Jesus engka ba Kapernaum lebuh iya ngerara orang Parisi. Ba hari ti sama, Jesus bejalai ngagai tebing Danau Galili, bisi mayuh orang begelumu ba dia. Jesus nepan sebuah perau, lalu ngayuhka perau nya jauh mimit ari tebing. Ba dia, iya ngajar orang pasal Perintah Petara. Iya ngena mayuh jaku sempama lebuh ngajar sida. Jesus ngena mayuh utai ke biasa dikena bala peninga iya dalam pengidup sida besehari-sehari. Nya alai, sida senang meretika jaku sempama ke dikena Jesus pasal Perintah Petara.

Keterubah, Jesus nyebut jaku sempama pasal siku penabur benih. Sekeda leka benih nya labuh ba jalai lalu burung datai makai benih nya. Sekeda benih labuh ba tanah ti bebatu. Taja pan leka benih nya berengkah tumbuh tekala nya, tang benih nya nadai urat. Nya alai, benih nya layu lebuh kena panchar mata panas. Leka benih ke bukai labuh ba madang duri. Duri tumbuh lalu ngachau benih nya ari tumbuh. Ke pengujung iya, sekeda benih labuh ba tanah ti ami lalu bebuah. Asil iya, “sekeda mansutka 100 kali lipat, sekeda 60 kali lipat, lalu sekeda agi 30 kali lipat.”—Matthew 13:8.

Pengudah nya, Jesus madahka siti agi jaku sempama. Iya nyemaka Perintah Petara enggau siku lelaki ke naburka benih. Enda ngira lelaki nya tinduk tauka dani, leka benih nya agi tumbuh lalu mansang tinggi. Tang “iya enda nemu baka ni utai nya tau nyadi.” (Mark 4:27) Benih nya tumbuh lalu ngasilka gandum ke ulih diketau lelaki nya.

Udah nya, Jesus madahka jaku sempama ketiga pasal pengawa nabur benih. Siku orang  nanam leka benih ti manah ba ladang iya. Tang “lebuh semua orang tinduk,” siku munsuh datai lalu nanam leka lalang ba madang gandum nya. Bala ulun orang ke bempu ladang nya nanya iya, enti sida patut chabut semua lalang nya. Iya nyaut sida: “Anang, enggaika kita techabutka gandum lebuh kita nyabut lalang. Awakka gandum enggau lalang nya sama tumbuh nyentuk ngagai maya ngetau. Maya ngetau ila, aku deka bejaku enggau orang ke ngetau, ngasuh sida ngumpul lalang nya dulu, nanchang iya lalu nunu lalang nya. Udah nya, baru gandum tau digumpul lalu disimpan dalam setor aku.”—Matthew 13:24-30.

Ketegal mayuh peninga Jesus nemu pasal pengawa bekebun, nya alai Jesus nyebut jaku sempama pasal leka mustard ti mit. Lebuh leka nya tumbuh, iya ulih nyadi pun kayu ti amat besai nyentukka burung begagaka tansang ba sebelah dan iya. Ku Jesus madah: “Perintah serega nya baka igi mustard ti dibai orang siku, lalu ditanam iya ba ladang iya.” (Matthew 13:31) Tuju Jesus madahka sempama tu, ukai deka ngajar sida pasal pengawa betanam. Tang iya nerangka baka ni utai ti amat mit ulih tumbuh nyadi utai ti amat besai.

Udah nya Jesus nyebut pasal chara ngaga roti ke udah ditemu mayuh orang. Iya madahka: “Perintah serega nya baka ragi ti diambi siku indu lalu dichampurka iya enggau tepung ke mayuh, datai ke semua tepung nya nyau kembai magang.” (Matthew 13:33) Taja pan kitai enda ulih meda ragi ke udah dichampur, tang ragi nya ulih ngasuh semua tepung nya kembai. Nyadi, ragi nya ulih ngasuh tepung nya berubah taja pan kitai enda ulih meda proses nya.

Pengudah Jesus meri beberapa jaku sempama nya, iya ngasuh orang mayuh pulai lalu iya empu tama ke rumah alai iya diau. Enda lama udah nya bala murid Jesus datai, lalu sida ngasuh iya nerangka reti jaku sempama nya.

Bala murid Jesus kala ninga iya ngena jaku sempama ngajar orang. Tang tu meh kali keterubah Jesus madahka mayuh jaku sempama ba maya ti sama. Nya alai, sida nanya Jesus: “Nama kebuah nuan bejaku ngagai sida ngena jaku sempama?”—Matthew 13:10.

Siti ari kebuah Jesus ngena jaku sempama, iya nya ngambika iya ulih ngamatka jaku benabi dalam Bup Kudus. Ku Matthew madahka: “Lebuh bejaku ngagai orang mayuh ba dia, iya enda kala enda ngena jaku sempama. Tu ngamatka jaku ti udah disebut nengah siku nabi: ‘Mulut aku deka bejaku ngena jaku sempama; aku deka nyebut pasal utai ti udah dilalaika kenyau ari pun.’”—Matthew 13:34, 35; Masmur 78:2.

