A rairai vunauci ira na Farisi o Jisu ni tiko voli mai Kapenaumi. Ni cakava oti qori, e gole sara ina Wasa o Kalili ra qai soqoni yani e keri na ilala levu. E vodo ena dua na waqa o Jisu, toso vakalailai i wai qai veivakavulici mai keri me baleta na Matanitu vakalomalagi. E vakayagataka e vica na vosa vakatautauvata. Nira kila vinaka na vakarorogo e levu na ka e cavuta o Jisu, e rawarawa kina nodra kila na veika e vakavulica me baleta na Matanitu ni Kalou.

Na imatai ni vakatautauvata i Jisu e baleta e dua na dauteitei e lai kakaburaki. E lutu eso na itei ena batinisala ra qai kania na manumanuvuka. E lutu eso tale ena vanua veivatu e lailai kina na qele. Ni sega ni vavaku na qele, e malai na wakadra ni cila mai na siga ra qai mate sara. Eso tale na itei e lutu ena veiwavakavotona, e tubu na wavakavotona qai solegi ira na kau se qai tubu vou. Ia eso e lutu ena qele vinaka. Era vua sara na itei qori, “eso e 100 vakacaca na vuana, e 60 eso, e 30 eso.”​—Maciu 13:8.

E kaya o Jisu ena dua tale na vakatautauvata, na Matanitu ni Kalou e vaka e dua na turaga e kakaburaki. Se mani moce se yadra na turaga qori, e kadre ga nona itei. “E sega ni kila” se yaco vakacava qori ni tubu ga vakataki koya. (Marika 4:27) E kadre na witi, e vua, qai rawa ni tamusuki.

Na ikatolu ni vakatautauvata e baleta tale ga na kakaburaki. E kaburaka na itei vinaka e dua, “nira moce tiko nona tamata” e qai kaburaka na meca na itei ni co ca ena loganiwiti. Ni ratou tarogi itaukeiniwiti na nona dauveiqaravi ke vinakata me cavuraki na co ca, e kaya: “Kua mada, de dou cavuraka tale ga na witi ni dou kumuna na co  ca. Laiva me rau tubu vata me yacova na gauna ni tatamusuki. Ena gauna ni tatamusuki au na qai kaya vei ira na dautatamusuki, ni kumuna mada e liu na co ca, ni vesuka vata me vakamai, oti ya me qai kumuni na witi ina noqu lololo.”​—Maciu 13:24-30.

Era kila na teitei e levu era vakarogoci Jisu tiko. Dua tale na ka kilai levu e cavuta o Jisu, na sore ni musita. E tubu me kau levu sara ra qai ro e tabana na manumanuvuka. E kaya me baleta na sorenitei qori: “Na Matanitu vakalomalagi e vaka na sore ni musita e kauta na dauteitei me tea ena nona were.” (Maciu 13:31) E sega ni veivakavulici tiko e keri o Jisu ena teitei. E via vakaraitaka ga ni dua na ka lailai sara e rawa ni tubu levu se tete vakalevu.

E vakamacalataka sara o Jisu e dua na ka era kila vinaka tale ga na vakarorogo. E vakatauvatana na Matanitu vakalomalagi ina “leveni e kauta e dua na yalewa qai wakia vata kei na tolu na ivakarau falawa.” (Maciu 13:33) E sega ni laurai na leveni, ia e curuma na falawa taucoko me yacova ni sa tubu. E vakasakiti qai sega ni laurai levu na tubu kei na veisau e vakavuna na leveni.

Ni vakamacalataka oti o Jisu na vosa vakatautauvata qori, e vakasukai ira na ilala levu qai lesu ina nona icili. Ia ratou gole tale vua nona tisaipeli ni ratou via kila na ibalebale ni vosa vakatautauvata.

Sa vakayagataka oti e liu o Jisu na vosa vakatautauvata, ia e sega ni levu sara va qo. Era mani tarogi koya na tisaipeli: “Na cava oni vosa kina vei ira ena vosa vakatautauvata?”​—Maciu 13:10.

Dua na vuna me vakayacori kina na parofisai vakaivolatabu: “E vosa ga vei ira ena vosa vakatautauvata, me vakayacori kina na ka e tukuna na parofita: ‘Au na dolava na gusuqu ena vosa vakatautauvata, au na tukuna na ka e vuni tu mai na ivakatekivu.’”​—Maciu 13:34, 35; Same 78:2.

E vakayagataka tale ga o Jisu na vosa vakatautauvata me vakavotui kina na nodra rai na lewenivanua. Era taleitaki Jisu ga e levu ena vuku ni nona italanoa kei na cakamana. Era sega ni vakabauta ni Turaga, e dodonu me dokai qai muri vakatabakidua. (Luke 6:46, 47) Era sega ni via veisautaka nodra rai se ivalavala. Era sega ni vinakata me tara na lomadra na ivakavuvuli i Jisu.

