Di Kapernaum do ra Jesus maminsang angka halak Parise i. Dung i, laho ma ibana tu Laut Galilea. Nunga godang halak na marpungu disi. Alani i, nangkok ma ibana tu sada parau mandao sian topi ni laut i. Sian ginjang ni parau i, diajarhon Jesus ma tu nasida godang tudosan taringot tu Harajaon ni Debata. Ala ditanda angka jolma i do tudosan na pinangke ni Jesus i, gabe mura ma diantusi nasida na niajarhon ni Jesus taringot tu Harajaon i.

Na parjolo, dipaboa Jesus ma tu nasida taringot tu boni na disabur. Adong do boni i madabu di dalan jala diallang pidong. Boni na asing madabu di tano na marbatu na so pola godang tanona. Alai tingki las ari, pintor malos do boni na tubu i ala ndang bagas dope uratna. Boni na asing muse madabu tu tonga-tonga ni suga-suga. Alani i, dihapit suga i ma boni i, gabe ndang boi tubu. Ujungna, adong ma boni na madabu di tano na denggan. Tubu jala “marparbue ma i, adong na 100 hali lompit, adong na 60 hali lompit, jala na asing 30 hali lompit”.​—Mateus 13:8.

Dung i, didok Jesus ma muse tudosan na asing taringot tu Harajaon i. Dipaboa ibana ma taringot tu baoa na manabur boni i. Modom do panabur i jala dungo marsogotna. Tubu do boni i alai lam timbo do i “di na so pamotoanna”. (Markus 4:27) Tubu sandiri do boni i gabe eme na boi dipanen.

Dipaboa Jesus ma muse tudosan taringot tu manabur boni. Adong ma sahalak baoa na manabur boni ni eme. Alai “tingki modom angka jolma”, ro ma musuna jala disabur ma boni ni simareme-eme di tonga-tonga ni eme i.  Disungkun angka hatoban ni baoa i ma manang na porlu do umpaton ni nasida angka simareme-eme i. Alai didok baoa i ma, “Unang, so tung dohot tarbutbut eme i tingki dibutbut hamu simareme-eme i. Pasombu hamu ma i rap tubu sahat tu na panen, jala tingki panen dohononku ma tu panabi asa jumolo dipapungu simareme-eme i jala dirahut dung i ditutung ma tu api. Dung i, papungu ma eme i tu poti.”​—Mateus 13:24-30.

Godang do halak na manangihon i mananda tudosan na binahen ni Jesus i. Ai godang do nasida partani. Alani i, dipaboa Jesus ma muse tudosan na asing, i ma boni na gelleng songon batu ni siarum. Gelleng do boni i, alai boi tubu gabe hau na balga inganan ni angka pidong marasar. Jesus mandok, “Tudos do Harajaon banua ginjang i tu boni na gelleng na binuat ni sasahalak jala disuan tu ladangna.” (Mateus 13:31) Ndang taringot tu suan-suanan na niajarhon ni Jesus disi. Alai na didok disi, boi do na gelleng gabe mansai balga.

Dipaboa Jesus ma muse tudosan na asing na ditanda nasida. Dipatudos ibana do Harajaon i tu “ragi na sinampur ni sahalak borua tu sampulu kilogram topung”. (Mateus 13:33) Kambang do sude adonan i dibahen ragi i. Alai ndang pintor kambang adonan i tingki dicampur ragi i tu adonan i.

Dung dipaboa Jesus sude tudosan i, disuru ma angka jolma i mulak. Laos di tingki i, ro ma angka siseanna mandapothon Jesus laho manungkun lapatan ni angka tudosan i.

Nunga hea dibege nasida Jesus mangajari mamangke tudosan, alai ndang songon i godangna. Disungkun nasida ma Jesus, “Boasa tudosan bahenonmu mangajari nasida?”​—Mateus 13:10.

Nunga dipaboa hian taringot i di Bibel. Si Mateus manurat, “Sasintongna, ndang mangkatai ibana tu natorop i molo ndang marhite tudosan, asa saut hata ni panurirang na mandok, ‘Hatahononku do angka tudosan. Paboaonku do angka na buni sian najolo.’”​—Mateus 13:34, 35; Psalmen 78:2.

Asing ni i, dipangke Jesus do tudosan laho mamboto halak na songon dia do sasintongna na manangihon ibana i. Ai godang do sian nasida na marlomo ni roha tu Jesus ala malo ibana mangajari jala boi mambahen mukjizat manang tanda halongangan. Alai ndang olo nasida mangoloi Jesus jala mangihuthon ibana. (Lukas 6:46, 47) Ndang olo nasida mangihuthon pangantusion na sintong asa muba pangalaho ni nasida. Ai ditutup nasida do roha ni nasida.

