E uke a mea ne fai ne Iesu i te aso kātoa tenā kae ko fi‵ta foki. I te po, ne fai atu a ia ki ana soko: “Tatou ka olo ki te suā feitu o te tai,” ko te koga telā e fakafesagai mai ki kogā koga o Kapanaumi.—Maleko 4:35.

I te feitu ki saegāla o te Tai o Kalilaia e tu ei te fenua ko Kelasa. E lauiloa foki te koga tenei ki a Tekapoli. A fa‵kai o Tekapoli ne fai mo fai se laumua o poto faka-Eleni, faitalia me e tokouke a tino Iutaia ne ‵nofo atu foki i konā.

Ne iloa ne nisi tino a te tiakinaga ne Iesu a Kapanaumi. E isi aka foki ne nisi poti kolā ne kamata o ‵tele atu ki te suā feitu o te tai. (Maleko 4:36) A te ‵tonuga loa, e se ‵mao malosi foki te koga e olo latou ki ei. A te Tai o Kalilaia e fai pelā me se namo lasi o vai ‵ma, telā e nofo ki te 13 maila tena loa kae e 7 maila tena lauefa. Kae e ‵poko eiloa.

E tiga eiloa ne ‵lei katoatoa a Iesu, ne ‵tau eiloa o fi‵ta malosi a ia mai tena galuega talai. Tela la, i te lotou teleatuga, ne takato a ia ki lalo i te taumuli, ne aluga tena ulu ki te aluga, kae ne to ei tena moe.

Ne apo ‵lei a nisi apositolo i te fakatele atu o te poti, kae ne seki faigofie eiloa te malaga tenei. E isi ne mauga e fakatamilo, kae ne masani eiloa o mafanafana a te Tai o Kalilaia. I nisi taimi e agi mai ki lalo mai mauga a te ea ‵moko kae fepaki mo te ea ‵vela i te tai, telā e fakamāfua fakafuasei aka ei a matagi ma‵losi i te tai. Tenā loa te mea ne tupu. E seki leva kae ko ‵fati a galu ki te poti. “Ne kamata o ‵fonu te lotou poti i te vai.” (Luka 8:23) Kae ko Iesu e moe eiloa!

Ne taumafai malosi a tautai apo konā o uliuli faka‵lei ne latou te poti, mai te fakagalue aka olotou atamai i aso ko ‵teka i te fakasekeseke atu i loto i afā. Kae ko ‵kese eiloa te taimi tenei. Ne ‵fagu ne latou a Iesu, me ne ma‵taku i a latou ma ‵mate kae fai atu: “Te Aliki, faka‵sao aka tatou, ko pili tatou o ‵mate!” (Mataio 8:25) Ko ma‵taku eiloa a soko me i a latou ko pili o apulu!

I te taimi ne ala aka ei Iesu, ne fai atu a ia ki apositolo: “Kaia e ma‵taku malosi ei koutou, koutou kolā e fo‵liki otou fakatuanaki?” (Mataio 8:26) Ne fakatonu atu ei a Iesu ki te matagi mo te tai: “Malū! Filemu!” (Maleko 4:39) Ne ‵noga eiloa te matagi kae ko se sou foki te tai. (Ne fakamatala mai ne Maleko mo Luka a te mea fakaofoofogia tenei ne tupu, mai te faka‵mafa mai muamua me ne fakamalū fakavavega ne Iesu a te afā, kae oti ne taku mai foki ne lāua a te sē lava o te fakatuanaki o soko.)

Mafaufau la ki te auala ne pokotia ei a soko i te mea tenei! Ne fatoa lavea eiloa ne latou a te ‵fuliga fakavave o te sou malosi o te tai mai te afā ki te ‵noga katoatoa atu. Ne ma‵taku ‵ki eiloa latou. Ne fakatau fai atu latou: “Ko oi te tino tenei? E faka‵logo foki te matagi mo te tai ki a ia.” Kae ne oko atu eiloa latou ki te suā feitu o te tai mo te tokagamalie. (Maleko 4:41–5:1) Kāti ne mafai o toe ‵foki atu a nisi poti kolā ne olo atu i te tai ki tafatai i te feitu ki togala.

Ko oko eiloa i te gali ke iloa atu me e isi se ‵mana o te Tama a te Atua ki luga i te natula! Kafai ko saga tonu mai a ia ki te lalolagi i te taimi o tena pulega i te Malo, ka ‵nofo a tino katoa i te tokagamalie me ka se toe ai ne mea fakama‵taku penei!