E sauma o Jisu nodratou taro na tisaipeli ena nona kaya: “Oya na vuna au vosa kina vei ira ena vosa vakatautauvata. Era rai tu, ia era sega ni raica rawa na ka, e tu na daligadra, ia era sega ni rogoca rawa na ka, era sega tale ga ni kila na kena ibalebale. Sa vakayacori tiko vei ira na parofisai i Aisea. E kaya ‘. . . Sega ni malele mai na lomadra na tamata qo.’”​—Maciu 13:13-15; Aisea 6:9, 10.

Sega ni vakaibalebaletaki qori vei ira kece na vakarorogo. E kaya o Jisu: “E kalougata na matamudou ni dou raica, kei na daligamudou ni dou rogoca. Au tukuna vakadodonu vei kemudou, era diva tu e levu na parofita kei na tamata yalododonu mera raica na veika dou raica, ia era sega ni raica, mera rogoca tale ga na veika dou rogoca, ia era sega ni rogoca.”​—Maciu 13:16, 17.

Io, eratou yalomalumalumu na 12 na yapositolo kei ira na vo ni tisaipeli yalodina. E kaya kina o Jisu: “E vakatarai vei kemudou mo dou kila na veika vuni tabu ni Matanitu vakalomalagi, ia e sega ni vakatarai vei ira.” (Maciu 13:11) E vakamacalataka sara o Jisu vei ira na nona tisaipeli  na vosa vakatautauvata ni dauteitei nira via kila dina na kena ibalebale.

“Na itei, na vosa ni Kalou,” e kaya o Jisu. (Luke 8:11) Na qele na lomada. E bibi me kilai rawa qori me matata kina na ibalebale ni nona vosa vakatautauvata.

E kaya o Jisu me baleta na itei e lutu e batinisala qai butuki: “E lako mai na Tevoro qai kauta tani na vosa ya mai lomadra mera kua kina ni vakabauta ra qai vakabulai.” (Luke 8:12) Na sorenitei e kaburaki ena vanua veivatu e vakaibalebaletaka o Jisu ina lomadra o ira na rogoca qai ciqoma na vosa ena marau. Ia e sega ni vakawakana e lomadra na vosa. Era mani tarabe nira “vakararawataki se vakacacani ena vuku ni vosa.” Era biuta na vakabauta de dua ena nodra ‘veivakatovolei’ nodra vuvale se o ira tale na so.​—Maciu 13:21; Luke 8:13.

E kaya o Jisu vei ira na nona tisaipeli ni sorenitei e lutu ena veiwavakavotona e vakaibalebaletaki ira era rogoca na vosa. Ia era rawai ena “nuiqawaqawataki ni bula ena gauna qo kei na veibacani ni iyau.” (Maciu 13:22) Sa tara na lomadra na vosa, ia e sega ni tubu, mani sega ni vua.

Na iotioti ni qele e vakamacalataka o Jisu na qele vinaka. Qori e vakaibalebaletaki ira era rogoca na vosa ena loma e vinaka, era taura dei ra qai “vua.” Ena duidui na ka eda rawata ni vakatau ena keda ituvaki, me vaka na yabaki kei na bula vakayago. E rawa ni 100 vakacaca na vuana e dua, 60 e dua, 30 e dua tale. Na Kalou ena vakalougatataki ira era “rogoca na vosa ena loma e vinaka, era taura dei ra qai vosota nira vua tiko.”​—Luke 8:15.

Sa na veiuqeti mada ga na vosa qori vei ratou na tisaipeli eratou vaqarai Jisu me vakamacalataka nona ivakavuvuli! Sa titobu sara qo  nodratou kila na vosa vakatautauvata. E vinakata o Jisu me ratou kila nona vosa vakatautauvata, me ratou qai vakamacalataka na ka dina vei ira eso tale. E taroga: “E sega ni kau mai na cina me biu e ruku ni basikete se ruku ni imocemoce se vakacava? Sega ni dau biu ga ena itutu ni cina?” E veivakasalataki sara o Jisu: “Me rogoca vinaka o koya e vakadaligana.”​—Marika 4:21-23.

Ni vakamacalataka oti o Jisu na vosa vakatautauvata ni dauteitei, eratou via kila e levu tale na ka na tisaipeli. Eratou mani kerea: “Ni vakamacalataka mada vei keitou na ibalebale ni vosa vakatautauvata ni co ca ena were.”​—Maciu 13:36.

