So ascribe na aFarizien atene so a yeke pëpe na ngangu ti Nzapa la Jésus ayeke tomba asioni yingo, a yeke tongana zongango yingo vulu ti Nzapa la. Tongaso, ala yeke mû ande mbage ti zo wa? Nzapa wala Satan? Jésus atene: “Tongana ala bâ lege ti mbeni keke, a yeke lë anzoni lengo; me tongana ala bâ lege ni ape, a yeke lë anzoni lengo ape. Lengo ti keke la ayeke fa wala keke ni ayeke nzoni wala ayeke nzoni pëpe.”—Matthieu 12:33.

So Jésus atomba asioni yingo asara nzoni na azo. Ni la, a yeke ye ti buba ti tene so a yeke ndali ti so Jésus ayeke sara na Satan la si lo yeke tomba asioni yingo. Tongana ti so Jésus atene lani na yâ ti fango ye ti lo na ndo ti hoto, tongana mbeni keke ayeke nzoni, lengo ni nga ayeke nzoni. Tongaso, so ala bi atënë ti mvene na ndo ti Jésus afa so aFarizien ayeke ti ala mara ti lengo ti keke wa? Ala yeke lê ti keke so afun awe. Jésus atene na ala atene: “Ala, amolenge ti asioni ngbo, so ala yeke asioni zo so, ala lingbi ti sara anzoni tënë tongana nyen? Ye so ayeke na bê ti zo la ayeke sigi na yanga ti lo.”—Matthieu 7:16, 17; 12:34.

Biani, atënë ti e la ayeke fa ye so ayeke na yâ ti bê ti e nga ni la ayeke fâ ngbanga na ndo ti e. Ni la, Jésus atene: “Mbi tene na ala, buba tënë kue so azo ayeke tene, ala yeke kiri tënë ndali ni na Lâ ti fango ngbanga, ndali ti so a yeke na lege ti tënë ti yanga ti mo si a yeke diko mo ande zo ti mbilimbili, nga na lege ti tënë ti yanga ti mo si a yeke fâ ande ngbanga na ndo ti mo.”—Matthieu 12:36, 37.

Atâa so Jésus asara lani amiracle mingi, ascribe na aFarizien ahunda encore na Jésus atene: “Maître, e ye mo sara mbeni fä e bâ.” Atâa aFarizien na ascribe ni abâ wala ala bâ pëpe na lê ti ala, amiracle so Jésus asara, gbâ ti azo abâ lani aye so Jésus asara. Ni la, a yeke na lege ni ti tene Jésus atene tënë so na amokonzi-nzapa ti aJuif: “Azo ti ngoi so ayeke asioni zo na ala yeke be-ta-zo na Nzapa pëpe. Ala ngbâ ti hunda ti bâ mbeni fä, me a yeke fa na ala mbeni fä oko ape, gi fä ti prophète Jonas.”—Matthieu 12:38, 39.

Jésus afa ndani na ala, lo tene: “Legeoko tongana ti so Jonas asara lâ ota na bï ota na yâ ti kota susu, Molenge ti zo ayeke sara nga lâ ota na bï ota kâ na gbe ti sese.” Mbeni kota susu la amene Jonas, me na pekoni susu ni adë lo na gigi. A yeke mo bâ mo tene a zingo Jonas ni na kuâ. Jésus aye ti fa so ni yeke kui ande me lango ota na pekoni a yeke zingo ande ni na kuâ. Tongana ye ni so asi, fade amokonzi-nzapa ti aJuif ayeke ke ‘fä ti Jonas,’ na lege so ala ayeke ke ti changé bê ti ala (Matthieu 27:63-66; 28:12-15). Me, “azo ti Ninive” achangé lani bê ti ala na peko ti so Jonas afa tënë na ala. Tongaso, azo ni so ayeke fâ ande ngbanga na ndo ti azo ti ngoi ti Jésus. Jésus afa nga so gbia-wali ti Shéba ayeke fâ ande ngbanga na ndo ti ala, na lege ti tapande ti lo. Gbia-wali so aye lani ti mä atënë ti ndara ti Salomon na anzere lani na lo mingi ti mä ni. Me Jésus afa na ala so “mbeni zo ayeke ge so ayeke kota ahon Salomon.”—Matthieu 12:40-42.

Jésus ahaka nga asioni zo ti ngoi ti lo ni na mbeni koli so sioni yingo asigi na yâ ti lo (Matthieu 12:45). Ndali ti so koli ni azia anzoni ye na place ni ape, sioni yingo ni ague aga na ambeni mba ti lo mbasambala so ayeke sioni ahon lo, na ala lï na yâ ti koli ni. Legeoko nga, a zi lani asioni ye na yâ ti mara ti Israël na a leke ala, tongana ti sioni yingo so asigi na yâ ti koli so. Me, mara ni ake aprophète ti Nzapa juska ala gue ti ke Jésus, zo so biani yingo ti Nzapa ayeke na ndo ti lo. Ye so afa biani so sioni ti mara ni akiri aga sioni ahon ti kozo.

Na ngoi so Jésus angbâ ti sara tënë, mama ti lo na aita ti lo ti koli aga, ala luti na tere ti gbâ ti azo ni. Ambeni zo so aduti na tere ti Jésus atene na lo: “Mama ti mo na aita ti mo ayeke na gigi, na ala ye ti bâ mo.” Me, Jésus afa na ala kota ndoye so ayeke na popo ti lo na adisciple ti lo na tenengo na azo ni so, adisciple ti lo ni ayeke tongana atâ ita ti lo ti koli na ti wali, nga tongana amama ti lo. Lo yôro maboko ti lo, lo fa adisciple ti lo ni, na lo tene: “Mama ti mbi na aita ti mbi ni ayeke azo so ge, so amä tënë ti Nzapa na asara ye alingbi na ni.” (Luc 8:20, 21). Jésus aye ti fa so, atâa so songo so ayeke na popo ti lo na afami ti lo ayeke kota mingi, songo so abungbi lo na adisciple ti lo ayeke même kota mingi ahon ni. A dë bê ti e mingi ti bâ mara ti songo ni so na popo ti e na aita ti e na lege ti yingo, mbilimbili tongana ambeni zo ayeke na kite na ndo ti e wala akasa e ndali ti anzoni ye so e sara.