Kebuah ti kedua Jesus ngena jaku sempama, iya nya kena nemu tuju ati orang. Mayuh orang nitihka Jesus laban sida ngasaika iya pandai becherita lalu selalu ngereja pengawa ti luar biasa. Tang sida enda ngaku Jesus nya Tuan, lalu enggai ngasi sereta enggai nitihka iya. (Luke 6:46, 47) Sida enggai ngubah runding sereta chara pengidup sida ti salah. Nya alai, sida enggai nerima ajar Jesus.

Ku Jesus nyaut tanya bala murid iya: “Nya kebuah aku bejaku ngagai sida ngena jaku sempama. Laban taja pan sida merening, sida enda ulih meda, lalu taja pan sida mending, sida enda ulih mereti. Ba sida tu meh jaku Nabi Isaiah dikeamatka: ‘. . . Ati orang ari bansa tu udah ditutup.’”—Matthew 13:13-15; Isaiah 6:9, 10.

 Tang jaku Jesus nya ukai dituju ngagai semua peninga iya. Ku Jesus nerangka: “Gaga ati meh kita, laban mata kita ulih meda, lalu pending kita ulih ninga. Enggau bendar aku madah ngagai kita: Mayuh nabi enggau orang ke lurus ingin deka meda utai ti dipeda kita, tang sida enda ulih meda utai nya. Sida ingin deka mendingka utai ti dipendingka kita, tang sida enda ulih ninga utai nya.”—Matthew 13:16, 17.

Semua 12 iku bala rasul sereta murid ke bukai setia sereta deka belajar ari Jesus. Lalu Jesus madah ngagai sida: “Petara udah meri kita penemu bekaul enggau resia ti kudus pasal Perintah serega, tang sida enda.” (Matthew 13:11) Ketegal sida amat deka belajar, nya alai Jesus nerangka reti jaku sempama pasal orang ke naburka benih ba tanah.

Kena nulung kitai meretika reti sempama tu, Jesus madahka: “Leka benih nya jaku Petara.” (Luke 8:11) Lalu tanah nya ati sesiku orang.

Bekaul enggau benih ti labuh ba jalai nya, Jesus nerangka: “Sitan datai lalu ngerampas jaku ti udah ditanam dalam ati sida, ngambika sida enda arap lalu enda ulih diselamatka.” (Luke 8:12) Udah nya, Jesus madah benih ti labuh ba batu nya, orang ke ninga jaku Petara lalu nerima iya enggau ati ti gaga. Tang jaku nya enda beurat ba ati sida. Lebuh sida “dituntung penusah tauka pemerinsa ketegal jaku nya,” sida lalu mantul. “Lebuh bisi penguji,” ari kaban belayan sida tauka orang bukai, sida tekala nya putus asa.—Matthew 13:21; Luke 8:13.

Nama reti benih ti labuh ba madang duri nya? Tu pasal orang ke ningaka jaku nya, tang sida dialahka “ketegal pengirau pasal pengidup ba dunya tu sereta kuasa pengaya ti ulih nipu.” (Matthew 13:22) Jaku Petara bisi dalam ati sida, tang jaku nya alah lalu enda ulih bebuah.

Kepenudi iya, Jesus bejaku pasal tanah ti ami. Tanah tu merujuk ngagai sida ke ninga jaku nya lalu nyimpan iya dalam ati. Nama asil iya? Sida “mansutka buah.” Ketegal umur enggau pengerai sida enda sama, asil ke diulih sida pan enda sama. Sekeda mansutka 100 kali lipat, sekeda agi 60 kali lipat, lalu bisi mega 30 kali  lipat. Taja pia, Petara merekatka semua “orang ke bisi ati ti manah sereta lurus. Pengudah sida ninga jaku nya, sida nyimpan iya dalam ati sereta mansutka buah lebuh sida napi penanggul enggau ati ti liat.”—Luke 8:15.

Tentu bala murid ke datai ngagai Jesus berasai kagum enggau penerang tu! Sida ulih meretika jaku sempama nya enggau dalam agi. Lalu Jesus dekaka sida bekunsika pemendar tu enggau orang bukai. Ku Jesus: “Orang enda nangkup lampu kelita ngena bakul tauka ngengkahka iya ba baruh katil, enda pia? Endaka lampu kelita patut diengkah ba penuduk iya?” Nya alai, Jesus meri jaku lalau tu: “Awakka orang ke bisi pending, ninga enggau manah.”—Mark 4:21-23.

Pengudah ninga penerang pasal penabur benih, bala murid Jesus deka nemu mayuh agi. Ku sida: “Padahka ngagai kami reti sempama pasal lalang ti ba ladang gandum nya.”—Matthew 13:36.