Dung i, dialusi Jesus ma sungkun-sungkun ni angka siseanna i. Ninna ma, “Ai marnida do nasida alai ndang adong gunana, marbinege do nasida alai ndang adong gunana jala ndang diantusi lapatanna. Alani i do marhite tudosan ahu mangajari nasida. Alani i, saut ma surirang ni si Jesaya tu nasida na mandok, ‘. . . Ai ndang bungka be roha ni bangso on.’”​—Mateus 13:13-15; Jesaya 6:9, 10.

Alai ndang sude songon i na manangihon Jesus i. Ai didok Jesus do, “Marlas ni roha ma hamu ala marnida do matamuna, jala marbinege do pinggolmuna. Situtu do na hudok on tu hamu, lomo do roha ni torop panurirang dohot angka halak na mangulahon na sintong naeng mangida na niidamuna alai ndang diida nasida, jala naeng mambege na binegemuna alai ndang dibege nasida.”​—Mateus 13:16, 17.

 Diparrohahon 12 apostel dohot angka sisean ni Jesus na asing i do hata ni Jesus i. Alani i, didok Jesus ma, “Dilehon do tu hamu pangantusion laho mamboto rahasia na badia taringot tu Harajaon banua ginjang, alai ndang dilehon i tu nasida.” (Mateus 13:11) Ala naeng botoon ni nasida do lapatan ni tudosan i, gabe dipatorang Jesus ma tu nasida tudosan taringot tu panabur.

Jesus mandok, “Boni i, i ma hata ni Debata.” (Lukas 8:11) Tano i, i ma roha ni jolma i. Ingkon taboto do na dua on asa boi taantusi lapatan ni tudosan i.

Dipatorang Jesus ma taringot tu boni na madabu di dalan. Ninna ma, “Ro ma Sibolis mambuat hata i sian roha ni nasida asa unang porsea jala unang malua nasida.” (Lukas 8:12) Dipaboa ibana ma muse taringot tu boni na madabu di tano na marbatu. Lapatanna, las do roha ni jolma i manjalo hata ni Debata, alai ndang bagas marurat di bagasan rohana. Alani i, “tingki masa hasusaan manang sitaonon alani barita i”, gabe tartuktuk ma nasida. Tingki “ro pangunjunan” i, ra olo do diorai keluarga manang halak na asing gabe ndang diihuthon nasida be Jesus.​—Mateus 13:21; Lukas 8:13.

Songon dia do boni na madabu di suga-suga i? Dipaboa Jesus ma, molo jolma na nidokna disi, i ma halak naung manangihon hata ni Debata alai sai holsoan tu “parngoluon di tingki on jala holongan tu hamoraon”. (Mateus 13:22) Nunga diboto nasida hata i alai ndang diulahon nasida.

Dipatorang Jesus ma muse taringot tu boni na madabu di tano na denggan. Lapatanna i ma angka halak na manangihon hata i jala na manimpan i di bagasan rohana. Alani i, gabe diboto nasida ma aha na laho ulahononna. Boi ma didok, “marparbue” do nasida. Alai, boi do sahit dohot situasi mambahen  ndang sai dos godang ni na niulahon ni nasida. Adong do na 100 hali lompit, 60 hali lompit, jala na asing 30 hali lompit. Nang pe songon i, dipasu-pasu Debata do “halak na ias rohana” mambege hata i. Ai “dung dibege [nasida] hata i, disimpan ma i di bagasan roha ni nasida jala marparbue mardongan habengeton”.​—Lukas 8:15.

Pingkirhon ma songon dia pangkilalaan ni angka sisean i dung mambege hatorangan ni Jesus! Tontu las do roha ni nasida, ala nunga diantusi nasida tudosan ni Jesus i. Jala Jesus pe, las do rohana asa diantusi nasida tudosan i. Asa boi dibaritahon nasida i tu halak na asing. Jesus mandok, “Ndang bahenon ni halak lampu tu toru ni karanjang manang tu toru ni podoman, ndang i? Nda bahenonna i nian tu inganan na timbo?” Didok Jesus ma muse, “Manang ise na marpinggol, dibege ma i.”​—Markus 4:21-23.

Dung dibege angka sisean hatorangan ni Jesus taringot tu panabur i, didok nasida ma tu Jesus, “Patorang ma tu hami tudosan taringot tu simareme-eme na di ladang i.”​—Mateus13:36.