E sega ni va qori nodra rai na ilala levu era tu e matasawa. Era rogoca na vosa vakatautauvata, ia era sega ni via kila na kena ibalebale kei na ka mera vulica kina. Sa rauti ira ga na ivakamacala raraba ni vosa vakatautauvata. Eratou duidui na tisaipeli vei ira na ilala levu ni ratou via kila e levu tale na ka, mani kaya vei ratou o Jisu:

“Ni vakasamataka vinaka na ka oni rogoca tiko. Na ivakarau oni vakarautaka ena vakarautaki tale vei kemuni, io, ena vakaikuritaki vei kemuni.” (Marika 4:24) Eratou vakasamataka vinaka na tisaipeli na veika ratou rogoca vei Jisu. Eratou vakaraitaka vei Jisu ni ratou kauai qai via vakarorogo dina, ratou vakalougatataki kina ena levu tale na ivakavuvuli, levu tale na ka e vakamatatataki vei ratou. E sauma sara nodratou vakatataro me baleta na vosa vakatautauvata ni witi kei na co ca ni kaya:

“O koya e kaburaka na sorenikau vinaka, na Luve ni tamata, na were o vuravura. Na sorenikau vinaka, o ira na luve ni Matanitu, ia na co ca, o ira na luve ni vunica, na meca e kakaburaki, na Tevoro. Na gauna ni tatamusuki, na ivakataotioti ni veika vakavuravura, o ira na dautatamusuki, na agilosi.”​—Maciu 13:37-39.

E vakamacalataka yadua e liu o Jisu na tikina bibi ena nona vosa vakatautauvata, sa qai vakaraitaka na ka ena yaco. E kaya ni o ira na dautatamusuki se agilosi era na tawasei ira na lotu vaKarisito lasu era vaka na co ca mai vei ira na “luve ni Matanitu.” Qori ena yaco ena ivakataotioti ni veika vakavuravura. Era na kumuni “na ivalavala dodonu,” era na qai ramase ena “Matanitu nei Tamadra.” O ira “na luve ni vunica” era na vakarusai, “era na tagi, era na katibati.”​—Maciu 13:41-43.

E vakalougatataki ratou tale nona tisaipeli o Jisu ena tolu na vosa vakatautauvata. E kaya ena kena imatai: “Na Matanitu vakalomalagi e vaka na iyau e vunitaki tu ena were, e kunea e dua qai sega ni vakaraitaka. Ena levu ni nona marau, e lai volitaka na ka kece e tu vua me volia kina na were ya.”​—Maciu 13:44.

 E tomana o Jisu: “Na Matanitu vakalomalagi e vaka tale ga na dauveivoli e vaqara na mataniciva talei. Ni kunea e dua na mataniciva saulevu, sega ni bera ni lai volitaka na ka kece e tu vua me volia kina na mataniciva ya.”​—Maciu 13:45, 46.

E vakabibitaka o Jisu ena rua na vosa vakatautauvata qori nona yalorawarawa e dua me vakuai koya me rawata kina e dua na ka talei. Sega ni bera nona volitaka na dauveivoli “na ka kece e tu vua” me volia kina na mataniciva talei. Eratou sega ni vulagi na tisaipeli i Jisu ena ivakaraitaki ni mataniciva talei. Na tagane tale ga e kunea na iyau ena were e “volitaka na ka kece e tu vua” me taukena kina. E vakamacalataki ruarua ena vosa vakatautauvata qori e dua na ka talei me sasagataki qai vakamareqeti. Qori e tautauvata kei na veika e vakuai koya kina e dua ni kauaitaka nona bula vakayalo. (Maciu 5:3) Dua na ka nodra yalorawarawa kei na nodra sasaga eso era rogoca na vakatautauvata i Jisu, nira kauaitaka nodra bula vakayalo ra qai vinakata mera nona imuri dina.​—Maciu 4:19, 20; 19:27.

E tukuna o Jisu ena ikatolu ni vosa vakatautauvata ni Matanitu vakalomalagi e vaka na lawa e kumuna na veimataqali ika. (Maciu 13:47) Nira wasei na ika, era tawa ena sova na ika vinaka ra qai kolotaki tani na ika ca. E kaya o Jisu ni na va tale ga qori ena ivakataotioti ni veika vakavuravura​—era na wasei ira na daucaka ca mai vei ira na yalododonu na agilosi.

A vakaitavi tiko o Jisu ena qoli vakayalo ni kacivi ratou na isevu ni nona tisaipeli me ratou “gonedau ni tamata.” (Marika 1:17) Ia e kaya ni na vakayacori ena gauna se bera mai na nona vakatautauvata ni lawa, “ena ivakataotioti ni veika vakavuravura.” (Maciu 13:49) Eratou kila rawa mai keri na yapositolo kei na vo ni tisaipeli era vakarogoci Jisu tiko, ni na yaco na veika veivakurabuitaki ena dua na gauna e muri.

Levu tale na ka era sa mai kila o ira era rogoca na vosa vakatautauvata a cavuta mai waqa o Jisu. E vinakata dina o Jisu me “vakamacalataka na kena ibalebale vei ratou na nona tisaipeli.” (Marika 4:34) E “tautauvata kei na dua na tamata, na itaukeinivale e kauta mai na nona valeniyau na veika vou kei na veika makawa.” (Maciu 13:52) Sega ni cavuta o Jisu na vosa vakatautauvata qori me dokadokataka kina nona veivakavulici. E vakamacalataka tiko ga vei ratou nona tisaipeli na ka dina e vaka na iyau talei. O Jisu ga na “qasenivuli” vinaka duadua.