova zeto zilenda sengomona mana mena muna ntima mieto yo kututwasila e tumbu. Dianu Yesu kavovele vo: “Inuvovese wo vo, konso diambu diakondwa mfunu dina bevova wantu, mbalu betela dio muna Lumbu kia Lufundisu; kadi muna mvovo miaku olungisilwa, muna mvovo miaku mpe oyeleselwa.”—Matai 12:36, 37.

Kana una vo Yesu ovanganga mavangu ma nkuma, asoneki ye Afarisi bamvovese vo: “E Nlongi, sinsu kiaku tuzolele mona.” Kiakala vo ke basidi mona masivi mandi ko, ndonga imonanga mana kevanganga. Dianu vo, Yesu ovovese mfumu za Ayuda vo: “E mbandu ambi ye minta-zumba, nuvavanga mona e sinsu, kansi kana sinsu kimosi ke nusongwa kio ko, nanga sinsu kia Yona wa ngunza kaka.”—Matai 12:38, 39.

I bosi Yesu osasidi mana kavovele, oku vo: “Wauna Yona kakadila mini tatu ye mafuku matatu muna vumu kia mbizi ampwena ya maza, o Mwan’a muntu mpe okala mini tatu ye mafuku matatu muna nsi a ntoto.” Yona waminwa kwa mbizi ampwena, i bosi walukwa nze yandi ofulukidi. Muna diadi, Yesu osakwidi vo osinga fwa yo fuluka muna lumbu kia tatu. Vava divangama, mfumu za Ayuda bebembola e “sinsu kia Yona,” ke besonga luviluku lwa ntima ko ngatu soba kadilu yau. (Matai 27:63-66; 28:12-15) Nswaswani yo yau, “esi Ninive” bavilukwa e ntima vava Yona kabalukisa. Muna kuma kiaki, esi Ninive besinga yelesa e mbandu yayi. Yesu ovovele diaka vo e nona kia ntinu a nkento a Sude mpe kikubayelesa. Nkento a Sude wakala yo luzolo lwa mona ngangu za Solomo, ye wasivika kikilu vava kamona zo. Yesu ovovele vo: “oyu osundidi Solomo una vava.”—Matai 12:40-42.

Yesu otezanese e kadilu kia tandu kiaki kiambi yo muntu ovaikidi mwand’a usafu. (Matai 12:45) Wau vo muntu ndioyo kazadisi mambu mambote mu nyindu andi ko, o mwanda uvaikidi uvutukidi ye mianda nsambwadi miankaka misundidi o bi. Diau dimosi mpe, e zula kia Isaele kiaveleleswa yo vangululwa, nze una mwand’a usafu uvaikidi kwa muntu. Kansi, e zula kia Isaele kibembwele ngunza za Nzambi, yo sia Yesu kitantu, ona una ye mwand’avelel’a Nzambi. E diadi disongele vo e zula kiaki kiambi kikilu, lutila nkutu una kiakala kuna lubantiku.

Ekolo Yesu kevovanga, ngudi andi ye aleke andi balueke, batelamene vana vena ndonga. Akaka bena lukufi yo Yesu bavovele vo: “O ngudi aku ye mpangi zaku batelamene kuna mbazi, bazolele kumona.” I bosi, Yesu ovovele kikundi kena kiau ye alongoki andi ana kayikidi vo ngudi ye mpangi zandi. Osongele alongoki andi o koko, oku vo: “O ngudi ame ye mpangi zame i yau yaya bewanga mambu ma Nzambi yo sadila mo.” (Luka 8:20, 21) Muna mvovo miami, Yesu osongele vo kana una vo e yitu yandi mfunu bena, e kikundi ye alongoki andi kisundidi o mfunu. Dialufiaulwisu mu zaya vo tuna ye ngwizani ambote ye mpangi zeto muna lukwikilu, musungula vava akaka bekatikisanga makani meto ma mwanda, kututumba yo veza mana tuvanganga.