Mai te ‵teke atu ki te manatu me ne afuli keatea ne Iesu a temoni i te ‵mana o te Atua, ne ‵tu atu eiloa a failautusi mo Falesaio i se tulaga fakamataku i te pati masei ki te agaga tapu. Tela la, ko oi ka ‵kau atu latou ki ei—ko te Atua io me ko Satani? Ne fai mai a Iesu: “E mafai o fai ne koutou a te lakau ke ‵lei kae ke fua mai foki i ei a fuataga ‵lei, io me fai ne koutou se lakau ke masei kae ke ma‵sei foki ana fuataga, me e iloa fua a te lakau i ana fuataga.”—Mataio 12:33.

Se ‵losiga valea ke fai atu me i te fuataga ‵lei telā ko te afuliga o temoni ne iku mai i te tavini atu o Iesu ki a Satani. I te taimi ne fakamatala faka‵lei mai ei ne Iesu i tena Lāuga i luga i te Mauga, kafai e ‵lei a fuataga, ko te lakau e ‵lei, kae e se masei. Se a la te mea e fakamaoni mai ne ‵losiga va‵lea a te kau Falesaio ki a Iesu? Me e ma‵sei olotou fuataga. Ne fai atu a Iesu ki a latou: “Tama a gata ‵poisini, e mafai pefea o fai‵pati koutou ki mea ‵lei māfai a koutou ne tino amio ma‵sei? Me e faipati mai ne te gutu a mea kolā e ‵fonu i te loto.”—Mataio 7:16, 17; 12:34.

E tonu, e fakaasi atu ne ‵tou pati a te tulaga o ‵tou loto, kae e tuku mai i ei se fakavae ke fakamasino aka ei tatou. Tela la, ne fai atu a Iesu: “Au e fai atu ki a koutou me ka avatu ne tāgata se tala i te Aso Fakamasino mō pati sē aoga katoa ne fai ne latou; me ka taku amiotonugina koutou e auala i otou pati e fai kae ka taku fakamaseigina foki koutou e auala i otou pati.”—Mataio 12:36, 37.

Faitalia te uke o galuega ‵mana ne fai ne Iesu, ne toe ma‵nako eiloa failautusi mo Falesaio ki nisi fakamaoniga: “Te Faiakoga, a matou e ma‵nako ke lavea ne matou se fakailoga mai i a koe.” Faitalia me ne seki matea tonu ne latou ana vavega, ne lava kae ‵toe a fakamaoniga o ana mea ne fai. Tela la, ne fai atu a Iesu ki takitaki lotu Iutaia konā: “A te kautama matagā kae mulilua e ‵sala faeloa ki se fakailoga, kae ka seai eiloa se fakailoga e tuku atu ki ei kae na ko te fakailoga o Iona te pelofeta.”—Mataio 12:38, 39.

Ne seki tuku atu fua ne Iesu latou ke mafaufau ki te uiga o ana pati konā: “E pelā eiloa mo Iona ne nofo atu i te tinae o se ika lasi i ao e tolu mo po e tolu, e penā foki te Tama a te tagata, ka nofo i lalo i te laukele i ao e tolu mo po e tolu.” Ne folo kātoa a Iona ne se vaegā ika lasi, kae ne toe vau ki tua e pelā eiloa me ne toetu aka mai te mate. Telā ne ‵valo atu ei ne Iesu me ka mate a ia kae ka toetu aka ki te ola i te tolu o aso. I te taimi ne tupu ei te mea fakamuli, ne ‵teke atu a takitaki Iutaia ki “te fakailoga o Iona,” me ne ita fitifiti latou ke sala‵mo kae ‵fuli. (Mataio 27:63-66; 28:12-15) E ‵kese mai i a latou, ne sala‵mo a “tino Nineva” mai tua o te talaiatuga o Iona ki a latou. Tela la, ne taku fakamasei ne latou te kautama tenei. Ne fai atu foki a Iesu me ka taku fakamasei foki ne te fakaakoakoga a te tupu fafine o Seepa a latou. Ne manako tou fafine ke fakalogologo ki te poto o Solomona kae ne ofo foki a ia i ei. Nei la, ne fakaasi atu ne Iesu: “Kae  kiloke! e isi se tino i konei e sili atu i a Solomona.”—Mataio 12:40-42.

Ne faka‵pau ne Iesu te tulaga o te kautama masei ki se tagata telā ne fano keatea mai i a ia se agaga sē ‵mā. (Mataio 12:45) Ona ko te mea ne seki faka‵fonu ne tou tagata a te avanoaga tenā ki mea ‵lei, ne toe foki atu a te agaga masei tenā mo nisi agaga e tokofitu kolā ne ma‵sei atu kae ne fai ne latou ke ulufia a ia. E penā foki loa a te fenua ko Isalaelu telā ko oti ne ‵fulu faka‵ma kae fai a fakama‵fuliga ki ei—e pelā eiloa mo te tagata telā ne fano keatea mai i ei a te agaga sē ‵mā tenā. Kae ne ‵teke atu a te fenua o Isalaelu ki pelofeta a te Atua, telā ne iku atu i ei ki te ‵teke tonu atu ki te tino telā ne fakaasi faka‵lei mai me e maua ne ia te agaga o te Atua, ko Iesu. E fakaasi mai ne te mea tenei me ko sili atu te masei o te lotou tulaga i lō te kamataga.

A koi faipati atu a Iesu, kae ne oko mai tena mātua mo ana taina kae ne ‵tu atu latou mai tua o te vaitino. Ne fai atu a nisi tino kolā ne saga‵saga atu i ana tafa: “A tou mātua mo ou taina kolā e ‵tu i tua kae e fia fai‵pati ki a koe.” Ne fakaasi atu ei ne Iesu tena va ‵pili mo ana soko mo tino kolā ne fai e pelā me ne taina, tuagane, mātua ‵tonu ki a ia. Ne tusi atu tena lima ki ana soko, ana muna: “A toku mātua mo oku taina ko latou konei e lagona ne latou te muna a te Atua kae e fai ne latou.” (Luka 8:20, 21) Tela la, ne fakaasi atu i ei ne Iesu me faitalia te tāua o tena sokoga ki ana kāiga, kae e sili fakafia atu te tāua o tena fesokotakiga mo ana soko. Ko oko eiloa i te fakamalosi loto mai ki a tatou ke maua se fesokotakiga pili penā mo ‵tou taina faka-te-agaga, maise eiloa māfai e fakalotolotolua io me e fakamasei ne nisi tino a tatou mo ‵tou galuega ‵lei!