Den leriman fu Wet nanga den Fariseiman no wani agri taki na Gado gi Yesus a makti fu puru ogri yeye na sma tapu. Dati meki den musu luku bun taki den no sondu teige a santa yeye. A sei fu suma den o teki? Den o teki a sei fu Gado noso a di fu Satan? Yesus taki: „Efu unu de leki wan bun bon, dan den froktu fu unu sa bun tu, èn efu unu de leki wan siki bon, dan den froktu fu unu no sa bun. Na den froktu fu wan bon e sori sortu bon a de.”​—Mateyus 12:33.

A de wan don sani fu taki dati na Satan gi Yesus a makti fu puru ogri yeye na sma tapu. Na ini a prenspari lezing di Yesus hori na tapu a bergi, a taki dati wan bun bon e gi bun froktu, a no e gi froktu di no bun. Sobun, fa wi musu si a krutu di den Fariseiman e krutu Yesus? Wi musu si dati leki froktu di no bun. Yesus e taigi den: „Un snekipikin, fa unu kan taki bun sani, te unu ogri? Bika san furu na ati, na dati mofo e taki.”​—Mateyus 7:16, 17; 12:34.

Iya, den sani di wi e taki e sori san de tapu wi ati èn na den sani dati o meki taki Gado krutu wi noso taki a feni wi bun. Dati meki Yesus taki: „Mi e taigi unu taki efu sma e taki dondon sani, dan den sa musu gi frantwortu fu dati na a Krutudei. Bika na den sani di yu e taki, sa meki taki Gado si yu leki wan reti-ati sma noso taki a e krutu yu.”​—Mateyus 12:36, 37.

Aladi Yesus e du bigi wondru, toku den leriman fu Wet nanga den Fariseiman wani taki a du moro wondru. Den e taki: „Leriman, wi wani si wan spesrutu marki fu yu.” Nofo buweisi de taki Yesus e du wondru, awinsi den si dati nanga den eigi ai, noso awinsi den yere dati fu tra sma. Fu dati ede Yesus kan taigi den Dyu kerki fesiman a sani disi: „Na den ogri sma di drai baka gi Gado e tan suku wan marki, ma mi no o gi den wan marki boiti a marki fu a profeiti Yona.”​—Mateyus 12:38, 39.

Yesus e taigi den krin san a wani taki nanga den wortu disi: „Neleki fa Yona tan dri dei nanga dri neti na ini a bere fu a bigi fisi, na so a Manpikin fu libisma o tan na ini en grebi dri dei nanga dri neti.” Wan bigi fisi ben swari Yona. Ma di a fisi spiti en puru, a ben de leki a kisi wan opobaka. Na so Yesus wani sori den taki en srefi o dede èn taki a o kisi wan opobaka na a di fu dri dei. Bakaten te a sani disi o pasa, den Dyu fesiman no o wani bribi na ini „a marki fu a profeiti Yona”. Sobun, den no o sori berow èn den no o kenki den libi (Mateyus 27:63-66; 28:12-15). Ma di Yona ben preiki gi den „sma fu Ninefei”, den sma dati ben abi berow. Dati meki te den o kisi wan opobaka den o krutu den sma fu Yesus ten. Boiti dati, Yesus taki dati te na umakownu  fu Skeiba o kisi wan opobaka, dan a o krutu den tu. Na uma disi ben wani yere den koni sani di Salomo ben sabi èn a ben e fruwondru fu den sani disi. Ma now Yesus e taki dati „wan sma di bigi moro Salomo de dya”.​—Mateyus 12:40-42.

Yesus agersi a situwâsi fu den sma fu en ten nanga wan man di ben abi wan ogri yeye na en tapu (Mateyus 12:45). Fu di a man no e furu en prakseri nanga bun sani, meki na ogri yeye e drai kon baka nanga ete seibi yeye di ogri moro en èn den alamala e kon na a man tapu. Na so a de nanga a pipel fu Israel. Den ben kon krin èn den libi ben kenki, neleki di na ogri yeye ben komoto na a man tapu. Ma den no ben wani arki den profeiti fu Gado. Sani kon moro ogri di den gens Yesus, a sma di abi a yeye fu Gado. Na so a situwâsi fu den kon ogri moro leki san a ben de fosi.

Te Yesus e taki ete, en mama nanga den brada fu en e kon èn den e tanapu na bakasei fu a bigi grupu sma di de drape. Son sma di e sidon krosibei fu Yesus e taki: „Yu mama nanga den brada fu yu e tanapu na dorosei, fu di den wani si yu.” Dan Yesus e sori fa a e si den disipel fu en. Gi en, den de leki en eigi brada, sisa nanga mama. A e sori go na den disipel, dan a e taki: „Mi mama nanga den brada fu mi na den sma di e yere a wortu fu Gado èn di e du san a taki” (Lukas 8:20, 21). Na so a e sori taki awinsi o bun a de nanga den famiri fu en, a matifasi di a abi nanga den disipel fu en de moro tranga. A de wan prisiri sani fu abi brada nanga sisa di e dini Gado makandra nanga wi! Den e gi wi deki-ati spesrutu te sma no e bribi wi, te sma e gi wi porinen èn te sma e krutu den bun sani di wi e du.