Sian sungkun-sungkun i, tarida ma ndang songon angka jolma i angka sisean ni Jesus. Didapothon nasida do Jesus laho manungkun lapatan ni tudosan i. Hape molo angka jolma i, ndang ringkot di nasida mamboto lapatan ni tudosan i.

Dung i didok Jesus ma, “Parrohahon hamu ma na binegemuna. Ai panuhatan na pinangkemuna laho manuhat, i do suhathononna tu hamu. Gariada tambahononna dope tahe gumodang.” (Markus 4:24) Diparrohahon angka sisean i do na niajarhon ni Jesus. Alani i, lam godang ma dipaboa Jesus tu nasida jala lam godang ma na diboto nasida. Dung i dipaboa Jesus ma tu nasida lapatan ni tudosan taringot tu eme dohot simareme-eme.

Didok ma, “Na manabur boni na denggan, i ma Anak ni jolma i. Ladang, i ma portibi on. Boni na denggan, i ma angka anak Harajaon. Alai simareme-eme, i ma angka anak ni Sibolis. Musu na manabur, i ma Sibolis. Panabi, i ma angka suru-suruan. Jala panen, i ma panutup ni jaman on.”​—Mateus 13:37-39.

Dung i dipaboa Jesus ma na laho masa di ari na naeng ro. Di panutup ni jaman on, papulikon ni angka suru-suruan ma “angka anak Harajaon” i sian halak Kristen na so tutu. Papunguonna ma “angka halak na mangulahon lomo ni roha ni Debata” jala marsinondang  ma nasida “di Harajaon ni Ama nasida”. Alai laho pamateonna ma “angka anak ni Sibolis” i. Gabe “mangangguhi jala muruk situtu” ma nasida.​—Mateus 13:41-43.

Dung i dipaboa Jesus ma muse tolu tudosan tu angka siseanna. Na parjolo, didok Jesus ma, “Tudos do Harajaon banua ginjang i tu arta na buni di ladang. Adong ma sasahalak na mandapot i, alai ditanom ma muse. Alani las ni rohana, laho ma ibana manggadis sude artana laho manuhor tano i.”​—Mateus 13:44.

Didok ma muse, “Tudos do muse Harajaon banua ginjang i tu sahalak partiga-tiga na mangalului mutiara na arga. Dung dapotna sada mutiara na arga, laho ma ibana jala hatop ma digadis sude na adong di ibana laho manuhor i.”​—Mateus 13:45, 46.

Di dua tudosan i, dipaboa Jesus do taringot dua baoa na manggadis sude artana laho mandapot arta na ummarga. Di tudosan na parjolo, digadis baoa i do “sude artana” laho manuhor tano i. Jala digadis partiga-tiga di tudosan na paduahon do “sude na adong di ibana” laho manuhor mutiara na arga i. Sian dua tudosan i, dipaboa Jesus ma ingkon olo do sasahalak mangalehon gogo, tingki dohot na adong di sasahalak asa dapotna na arga di ibana. Laos songon i ma bahenonna asa boi marale-ale tu Debata. (Mateus 5:3) Deba sian na manangihon Jesus i nunga mangulahon i asa boi marale-ale tu Debata jala gabe siihuthon Jesus.​—Mateus 4:19, 20; 19:27.

Na parpudi, dipatudos Jesus ma Harajaon i tu jala na sinampakkon tu laut na mandapot marragam dengke. (Mateus 13:47) Dipapulik ma dengke na denggan jala dibolongkon ma dengke na so denggan. Songon i ma na laho masa di panutup ni jaman on. Sirangon ni suru-suruan ma angka halak na mangulahon lomo ni roha ni Debata sian halak parjahat.

Dos songon panjala do Jesus tingki dipillit ibana angka siseanna gabe “sijala jolma”. (Markus 1:17) Alai di ari na naeng ro manang “di panutup ni jaman on” do masa tudosan na nidokna i. (Mateus 13:49) Alani i, diboto angka apostel dohot angka sisean na asing ma, na laho masa ulaon na balga di ari na naeng ro.

Tangkas ma, umgodang do parbinotoan dapot ni angka apostel dohot angka sisean i sian angka na manangihon Jesus di topi ni laut. Ai “dipatorang ibana do i sude tingki pulik ibana dohot angka siseanna”. (Markus 4:34) Tudos ma Jesus tu “sahalak nampuna jabu na pakaluarhon arta na imbaru dohot arta na leleng sian panimpanan ni artana”. (Mateus 13:52) Tingki dipaboa Jesus angka tudosan i, ndang na laho patuduhon na malo ibana mangajari. Alai dos songon na mangalehon arta na arga do ibana tu angka siseanna. Alani i, ndang adong “guru” na songon ibana.