Tõog karen-sãam-dãmbã ne Fariizẽ-rãmbã sẽn yeel t’a Zeezi sẽn digd zĩn-dãmbã pa ne Wẽnnaam pãngã sã n pa gũusi, b wat n tʋʋsa vʋʋsem sõngã. Dẽnd b segd n yãka b sã n na n zĩnda Wẽnnaam poorẽ, bɩ a Sʋɩtãan poorẽ. A Zeezi yeela woto: “Kɩt-y tɩ tɩɩgã yɩ sõama la t’a biisã yɩ sõama, wall y kɩt tɩ tɩɩgã yɩ yooko, t’a biisã me yɩ põaasa. Bala, yaa tɩɩg biisẽ la b bãngd a sã n yaa sõama, wall yooko.”—Matye 12:33.

A Zeezi sẽn dig zĩn-dãmbã yaa tʋʋm-sõngo. Ned sã n tagsdẽ tɩ rẽ yaa a Sʋɩtãan daabo, yaa yalemdo. A sẽn sõs ne nebã tãngã zugã, a wilgame tɩ tɩ-sõng fãa womda bi-sõma, pa bi-põaas ye. La Fariizẽ-rãmbã sẽn dõd a Zeezi wã wilgdame tɩ b womda bi-bʋse? Wilgdame tɩ b womda bi-põaasa. A yeel-b-la woto: “Yãmb wag-toos buudu, yãmb sẽn yaa nin-wẽns a woto wã, yãmb na n yɩɩ a wãn n tõog n gom gom-sõama? Bala, yaa bũmb nins sẽn pid sũurẽ wã n yit noorẽ wã.”—Matye 7:16, 17; 12:34.

Sɩd me, ned no-goam wilgda sẽn be a sũurẽ, tɩ b tõe n tik rẽ n kao a bʋʋdo. Rẽ n so t’a Zeezi yeel woto: “Mam yeta yãmb tɩ bʋʋdã kaoob daare, b na n soka ninsaalbã b gom-vɩɩd nins fãa b sẽn dag n gomã yelle. Bala, yaa ne fo noorã goam la f na n paam bʋʋm, la yaa ne fo noorã goam la f na n kong bʋʋm.”—Matye 12:36, 37.

A Zeezi ra zoe n maana yel-soalem wʋsgo. Baa ne rẽ, tõog karen-saam-dãmbã la Fariizẽ-rãmbã ra baoodame t’a maan bãnd tɩ b yã. B yeela a Zeezi yaa: “Karen-saamba, tõnd datame tɩ yãmb maan bãnd tɩ d yãnde.” Baa bãmb mensã sã n pa yã a Zeezi yel-soalem ne b nifu, neb wʋsg yãame, n tõe n kõ kaseto. Dẽnd a Zeezi sẽn leok-b to-to wã zemsame. A yeel-b lame yaa: “Zamaan-kãngã neb sẽn yaa nin-wẽns la yoaadbã kota bãnde, la b kõn kõ bãmb bãnd a to tɩ sã n ka Wẽnnaam no-rɛɛs a Zonaas bãndã ye.”—Matye 12:38, 39.

A Zeezi wẽneg n togsa a gomdã võore. A yeelame: “Wa a Zonaas sẽn zĩnd zĩm-bedrã pʋgẽ rasem a tãab la yʋnd a tãabã, woto me, Ninsaal Bi-riblã na n paa tãnd tẽngr dasem a tãab la yʋnd a tãabo.” Sɩd me, zĩm-bedr n vel a Zonaas n lebg n wʋk-a, tɩ yaa wa a sẽn ki n lebg n vʋʋge. A Zeezi gomdã rat n yeelame tɩ yẽ me na n kiime, n lebg n vʋʋg rasem a tãab-n-soabã. La baa ne sẽn yɩ woto wã, zʋɩf-rãmbã tũudum taoor dãmb pa sak n tek yam n kos sugr ye. Dẽnd b pa tẽ “a Zonaas bãndã” ye. (Matye 27:63-66; 28:12-15) “Niniiv nebã” yaool n tẽe koɛɛgã a Zonaas sẽn taas-bã, n sak n tek yam. Rẽ n so la a Zeezi sẽn yeel tɩ Niniiv nebã na n monga zãmaan-kãng nebã bʋʋmã. A leb n yeelame tɩ Seba rĩm-poakã me na n ning-b-la taale. A yii zĩ-zãrg n wa kelg a Salmo goamã sẽn yaa yam-goamã, hal n pẽge. Rẽ poore, a Zeezi yeela woto: “Sẽn yɩɩd a Salmo n be ka.”—Matye 12:40-42.

A Zeezi leb n maka a zãmaanã neb ne rao zĩn-dẽgd sẽn yi n base. (Matye 12:45) Raoã sẽn pa ledg vɩʋʋgã zĩnã sẽn basã ne bõn-sõma wã, zĩnã tɩ peega zĩn-dẽgd a yopoe wẽnem sẽn yɩɩd yẽ mengã, tɩ b fãa wa kẽ raoã. Sɩd me, Wẽnnaam ra kɩtame tɩ Israyɛll buudã tek n lebga sõma, wa rao zĩn-dẽgd sẽn yi n base. La Israyɛll nebã kɩɩsa Wẽnnaam no-rɛɛsdbã. A Zeezi sẽn wa wã, b pʋd n kisg-a lame, baa ne sẽn yaa vẽeneg tɩ Wẽnnaam vʋʋsem sõngã bee ne-a wã. Woto wilgdame tɩ Israyɛll nebã yellã paama pãng n yɩɩd pĩndã.

A Zeezi sẽn da ket n gomda, a ma wã ne a ma-biisã waame n na n yã-a. La b yalsa kʋʋngã poore. Neb sẽn da zĩ n pẽ a Zeezi yeel-a lame yaa: ‘Yãmb ma wã bee yɩng ne y ma-bi-raopã n dat n yãnd-yã.’ A Zeezi sẽn leok to-to wã wilgame tɩ yẽ ne a karen-biisã zood yɩɩda rogem. A zẽka a nug n tees a karen-biisã n yeele: “Mam ma ne m ma-bi-raop yaa neb nins sẽn kelgd Wẽnnaam goamã n sakdẽ wã.” (Luk 8:20, 21) Woto wilgdame tɩ yẽ ne a roagdbã nonglem sẽn sõs n yaa to-to, a karen-biisã la a nong n yɩɩda. Tõnd me sẽn paam tɩ d tẽed-n-taasã nong-d woto wã noom-d-la wʋsgo, sẽn yɩɩd fãa, sã n mik tɩ d sẽn dat n modg n maan neerã kɩtame tɩ nebã sãbsd tõnd bɩ n yaand tõndo.