Bamangwalo le Bafarisei ba kotsing ya go rogaka moya o mokgethwa ka baka la go gana gore Jesu o leleka batemona ka matla a Modimo. Ka gona, ba tla ba ka lehlakoreng la mang—na e tla ba la Modimo goba la Sathane? Jesu o re: “Le dira gore sehlare e be se sebotse le dienywa tša sona e be tše botse goba le bodiša sehlare le dienywa tša sona, gobane sehlare se tsebja ka dienywa tša sona.”—Mateo 12:33.

Ke bošilo go bolela gore seenywa se sebotse sa go leleka ga Jesu batemona ke gore o hlankela Sathane. Ka ge Jesu a bontšhitše gabotse Thutong ya gagwe ya Thabeng, ge seenywa e le se sebotse, le sehlare ke se sebotse, ga se a bola. Ka gona, ke’ng seo se bontšhwago ke seenywa sa Bafarisei, e lego go bea ga bona Jesu molato ka mo go sa kwagalego? Se bontšha gore ba bodile. Jesu o re go bona: “Bana ba marabe, le ka bolela dilo tše botse bjang, mola le le ba kgopo? Gobane molomo o bolela go tšwa go se se tletšego pelong.”—Mateo 7:16, 17; 12:34.

Ee, mantšu a rena a bonagatša boemo bja dipelo tša rena le go nea motheo bakeng sa kahlolo. Ka baka leo, Jesu o re: “Ruri ke a le botša, polelo e nngwe le e nngwe yeo e se nago mohola ye batho ba e bolelago, ba tla ikarabela mabapi le yona Letšatšing la Kahlolo, gobane ka mantšu a gago o tla bolelwa gore o lokile gomme ka mantšu a gago o tla bonwa molato.”—Mateo 12:36, 37.

Go sa šetšwe mediro e matla yeo Jesu a e dirago, bamangwalo le Bafarisei ba kgopela se sengwe, ba re: “Morutiši, re nyaka go bona pontšho e tšwago go wena.” Go sa šetšwe gore ba iponetše ge a dira mehlolo goba go se bjalo, go na le bohlatse bjo bontši bjo bo bonwego ka mahlo bja seo a se dirago. Ka go re’alo Jesu a ka botša baetapele bao ba Bajuda, a re: “Moloko o kgopo le wo o sa botegelego Modimo o dula o nyaka pontšho, eupša ga go pontšho ye o tlago go e newa ge e se pontšho ya moporofeta Jona.”—Mateo 12:38, 39.

Jesu ga a ba tlogele ba šala ba ipotšiša seo a se bolelago. O re: “Go etša ge Jona a be a le ka mpeng ya hlapi e kgolo matšatši a mararo le mašego a mararo, Morwa wa motho le yena o tla ba lebitleng matšatši a mararo le mašego a mararo.” Jona o ile a metšwa ke mohuta o itšego wa hlapi e kgolo eupša a tšwa go yona bjalo ka ge eka o tsošitšwe. Ka go re’alo Jesu o bolela e sa le pele gore yena o tla hwa gomme a tsošwa ka letšatši la boraro. Ge seo se direga ka morago, baetapele ba Bajuda ba gana ‘pontšho ya Jona,’ e le ge ba gana go itshola le go fetoga. (Mateo 27:63-66; 28:12-15) Go fapana le bona, “batho ba Ninife” ba ile ba itshola ka morago ga gore Jona a bolele le bona. Ka gona ba tla bona moloko wo molato. Jesu gape o re kgošigadi ya Sheba ka mohlala wa yona, le yona e tla ba bona molato. E ile ya kganyoga go kwa ka bohlale bja Solomone gomme ya kgahlwa ke bjona. Bjale, Jesu o re “yo a fetago Solomone ka bogolo o gona mo.”—Mateo 12:40-42.

Jesu o swantšha boemo bja moloko wo o kgopo le bja monna yoo meoya e kgopo e tšwago go yena. (Mateo 12:45) Ka ge monna yoo a sa tlatše sekgoba seo ka dilo tše dibotse, moya o kgopo o boa le meoya e mengwe e šupago e kgopo go o feta gomme e tsena go monna yoo. Boemong bjo bo swanago, setšhaba sa Baisiraele le sona se be se hlwekišitšwe e bile se mpshafaditšwe—go fo swana le monna yoo moya o sa hlwekago o bego o tšwile go yena. Eupša setšhaba seo se ile sa gana baporofeta ba Modimo, sa feleletša ka go ganetša yena yo yo go lego molaleng gore o na le moya wa Modimo, e lego Jesu. Se se bontšha gore boemo bja setšhaba se bo be bo mpefetše go feta ge se be se thoma.

Ge Jesu a le gare a bolela, mmagwe le barwarragwe ba a fihla gomme ba ema ka morago ga lešaba. Ba bangwe bao ba dutšego kgauswi le yena ba re: “Mmago le bana beno ba eme ka ntle ba nyaka go go bona.” Ke moka Jesu o bontšha kamoo a ikwago a le kgauswi ka gona le barutiwa ba gagwe, bao go yena ba swanago le barwarre, dikgaetšedi le bomma ba kgonthe. Ge a otlollela letsogo la gagwe go barutiwa ba gagwe, o re: “Mma le bana bešo ke ba, bona bao ba kwago lentšu la Modimo gomme ba le phetha.” (Luka 8:20, 21) Ka go re’alo o bontšha gore go sa šetšwe gore ditlemo tšeo di mo tlemaganyago le metswalo ya gagwe di bohlokwa gakaakang, fela tswalano ya gagwe le barutiwa ba gagwe e bohlokwa le go feta. Ruri go tloga go re lapološa go ba le tswalano e bjalo ya kgauswi le banababo rena ba moya, kudukudu ge ba bangwe ba re belaela goba ba sola rena le mediro ya rena e mebotse!