Han an mga eskriba ngan Pariseo nagsiring nga hi Jesus nagpapagawas hin mga demonyo diri pinaagi han gahum han Dios, ira ginpasiparahan an baraan nga espiritu. Salit, kan kanay hira nadapig—ha Dios o kan Satanas? Hi Jesus nagsiring: “Kon maopay ka nga kahoy, magbubunga ka hin maopay. Pero kon maraot ka nga kahoy, magbubunga ka hin maraot. Ha bunga makikita kon an kahoy maopay o diri.”—Mateo 12:33.

Kalurongan an pag-akusar nga an maopay nga bunga, an pagpagawas hin mga demonyo, resulta han pag-alagad ni Jesus kan Satanas. Sugad han iginpatin-aw ni Jesus ha iya Sermon ha Bukid, kon maopay an bunga, an kahoy maopay, diri maraot. Salit, ano an ginpapamatud-an han bunga han mga Pariseo, an ira diri makatadunganon nga mga akusasyon kan Jesus? Ginpapamatud-an hito nga maraot hira. Hi Jesus nagsiring ha ira: “Katulinan han mga halas, paonan-o kamo makakayakan hin maopay kon maraot kamo? Kay kon ano an aada ha kasingkasing amo an nagawas ha baba.”—Mateo 7:16, 17; 12:34.

Oo, an aton mga pulong nagpapakita han kahimtang han aton kasingkasing ngan magigin basihan ito ha paghukom ha aton. Salit, hi Jesus nagsiring: “Susumatan ko kamo nga an mga tawo nga nagyayakan hin waray pulos, may baratunon ha Adlaw han Paghukom tungod hito, kay kon an imo mga pulong maopay, ipapahayag ka nga matadong, pero kon an imo mga pulong maraot, magigin salaan ka.”—Mateo 12:36, 37.

Bisan pa han mga milagro nga ginhihimo ni Jesus, an mga eskriba ngan Pariseo nangaro pa hin dugang: “Magturutdo, karuyag namon makakita hin tigaman tikang ha imo.” Nakita man nira mismo an iya paghimo hin milagro o waray, damu an nakakita nga magpapamatuod hito. Salit nakasiring hi Jesus hini nga Judio nga mga lider: “An henerasyon nga maraot ngan diri-matinumanon ha Dios padayon nga namimiling hin tigaman, pero waray tigaman nga ihahatag ha ira labot la han tigaman ni Jonas nga propeta.”—Mateo 12:38, 39.

Iginsaysay ni Jesus ha ira an kahulogan hito: “Sugad la nga hi Jonas nakadto ha tiyan han daku nga isda ha sulod hin tulo ka adlaw, sugad man an Anak han tawo mahingangadto ha lubnganan ha sulod hin tulo ka adlaw.” Hi Jonas ginlamoy hin daku nga isda pero iginluwa hiya, nga sugad hin ginbanhaw. Salit igintagna ni Jesus nga hiya mismo mamamatay, ngan ha ikatulo ka adlaw babanhawon. Kon banhawon na hiya, isasalikway han Judio nga mga lider an “tigaman ni Jonas,” diri hira magbabasol ngan diri magbabag-o. (Mateo 27:63-66; 28:12-15) Ha kabaliktaran, “an mga tawo ha Ninibe” nagbasol katapos magsangyaw ha ira hi Jonas. Salit ipapakita nira nga salaan ini nga henerasyon. Nagsiring liwat hi Jesus nga pinaagi han susbaranan han rayna han Sheba, sugad gihapon hito an bubuhaton han rayna. Naghingyap hiya nga mabatian an kinaadman ni Solomon ngan bumilib hiya hito. Hi Jesus nagpadayon: “Labaw pa kan Solomon an aanhi!”—Mateo 12:40-42.

Iginpariho ni Jesus an sitwasyon hinin maraot nga henerasyon ha usa nga tawo nga may maraot nga espiritu nga ginawas ha iya. (Mateo 12:45) Tungod kay waray pun-i han tawo hin mag-opay nga butang an ginbayaan han maraot nga espiritu, binalik ito nga espiritu kaupod an pito nga espiritu nga mas maraot ngan ginsaniban hiya. Sugad man, an nasud han Israel ginlimpyohan na ngan ginbag-o—pariho han tawo diin ginawas an maraot nga espiritu. Pero iginsalikway han nasud an mga propeta han Dios, ha urhi ira ginkontra an usa nga matin-aw nga gin-gigiyahan han espiritu han Dios, hi Jesus. Iginpapakita hini nga an ira kahimtang mas maraot pa kay ha tinikangan.

Samtang nagyayakan hi Jesus, inabot an iya nanay ngan kabugtoan ngan tumindog ha luyo han mga tawo. An iba nga nalingkod sapit niya nagsiring: “Nagtitinindog ha gawas an imo nanay ngan kabugtoan kay karuyag nira makigkita ha imo.” Katapos, iginpakita ni Jesus kon mationan-o kaduok ha iya an iya mga disipulo, sugad hira hin iya kabugtoan nga kalalakin-an ngan kababayin-an ngan mga nanay. Samtang gintutudlok an iya mga disipulo, hiya nagsiring: “Ini hira nga namamati han pulong han Dios ngan nagbubuhat hito amo an akon nanay ngan an akon kabugtoan.” (Lucas 8:20, 21) Salit, iginpakita niya nga bisan kon importante ha iya an iya relasyon ha iya mga paryente, mas importante an iya relasyon ha iya mga disipulo. Nakakaliaw gud an pagkaada duok nga relasyon ha aton espirituwal nga kabugtoan, labi na kon an iba nagruruhaduha o nagpapakaraot ha aton ngan han aton mag-opay nga buhat!