Ulah bala murid Jesus enda sama enggau orang bukai ke ba tebing danau. Taja pan sida ba dia ninga jaku sempama ke dipadahka Jesus, tang sida nadai ati deka nemu reti tauka nitihka ajar nya. Sida udah puas ati enggau penerang ti mimit ke didinga sida lalu sida enggai nemu mayuh agi pasal sempama nya.

Ku Jesus madah: “Peratika utai ti didinga kita. Takar ti dikena kita nakar, mega deka dikena nakar kita. Indah utai ti diterima kita deka lebih agi ari utai ti ditakar kita.” (Mark 4:24) Bala murid Jesus ninga enggau manah utai ke diajar iya. Ketegal bala murid Jesus rindu ninga sereta amat deka belajar utai ke diajar Jesus, nya alai Jesus meri sida mayuh agi penerang ngambika sida ulih lebih agi meretika ajar nya. Nyadi, Jesus nerang ngagai sida reti jaku sempama pasal gandum enggau lalang.

Ku Jesus: “Orang ke naburka benih ti manah nya, Anak Mensia. Ladang gandum nya, dunya tu. Benih ti manah nya, nembiak Perintah Petara. Lalang nya, nembiak Sitan. Lalu munsuh ke nanam leka lalang nya, Sitan. Maya ngetau nya, pengujung dunya, lalu orang ke ngetau nya, bala melikat.”—Matthew 13:37-39.

Jesus nerangka pasal utai ke deka nyadi maya pengujung dunya. Maya nya bala melikat ke baka orang ke ngetau, deka nyeraraka orang Kristian ti pelesu ke baka lalang, ari “nembiak Perintah Petara.” Lalu “orang ke lurus” deka digumpulka lalu “manchar enggau terang ba Perintah Apai sida.” Nama deka nyadi ngagai “nembiak Sitan”? Sida deka “nyabak sereta begerit ngeli” laban sida deka dipunaska.—Matthew 13:41-43.

Udah nya, Jesus madahka tiga agi jaku sempama ngagai bala nembiak iya. Keterubah, iya madah: “Perintah serega baka reta ti berega ke dilalaika dalam sebidang tanah, ti ditemu orang  siku lalu dilamun iya baru. Enggau ati ti gaga iya mupuk, lalu nyual semua reta iya lalu meli tanah nya.”—Matthew 13:44.

Iya nampung: “Perintah serega mega baka siku orang dagang ke bejalai begigaka batu mutiara ti manah. Lebuh iya tetemuka sigi batu mutiara ti berega amat, iya lalu mupuk nyual semua reta iya, lalu meli batu mutiara nya.”—Matthew 13:45, 46.

Ari dua iti sempama nya, Jesus ngajar pasal orang ke sanggup ngelengkaka utai bukai ngambika bulih utai ti amat berega. Siku orang dagang terus mupuk “nyual semua reta iya” ngambika ulih meli batu mutiara ti amat berega. Bala murid Jesus ulih meretika jaku sempama nya. Lalu siku orang ke tetemuka reta ti berega ke dilalaika dalam tanah “nyual semua reta iya” ngambika ulih meli tanah nya. Dua iti jaku sempama nya tau disemaka baka sesiku orang ke sanggup ngelengkaka utai bukai, ngambika bisi kaul ti rapat enggau Petara. (Matthew 5:3) Sekeda orang ke ninga ajar Jesus udah ngelengkaka utai bukai ngambika bulih kaul ti manah enggau Petara sereta ulih terus nitihka Jesus.—Matthew 4:19, 20; 19:27.

Ke pengujung iya, Jesus madah pasal Perintah serega baka pukat ti bulih mayuh macham ikan. (Matthew 13:47) Udah nya orang ke berikan deka nyimpan ikan ti manah dalam bakul, tang muai ikan ti enda manah. Jesus madahka utai ti sama pan deka nyadi lebuh pengujung dunya datai, iya nya bala melikat deka nyeraraka orang ke jai ari orang ke lurus.

Jesus udah mai sekeda murid iya ngiga orang ‘baka ke begigaka ikan’ lalu iya empu pan bisi ngereja pengawa ti sama. (Mark 1:17) Tang, jaku sempama pasal pukat nya deka nyadi jemah ila “lebuh pengujung dunya.” (Matthew 13:49) Nya alai, bala rasul sereta bala murid Jesus ke benung ninga iya ulih nemu pasal utai ke deka nyadi ba jemah ila.

Nyadi, sida ke ninga jaku sempama ke dipadahka Jesus nya udah bulih mayuh penguntung. Lalu Jesus deka “nerangka semua utai ngagai” bala murid iya. (Mark 4:34) Iya “baka orang ke bempu rumah ti mantaika reta ti baru enggau reta ti lama ari setor iya.” (Matthew 13:52) Lebuh Jesus meri jaku sempama nya, tuju iya ukai ketegal deka nunjukka penau diri. Tang, iya deka bekunsika pemendar ti amat berega ngagai bala murid iya. Nya kebuah iya ulih dikumbai “pengajar” ti pemadu manah.