Vaka-kusoneka navaFwaliseu vafwefulwile shipilitu yajila hakuhamika ngwavo Yesu kapwile nakulovola vandemone mungolo jaKalungako. Uno vapwile nakukundwiza Kalunga tahi nyi Satana? Yesu ambile ngwenyi: “Enu yenu mweji kulingisanga mutondo uwahe namihako yawo nawa yiwahe, chipwe kulingisa mutondo upole namihako yawo yipole, mwomwo mutondo vautachikijila kumihako yawo.”—Mateu 12:33.

Chapwile uleya kushinganyeka nge Satana ikiye akafwile Yesu asolole muhako wamwaza hakulovola vandemone. Yesu ahanjikile hatoma muChihande chenyi ChahaPili ngwenyi, nge muhako wamwaza, kaha namutondo nawa wamwaza, keshi wakupolako. Oloze vyuma vaFwaliseu vavangijikilile Yesu vyasolwele nge vapwile namihako yakupola. Yesu avambile ngwenyi: “Enu vana vaviyenge, namuhasa ngachilihi kuhanjika vyuma vyamwaza, okunyi mwapwa muvakuhuka? Mwomwo kanwa keji kuhanjikanga vyuma vinavulu mumuchima.”—Mateu 7:16, 17; 12:34.

Vyuma tweji kuhanjikanga vyeji kusololanga vili mumichima yetu, kaha hakiko navakatusopesela. Ngocho Yesu ambile ngwenyi: “Nangumilweza ngwami vatu navakalyambulula haLikumbi lyaKusopesa hamazu amokomoko osena veji kuhanjikanga. Mwomwo hamazu ove hakiko navakakuvulukila kwoloka, kaha hamazu ove hakiko nawa navakakuwanyina namulonga.”—Mateu 12:36, 37.

Numba tuhu vaka-kusoneka navaFwaliseu vamwene milimo yakukomwesa yize alingile Yesu, oloze vambile ngwavo: “Ove Muka-kunangula, tuli nakusaka utusolwele chinjikizo.” Chipwe malunga kana vamwene vyuma vyakukomwesa alingile Yesu nyi chiku, oloze kwapwile unjiho waunene wakusolola vyuma alingile Yesu. Ngachize Yesu alwezele vatwamina vavaYuleya ngwenyi: “Chisemunwino chakuhuka chavaka-ukoji cheji kusakanga lika kumona chinjikizo, oloze kaveshi kuchisolwela chinjikizo chekako, shina chinjikizo chakapolofweto Yona kaha.”—Mateu 12:38, 39.

Yesu alumbunwine jino ngwenyi: “Ngana muze Yona apwile mujimo lyayauze ishi wamunene makumbi atatu, namusana naufuku, mukiko nawa mwakapwa naMwanamutu kwishi yamavu makumbi atatu, namusana naufuku.” Yona vamuminyine kuishi wamunene, kaha vamusajile kwijiva nge vanamusangula. Yesu ambile ngwenyi mwafwa, kaha navakamusangula halikumbi lyamuchitatu. Oloze omu chuma kana chasolokele, vatwamina vavaYuleya vakanyine ‘chinjikizo chaYona’ nakuhona kupihilila nakwalumuka. (Mateu 27:63-66; 28:12-15) Ava vatwamina valihandunwine ‘navatu vakuNyineve’ vaze vapihililile nakwalumuka omu Yona avambulilile. Ngocho chisemunwino kana navakachisopesa. Yesu ahanyine chakutalilaho chamwangana  wapwevo wakuSheva ngwenyi nayikiye mwakavapayisa. Ou mwangana evwile mangana aSolomone kaha alikomokelele. Yesu ambile jino ngwenyi: “Oloze hano hali ou ahambakana Solomone.”—Mateu 12:40-42.

Yesu afwanyishile chisemunwino chize chakuhuka kumutu uze alovokele shipilitu wamupi. (Mateu 12:45) Mutu kana hakuhona kulinganga vyuma vyamwaza, uze shipilitu wamupi engilile cheka muli ikiye hamwe navashipilitu veka 7 vakumuhambakana ikiye kuhuka. Muyachi wavaIsalele vautomesele, kaha walumukile, ngana mwamutu uze vanafumisa shipilitu wamupi. Jino muyachi kanou wakanyine vapolofweto jaKalunga, nakufumbukila Yesu uze apwile nashipilitu yaKalunga. Echi chasolwele nge muyachi kana wapihile chikuma kuhambakana kumaputukilo.

Shimbu Yesu apwile nakuhanjika, naye navandumbwenyi vejile nakwimana kusongo yaliyongomena lyavatu. Vatu vamwe vaze vatwamine kwakamwihi naikiye vamulwezele ngwavo: “Noko navandumbwove vanemana kuweluka, vali nakusaka ngwavo vakumone.” Yesu asolwele nge apandamine chikuma kuli tumbaji twenyi vaze vapwile nge vanaye navandumbwenyi. Ngocho enyikile tumbaji twenyi nakwamba ngwenyi: “Mama navandumbwami shina ava veji kwivwililanga mazu aKalunga nakuwakavangiza.” (Luka 8:20, 21) Yesu asolwele nge numba tuhu alikachile navausoko wenyi, oloze usoko apwile nawo natumbaji twenyi ukiko wapwile waulemu chikuma. Nayetu nawa tweji kwivwanga kuwaha hakulikata navandumbwetu vakushipilitu, chikumanyi omu vatu veji kututolekanga havilinga vyetu vyamwaza.